Hvorki dollar né evra

Upptaka annars gjaldmiðils en krónunnar felur í sér framsal á fullveldi. Ef Kanadadollar yrði lögeyrir á Íslandi væri fullveldisframsalið óformlegt en tækjum við upp evru yrði framsal á fullveldinu formlegt.

Reynsla okkar eftir hrun kennir að krónan sé ómetanlegt verkfæri til að jafna byrðum af efnahagskreppunni milli þjóðarinnar annars vegar og hins vegar að gefa viðspyrnu af botni kreppunnar. Á Íslandi er meiri hagvöxtur en í evrulandinu Írlandi, sem einnig lenti í bankakreppu, og hér er atvinnuástand mun betra en hjá frændum okkar á eyjunni grænu.

Krónan er gjaldmiðill fullvalda Íslands.

Kanadadalur settur á ís

Fjármálabandalag ESB í uppnámi

Þriggja vikna fjármálabandalag Evrópusambandsins, sem á að vera hornsteinn í baráttunni við skuldakreppuna, er í uppnámi eftir að fjármálaharðlínulandi Holland braut kjarnaákvæði sáttmálans um ríkissjóðshalla.

Samkvæmt nýrri skýrslu verður fjárlagahalli Hollands 4,6 prósent en sáttmálinn kveður á um 3 prósent halla eða minni. Ríkisfjármálahallinn er sérstaklega neyðarlegur fyrir Holland þar sem forsætisráðherra og fjármálaráðherra landsins skrifuðu nýlega grein þar sem hvatt var til að lönd (les Grikkland) sem ekki virtu meginreglur fjármálabandalagsins yrðu rekin úr Evrópusambandinu.

Pólitískri og fjármálalegri kreppu Evrópusambandsins er hvergi nærri lokið.

Grikkir fá fyrstu greiðsluna

Ný ríkjabandalög í stað ESB

Evrópusambandið er að liðast í sundur, spurningin er aðeins hvort það gerist hratt eða hægt. Aftur er engin spurning að með evrunni tók Evrópsambandið stökkbreytingu sem leiðir til úrkynjunar og dauða sambandsins.

Einn gjaldmiðill krefst þess að eitt ríki standi honum að baki. Evrópusambandið verður ekki að ríki næstu áratugina enda enginn áhugi fyrir því meðal íbúa ríkjanna 27 sem mynda sambandið.

Tilraunir verða gerðar með ný ríkjabandalög til að þróa milliríkjasamstarf Evrópuþjóða. Forsætisráðherra Íslands var ásamt túlki boðið á slíka samkomu ekki alls fyrir löngu. 

Útvaldir á fundi um framtíð ESB

Þjóðirnar sem eru hættar við evru

Danir, Svíar og Pólverjar hafa lagt öll áform á hilluna um að taka upp evru og Bretar munu ekki næstu mannsaldra svo mikið sem íhuga upptöku. Í sáttmálum Evrópusambandsins er krafa um að aðildarþjóðir taki upp mynt sambandsins.

Brusselvaldið reynir ekki að þvinga þjóðir að taka upp evru. Það væri eins og að skipa manni inn í brennandi hús.

Allir vita að evru-samstarfið er ónýtt, búið að vera í sinni núverandi mynd. Allir nema ESB-sinnar á Íslandi.

Þýskur agi smurður spillingu

Þjóðverjar eru þekktir fyrir aga, ráðdeild og ábyrgð. Samkvæmt samanburðartölum er Þýskaland 14. minnst spillta ríkið í heiminum. Samt sem áður kostar spilling í Þýskalandi 250 milljarða evra árlega, segir í niðurstöðum nýrrar skýrslu. Spilling sunnar í álfunni er ekki til umræðu en þar er hún víða landlæg.

Íslendingar eru ekki þekktir fyrir aga, ráðdeild og því síður ábyrgð. Spilling þrífst ábyggilega á Íslandi, þótt dult fari.

En hver trúir því að við aðild að Evrópusambandinu myndi Ísland eingöngu læra góða siði og háttu af sessunautum sínum í Brussel? 

Spilling kostar Þjóðverja 250 milljarða evra

Frosti ræðir stöðuga krónu hjá Framsókn

Krónan eignast sífellt fleiri talsmenn. Frosti Sigurjónsson talar í dag, laugardag, kl. 11:30 hjá Framsóknarflokknum á Hverfisgötu 33 um krónuna og framtíðarsýn í peningamálum þjóðarinnar.

Frosti sameinar það að vera frumkvöðull, nýsköpunarmaður og pólitískt athafnaskáld; hann var drifkrafturinn í aðgerðunum sem felldu Icesave II-samninginn.

Krónan er undir stöðugum árásum frá ESB-sinnum. Markmiðið ESB-sinna er að grafa undan krónunni og skapa vantrú þjóðarinnar á getu sinni til að fara með forræði eigin mála. Íslendingar með sjálfstraust færu aldrei inn í Evrópusambandið.

