Ekki verður sótt um aftur meðan þjóðin vill ekki inn, Árni!

Árni Páll Árnason, formaður Samfylkingar, segir að ný ríkisstjórn geti sett umsóknarferlið að ESB af stað aftur. Þorsteinn Pálsson, fyrrverandi forsætisráðherra, er þeirrar skoðunar að málið hafi verið sett á byrjunarreit. Allir viti bornir menn hljóta að sjá eftir það sem á undan er gengið að það er engin skynsemi í því að hefja aðildarviðræður að nýju á meðan ekki liggur skýr vilji til þess hjá þjóðinni að gerast aðili að sambandinu. 

Eftir 20 ára víðtækar þjóðfélagslegar umræður á Íslandi þar sem Evrópustofa hefur lagt sitt lóð á vogarskálar upplýstrar umræðu í krafti áróðurs fyrir um milljarð króna er það niðurstaða íslensku þjóðarinnar að hún vill ekki ganga í Evrópusambandið.

Samt þykist Árni Páll Árnason ætla að halda áfram með umsóknarferlið ef hann kemst til valda. Skortir ekki eitthvað á raunveruleikatengingu hjá krataforingjanum í þessu efni? 

Það gengur ekki lengur í þessum efnum að haga sér eins og krakki sem heimtar að fá að kíkja í pakkann - þótt hann viti í raun að innan í umbúðunum er ókræsilegur biti sem hann ætlar sér að fúlsa við.

Tími óskynsamlegra heimtufrekjustjórnmála af því tagi er liðinn.

Athugasemdir

[Ufsi (IP-tala skráð) 31.5.2015 kl. 16:38]

Ef flokkar sem vilja halda viðræðum áfram og klára samninginn komast til valda hlýtur það að vera skýr vilji þjóðarinnar. Að þjóðin vilji það og því sé ekki eftir neinu að bíða með að taka upp þráðinn þar sem frá var horfið. Við hljótum að fara eftir úrslitum kosninga frekar en einhverjum skoðanakönnunum, og vonum að næsta stjórn standi við þau loforð sem gefin verða þó núverandi hafi ekki haft bein í nefinu til þess.

[Heimssýn, 31.5.2015 kl. 17:15]

Þetta þarf að fara saman, Ufsi: Vilji þjóðarinnar og vilji stjórnvalda. Nú er það þannig að hvorki stjórnvöld né þjóðin vill fara inn.

[Valdimar Samúelsson, 31.5.2015 kl. 17:55]

Hvaða fólk stendur Árni fyrir ekki er það öll samfylkingin eða hvað

[Ufsi (IP-tala skráð) 31.5.2015 kl. 18:21]

Fara saman eins og vilji þjóðarinnar til að kjósa um framhaldið og vilji stjórnvalda til að láta þjóðina ekki hafa neitt að segja um framhaldið. En samkvæmt núverandi stjórnvöldum þá er vilji stjórnvalda vilji þjóðar og óþarfi að athuga það eitthvað frekar.

Spurningin hverjir vilja fara inn verður ekki spurð fyrr en samningar liggja fyrir og sá möguleiki er fyrir hendi. Ykkur er frjálst að ákveða ykkur fyrirfram, en þið eruð ekki þjóðin.

[Ásthildur Cesil Þórðardóttir, 31.5.2015 kl. 18:34]

Það fer vel á því að Samfylkingin geri þetta mál aftur að sínu eina sanna kosningamáli, og svo er að sjá hvaða byr það fær hjá þjóðinni. 

[Heimssýn, 31.5.2015 kl. 19:09]

Í Noregi kemur mönnum ekki til hugar að ræða um mögulega umsókn á meðan þjóðin er á móti inngöngu í ESB. Þannig hugsa ráðamenn ESB líka. Þeir hafa ekki trú á umsóknarferli á meðan góður og tryggur meirihluti þjóðar er á móti inngöngu.

[Erla Magna Alexandersdóttir, 31.5.2015 kl. 20:27]

her er ekki talað um vilja þjóðarinnar eða hagsmuni- aðeins vilja .vermóðskukrata sem taka ekki tillit til aðstæðna hverju sinni-- fá þeir mútur ???

[Jóhann Kristinsson, 31.5.2015 kl. 21:38]

Er ekki Evrópustofa ennþá opin?

Hópar fólks boðið í mútu ferðir til Brussel og allt frítt meira að segja ríflegir dagpeningar fyrir búðarferðir greitt af ESB, auðvitað er ESB ferillinn ennþá í fullum gangi.

Kveðja frá Houston

[Helga Kristjánsdóttir, 1.6.2015 kl. 00:03]

Um leið og ég sá þessa frétt nú fyrir stundu,datt mér í hug að hefði ég séð hana fyrr,hefði ég spurt kappann í hálfleik (Breiðabliks/Stjörnunnar) hvort hann meinti þetta virkilega. Satt að segja finnst mér þetta svo þvergirðingslegt og glórulaust,að mér datt fyrst í hug að enginn ætti að svara þessu. Þetta er nefninlega ekki alvarlegra en þjófavarnarmerki sem fara sjálfkrafa í gang á bílum,trekk í trekk án nokkurrar hættu,sem endar með að maður rífur apparatið úr sambandi. Sambandsástríða með hljóðlausum kæk,verður maður að þola!!    

[Jóhann Elíasson, 1.6.2015 kl. 14:42]

Það kom fram í ágætri grein Rakelar Sigurgeirsdóttur að ÞJÓÐARATKVÆÐAGREIÐSLA UM ÞAÐ HVORT LANDSMENN VILJA INN Í ESB, VERÐUR AÐ FARA FRAM ÁÐUR EN VIÐRÆÐUR HEFJAST, AÐ ÖÐRUM KOSTI FÁ LANDSMENN EKKI AÐ KJÓSA UM AÐILD (INNLIMUN).