Leita í fréttum mbl.is

Bloggfærslur mánaðarins, desember 2013

Hanna Birna útskýrir ESB-stefnuna fyrir Össuri

HannaBirnaKristjansdottir

Það var merkilegt að fylgjast með samtali Össurar Skarphéðinssonar og Hönnu Birnu Kristjánsdóttur í útvarpsþættinum Á Sprengisandi á Bylgjunni í morgun. Eins og sumir Samfylkingarmenn lét Össur eins og það væri aðalstefnumál stjórnarinnar að efna til þjóðaratkvæðagreiðslu um aðildarviðræður við ESB. Hanna Birna útskýrði fyrir Össuri að það hefði í raun enginn áhuga á ESB lengur.

Hanna Birna áréttaði að ríkisstjórnin, stjórnarflokkarnir og þjóðin álitu ESB ekki vera neina lausn fyrir Íslendinga. Þess vegna hefði verið gert hlé á viðræðunum.

Jafnframt áréttaði Hanna Birna að það yrði undir engum kringumstæðum haldið áfram með viðræðurnar nema að undangenginni þjóðaratkvæðagreiðslu. Það er hins vegar ekkert sem knýr á um áframhaldandi viðræður í ljósi ofanritaðs; stjórnin, stjórnarflokkarnir og þjóðin eru á móti aðild að ESB.

Össur fálmar hins vegar eftir því hálmstrái að fólk trúi því að einhverjir forystumenn Sjálfstæðisflokksins hafi lofað því að halda þjóðaratkvæðagreiðslu um áframhaldandi viðræður um aðild að ESB - hvað sem öðru liði. 

Hanna Birna útskýrði fyrir Össuri að næsta skref væri að kynna þá skýrslu sem ríkisstjórnin hefði beðið Hagfræðistofnun um að gera um gang ESB-viðræðnanna og stöðu og þróun Evrópusambandsins.

Allar skýrslur um málið hafa hingað til undirtrikað m.a. að vegna helstu auðlinda okkar sé ekki hagstætt fyrir Ísland að gerast aðili að ESB. Jafnframt hafa allar marktækar skýrslur undirstrikað að það sé ekki heppilegt fyrir okkur Íslendinga að taka upp evru.

Hin nýja skýrsla Hagfræðistofnunar getur ekki komið með aðra niðurstöðu í þeim efnum.

Það eina nýja sem skýrsla Hagfræðistofnunar getur komið með er það hvernig ESB er að liðast í sundur vegna evru-samvinnunnar þar sem einkum Þjóðverjar hafa til þessa hagnast á kostnað jaðarþjóðanna í suðri. Jafnframt getur skýrslan upplýst með skýrum hætti hvernig fátæktin breiðist út í Evrópu og misskiptingin eykst milli og innan samfélaga vegna evrunnar.

Össur vill ekki heyra neitt nýtt um ESB. Hann vill halda í sína trú.

Kjósendur sýndu í verki í síðustu þingkosningum hvaða skoðun þeir hafa á ESB-trú Össurar og Samfylkingarinnar. ESB-stefna Samfylkingarinnar beið afhroð.


Rekum undanhald ESB í makríldeilunni

Ljóst er af þróun makrílmálsins að ESB hefur farið fram af fádæma frekju. Fyrrverandi sjávarútvegsráðherra, Jón Bjarnason, stóð í lappirnar og þróunin hefur verið með hans sjónarmiðum. Eins og í ýmsum öðrum málum hefur þróunin verið hliðholl ítrustu kröfum Íslendinga. Mikilvægt er að núverandi sjávarútvegsráðherra gæti vel að hagsmunum Íslendinga.

Ný vitneskja um aukna stofnstærð makríls veitir Íslendingum nýja vígstöðu í málinu. Það er ekki lengur ástæða til að sætta sig við aðeins um 12% aflahlutdeild eins stjórnvöld hér virðast hafa verið tilbúin að fallast á. Miklu nær er að miða við kröfu fyrrverandi sjávarútvegsráðherra um 16-17% hlut. 