Kenna öðrum þjóðum að spara

ESB-umsókn byggð á ónýtri evru

Evran veldur tuga prósenta atvinnuleysi í jaðarríkjum Evrópusambandsins og dæmir hagkerfi Íra, Spánverja, Portúgala og Grikkja til langtímakreppu. Tilraunin með evruna, sem er ekki nema tíu ára gömul, sýnir að einn gjaldmiðill fyrir mörg hagkerfi leiðir til hörmunga.

Síðasta vörn ESB-sinna fyrir heimskulegustu umsókn allra tíma, ESB-umsókn samfylkingarhluta ríkisvaldsins, er að lofsyngja evruna - gjaldmiðill sem er í dauðateygjunum. Sértrúarhneigð Samfylkingar kemur hvergi betur fram en í taumlausri dýrkun á ónýtum gjaldmiðli.

Evrópusambandið mun ekki búa við evruna öllu lengur. Annað tveggja gefur undan, þolinmæði Þjóðverja eða samfélagsfriðurinn í Suður-Evrópu.

Hér á Íslandi eigum við að bíða og sjá hverju fram vindur í Evrópusambandinu og afturkalla strax samfyklingarumsóknina um aðild.

Evran raunhæf eftir 2016

ESB-brýning Samfylkingarsértrúar

Sértrú Samfylkingar á Evrópusambandinu var staðfest á tveim þingum í dag. Á alþingi bað Jóhanna Sig. um þjóðarsátt um sértrú Samfylkingar á evru og ESB-aðild. Á Iðnþingi brýndi flokkssystir Jóhönnu, Oddný G. Harðardóttir, sem tímabundið er iðnaðarráðherra, aðildarfélög Samtaka iðnaðarins um stuðning við sértrúarhreyfinguna.

Örvænting sértrúarsafnaðarins yfir glötuðum málstað, ESB-umsókninni, er slík að dómgreindin fýkur yfir hæðir.

Þannig segir Oddný að á næsta kjörtímabili, þ.e. á næstu fimm árum, getum við uppfyllt Maastricht-skilyrðin en það eru fjögur skilyrði fyrir inngöngu í myntsamstarf ESB: lág verðbólga, þjóðarskuldir innan við 60% af þjóðarframleiðslu, árlegur ríkissjóðshalli innan við 3% prósent af þjóðarframleiðslu og vextir í hóflegu samhengi við evru-vexti.

Punkturinn sem Oddný fattar ekki er þess: ef við getum náð Maastricht-skilyrðunum með krónunhagkerfi er engin ástæða til að fara í evruhagkerfið - þar sem allt er á hverfandi hveli.

Aftur til þín, Oddný.

Getum uppfyllt Maastricht skilyrðin

Spánverjar krefjast fiskveiðiréttinda við Ísland

Í umræðu um aðildarviðræður Íslands og Evrópusambandsins á Evrópuþinginu tók spænskur þingmaður til máls og krafðist þess að Íslendingar opnuðu landhelgina fyrir fiskveiðiflota Evrópusambandsins. Þá sagði spænski þingmaðurinn ótækt að íslensk lög bönnuðu fjárfestingar útlendinga í útgerð og vinnslu.

Hér er hlekkur á umræðurnar. Spánverjinn tekur til máls á 29 mínútu.

Evrópuþingið styður aðild Íslands að ESB

ESB-aðlögun án umboðs alþingis

En eina leiðin inn í Evrópusambandið er leið aðlögunar, samanber bls. 9 í útgáfu Evrópusambandsins

Accession negotiations concern the candidate's ability to take on the obligations of membership. The term "negotiation" can be misleading. Accession negotiations focus on the conditions and timing of the candidate's adoption, implementation and application of EU rules - some 100,000 pages of them. And these rules (also known as the acquis, French for "that which has been agreed") are not negotiable. For candidates, it is essentially a matter of agreeing on how and when to adopt and implement EU rules and procedures.

Aðildarviðræður snúast um getu umsóknarríkis til að axla skyldur sem aðildarríki. Hugtakið „aðildarviðræður“ getur valdið misskilningi. Aðildarviðræður eru með áherslu á skilyrði og tímasetningar á innleiðingu umsóknarríkis á ESB gerðum – u.þ.b. 100 000 blaðsíður. Þessar gerðir, betur þekktar sem „acquis“, (franska, og þýðir það sem hefur verið samþykkt) eru ekki umsemjanlegar. Fyrir umsóknarríki snýst þetta fyrst og fremst um að semja um hvernig og hvenær ESB gerðir og starfshættir séu innleiddir.

Af þessu má ljóst vera að viðræður eru ekki samningar í neinum venjulegum skilningi heldur útfærsla á aðlögun umsóknarríkis að Evrópusambandinu.

Ríkisstjórn Íslands er ekki með umboð frá alþingi til að aðlaga stjórnkerfið kröfum Evrópusambandsins. Umsóknina um aðild á að afturkalla.

Aðeins aðlögun að ESB framundan