Ágúst Þór Árnason segir aðildarríki verða að samþykkja ESB eins og það er

Eftir því sem aðildarlöndum ESB hefur fjölgað hefur það orðið ósveigjanlegra gagnvart nýjum aðildarríkjum. Nú verða þau að samþykkja allan laga- og reglupakka ESB áður en þau eru samþykkt sem aðilar. Þetta var hluti þess sem fram kom í máli Ágúst Þórs Árnason, aðjúnkts við lagadeild Háskólans á Akureyri, en hann flutti mjög fróðlegt erindi á aðalfundi Heimssýnar í gærkvöldi. 

 

Þróun ESB breyttist smám saman frá 1972 hvað þetta varðar, eftir að Bretland, Danmörk og Írland gerðust aðilar. Danir og Bretar komust hjá því að taka upp evruna og hið sama gildir reyndar enn um Svía. Nú hins vegar, þegar aðildarríkin eru ekki 6 heldur tæplega 30, verða umsóknarríki að samþykkja þann stofnanapakka sem fyrir hendi er í ESB, þar á meðal að taka upp evru í fyllingu tímans, ef þau vilja á annað borð verða samþykkt sem meðlimir að sambandinu. Ríkin ganga inn í þá stofnun sem ESB er og sú stofnun breytir sér ekki fyrir hvert umsóknarríki.

 

Eftir því sem ríkjunum hefur fjölgað hefur umsóknarferlið breyst þannig að mun erfiðara er að sækja allar hugsanlegar breytingar. Þá má nefna að þeim ríkjum hefur fjölgað sem eru tiltölulega óskyld Íslandi og það dregur úr skilningi með samkennd með íslenskum aðstæðum.

 

Þá nefndi Ágúst svokallaða foraðildarstefnu (preaccession strategy) sem var tekin upp í kjölfar aðildar Svíþjóðar, Finnlands og Austurríkis árið 1994. Ríkin sem koma þar á eftir fá allt aðra meðhöndlun en ríkin sem gerðust aðilar þar á undan. Helsti munurinn er að nú verða aðildarríki að samþykkja allan stofnanapakka ESB eins og hann leggur sig, þar á meðal gjaldmiðilssamstarfið. Ágúst orðaði það þannig að það nálarauga sem aðildarríki verða að komast í gegnum verði sífellt þrengra. 

 

 

 

 

Athugasemdir

[Gunnlaugur I., 10.10.2014 kl. 13:49]

Marg oft höfum við ESB aðildarandstæðingar bent á grófa og áberandi hlutdrægni fréttastofu RÚV og stofnunarinnar allrar, þegar kemur að umfjöllun þeirra um hin viðkvæmu ESB mál.

Þessi hlutdrægni þeirra birtist með ýmsu móti s.s. eins og þeir segja helst aðeins fréttir sem eru ESB og ESB sinnum þóknanlegar. RÚV segir helst ekki frá fréttum sem passa ekki inn í þá mynd eða þeir skekkja fréttir og handvelja vilholla viðmælendur til að fá hinn pólitíska rétttrúnað fram sem þeir hafa velþóknun á.

Það kemur okkur því ekki á óvart að enn hefur RÚV ekki sagt eitt orð frá Aðalfundi Heimssýnar stærstu fjölda samtaka okkar ESB aðildarandstæðinga.

En fjölmennur aðalfundur samtakanna fór fram á Hótel Sögu í gærkvöldi.

Ekkert var sagt frá fundinum í fréttatímum RÚV í gærkvöldi og heldur ekkert á vefmiðlum þeirra eða í morgun- eða hádegisfréttum RÚV nú daginn eftir.

Ekkert talið fréttnæmt um eindregnar ályktanir fundarins eða að samtökin völdu sér nýja forystusveit sem kjörin var á fundinum.

Ekki þótti RÚV heldur neitt fréttnæmt að aðal framsöguerindi fundarins flutti Ágúst Þór Árnason aðjúnkt við lagastofnun Háskólans á Akureyri, en hann var einn af helstu sérfræðingum sem stóðu að skýrslu Hagfræðistofnunar um stöðu ESB umsóknarinnar.

Margt mjög fróðlegt kom fram í máli hans, ýmislegt sem ekki hefur komið jafn skýrt fram áður, eins og hvernig ESB sjálft í raun stöðvaði viðræðuferlið árið 2011 í tíð síðustu ríkisstjórnar. Ágúst Þór hefur ekki fyrr gefið kost á svona opnum fyrirspurnum eins og gert var á fundinum.

Þöggun RÚV af fundinum og því sem þar fór fram er æpandi og enn eitt dæmið um grófa hlutdrægni og þöggun þessa ríkisfjölmiðils á opinni og gagnrýnni umræðu um brennandi mál samtímans.

Það kemur okkur ekki svo mjög á óvart að fréttamiðlar hinnar ESB sinnuðu fjölmiðlasamsteypu 365 hafi líka með öllu hundsað fréttaflutning af fundinum.

En spyrja má hvar erum við stödd í okkar samfélagi, sem við viljum að sé opið og gegnsætt, þegar tveir stærstu fjölmiðlar landsins ganga svona á undan í sniðgöngu og þöggun af málum sem þeim eru ekki þóknanleg.