ESB hefur ekkert umboð til að haga sér með þeim hætti sem það hefur gert í makríldeilunni. Makrílstofninn hefur verið í vexti í íslenskri lögsögu. ESB hefur beitt hótunum og ólögmætm yfirgangi bæði gagnvart Íslendingum og Færeyingum. ESB sækist eftir viðurkenningu sem drottunarþjóð á Norður-Atlantshafi, eins og Jón Bjarnason hefur nefnt.

Íslendingar eiga aldrei að gangast undir slíkt. 

 


mbl.is Mikið ber á milli í makrílnum
Tilkynna um óviðeigandi tengingu við frétt

Lettar vilja ekki sjá evruna - en verða samt

Þjóðir Evrópu eru ekkert sérstaklega hrifnar af evrunni. Það er vegna þess að evran hefur valdið gífurlegum vanda víða í Evrópu. Meirihluti Letta vill nú ekki taka upp evru en þeir verða að gera það samt vegna tíu ára gamalla samninga við ESB.

Eins og fram kemur í fréttinni hafa Lettar þurft að taka á sig launalækkanir til þess að geta tekið upp þennan gjaldmiðil sem þeir vilja helst ekkert hafa með að gera. 


mbl.is Meirihluti Letta vill ekki evruna
Tilkynna um óviðeigandi tengingu við frétt

Kjarninn og ESB

Jólablað Kjarnans, vefrits sem hóf göngu sína á árinu, vekur nokkra athygli. Talsverð vinna liggur í blaðinu sem endranær, en óvíst er með dreifingu nema þegar aðrir miðlar vekja sérstaka athygli á efni eins og Eyjan.is gerir nú. Að þessu sinni sér Eyjan.is ástæðu til að vekja athygli á ESB-skoðunum Þorgerðar Katrínar Gunnarsdóttur fyrrverandi menntamálaráðherra.

Þótt það kenni margra grasa í blaðinu fer ekki hjá því að lesendur velti því fyrir sér að hve miklu leyti skoðanir ritstjórans hafa að segja þegar kemur að umfjöllun um ESB-málin. Hann sá ástæðu til að láta fyrrverandi aðstoðarmann utanríkisráðherra Samfylkingarinnar skrifa sérstaklega um ESB-málin. Ritstjóri Kjarnans, Þórður Snær Júlíusson, var einarður fylgismaður ESB-aðildar og evru-upptöku á meðan hann ritstýrði efnahagsfréttum í Fréttablaðinu svo ekki kemur á óvart að hann skuli vilja halda uppteknum hætti.

Það er annars um ummæli Þorgerðar Katrínar að segja að hún virðist ekki vilja skilja þær samþykktir sem flokkur hennar og Framsóknarflokkurinn gerðu á landsfundi og flokksþingi: Að Ísland ætti ekki heima í ESB og best væri að gera hlé á viðræðum.  Þessi afstaða var tekin upp í ríkisstjórnarsáttmálanum. 

Þegar svo er háttað, að þjóðin er á móti aðild, stjórnarflokkarnir eru á móti aðild og þeir og meirihluti Alþingis vilja ekki halda áfram viðræðum, þá er engin ástæða til að halda áfram viðræðum né að láta kjósa um þær. Stjórnarsamþykktin segir að viðræður verði ekki teknar upp nema að undangenginni þjóðaratkvæðagreiðslu. Þetta er öryggisákvæði, til þess gert að ekki verði farið í viðræður aftur án þess að leitað verði til þjóðarinnar fyrst. Þetta vill hvorki Þorgerður Katrín né aðrir fylgjendur ESB-aðildar skilja.

Þeir halda að umsókn um aðild, sem rann út í sandinn í tíð ríkisstjórnar Vinstri grænna og Samfylkingar, hafi verið til að kíkja í pakkann. Þessir fylgjendur þykjast ekki gera sér grein fyrir því að pakkinn er ESB í heild sinni eins og það er. Pakkinn liggur því þegar fyrir opinn og aðgengilegur öllum sem vilja skoða.  

