Einn besti upplýsingavefur um Evrópumál breytir um ásýnd

Evrópuvaktin hefur um árabil verið einn besti upplýsingavefur um Evrópumál og stjórnmál almennt hér á landi. Lesendur vefjarins hafa notið einstakrar reynslu, yfirsýnar, þekkingar og færni þeirra Björns Bjarnasonar og Styrmis Gunnarssonar. Við þessi tímamót er ljóst að fréttir og stjórnmálaskýringar um Evrópumál verða heldur fátæklegri því skarð þeirra Björns og Styrmis í þeim efnum er vandfyllt.  

 

Það er því gott til þess að vita að þeir félagar munu halda Evrópuvaktinni út áfram með skrifum um stjórnmál af fullum krafti þótt dagleg frétta- og leiðaraskrif falli niður. 

 

Evrópuvaktin hættir fréttaskrifum

Hálfvelgja Dana í ESB

Danir eru með hálfum huga í ESB. Þeir vilja ekki evru, þeir vilja ekki evrópskt bankasamband og þeir vilja ekki sameiginlega lögreglu og réttarkerfi.

Í sjónvarpsumræðum frambjóðenda Dana til ESB-þingsins í danska ríkissjónvarpinu í gær tókust á sjónarmið þeirra sem vilja að ESB hafi sem mest að segja yfir dönsku samfélagi og hinna sem vilja halda stjórn Dana á vissum sviðum. Danir eru almennt fremur óánægðir með þá þróun sem á sér stað til yfirþjóðelgrar lögreglu og réttarkerfis. Þeir vilja takmarka áfram möguleika útlendinga á að kaupa upp sumarbústaðasvæði í Danmörku og þeir vilja bíða átekta með þátttöku í bankasambandinu. Fleiri þjóðir hafa lýst því yfir að þær ætli ekki að vera með í bankasambandinu, svo sem Svíar og Bretar.

Það er svo nokkuð skýrt að það er engin hreyfing í þá átt að Danir taki upp evruna þótt þeir fylgi vaxtastefnu Seðlabanka Evrópu eins og skugginn.

Danir vilja halda í ákveðna hluta af sjálfstæði sínu. Ríki sem fara nú inn í ESB hafa ekki sömu möguleika því þau yrðu að taka upp evru og fylgja meginstraumnum í ESB að öðru leyti.