Þessir fylgjendur ESB-aðildar halda líka að það sé leið til að þoka málinu áfram að, þrátt fyrir að þjóðin sé stöðugt á móti aðild, þá sé hægt að breyta því með því að knýja fram þjóðaratkvæðagreiðslu um hvort halda eigi áfram viðræðum - vitandi að það eru væntanlega fleiri sem eru til að að "kíkja í pakkann" fyrir misskilning - en þeir sem vilja gerast aðilar að ESB.

Þessir klækjatilburðir ESB-aðildarsinna verða varla taldir skynsamlegir né heiðarlegir. 


GLEÐILEG JÓL OG FARSÆLT KOMANDI ÁR

Umsjónarfólk Heimssýnarbloggsins óskar lesendum sínum gleðilegra jóla, ánægjulegra áramóta og farsældar á komandi ári. Við þökkum fyrir samskiptin á árinu sem er að líða.

Umsjónarfólk 


Fjórfrelsið er í hættu í ESB

Fjórfrelsið í Evrópu hefur sína kosti og galla. Það er ekki bara hagsæld sem fylgir því. Afleiðing fjórfrelsins er meðal annars viðskiptamisvægi í álfunni og bankavandræði. Bretar telja einnig að stórstreymi fólks til Bretlands sé ekki að öllu leyti til góðs.

Um þetta er m.a. fjallað á Eyjunni.is.

Þar kemur einnig fram að Cameron forsætisráðherra Breta hóti því að koma í veg fyrir inngöngu nýrra ríkja í Evrópusambandið. Hann segir að stofnendur ESB hafi ekki séð fyrir að aðild nýrra ríkja víða um álfuna myndi leiða til stórfelldra fólksflutninga. Undirliggjandi er sú skoðun að fólk frá fátækustu ríkjunum fylkist til þeirra ríkari sem hafi bestu almannatryggingar.

Talandi um misskilning á heimsmálunum: Skyldu stofnendur ESB hafa misskilið hvað þeir voru að gera? Eða er þetta kannski tómur misskilningur hjá Cameron og breskum stjórnvöldum?

 

Til skýringar: Fjórfrelsið er frjálst flæði vöru, þjónustu, fjármagns og fólks - sjá m.a. skýringu hér

 


Karl Th. Birgisson misskilur Sjálfstæðisflokkinn

Það er greinilegt á ummælum Karls Th. Birgissonar í þættinum Í Vikulokin á RUV í dag að hann misskilur afstöðu Sjálfstæðisflokksins í Evrópumálunum. Landsfundur flokksins ályktaði að Ísland ætti ekki heima í ESB og að gera bæri hlé á viðræðum - og ekki taka þær upp undir nokkrum kringumstæðum nema að undangenginni þjóðaratkvæðagreiðslu.

Karl lætur hins vegar eins og það sé meginstefna Sjálfstæðisflokksins að halda viðræðum áfram. Sjálfstæðisflokkurinn í ríkisstjórn er bundinn af landsfundarsamþykktum sínum og af ríkisstjórnarsáttmálanum sem segir nákvæmlega það sama um stefnuna í ESB-málunum eins og æðstu lýðræðissamkomur Framsóknarflokks og Sjálfstæðisflokks.

Karl Th. Birgisson er fyrrverandi framkvæmdastjóri Samfylkingarinnar. Hann fór í umræðunni í morgun eins og sá orðasmiður sem bjó til hina þrí gildishlöðnu spurningu sem lögð var fyrir Samfylkingarfólkið fyrir 10 árum, en hún var á þessa leið: Vilt þú að Íslendingar skilgreini samningsmarkmið sín, sæki um aðild að ESB og leggi niðurstöður væntanlegra samninga fyrir þjóðina til samþykktar eða synjunar.

Er hægt að treysta fólki sem semur slíkar þrí-gildishlaðnar spurningar fyrir málefnum þjóðarinnar.


Evruríkin fóru illa með írsku þjóðina

Evruríkin fóru illa með írsku þjóðina þegar þau komu í veg fyrir að skuldabréfaeigendur yrðu látnir bera tap af hruni írska bankakerfisins. Þetta er mat Ajay Chopra fyrrverandi aðalfulltrúa Alþjóðagjaldeyrissjóðsins á Írlandi.

Þetta kemur fram í frétt í Morgunblaðinu í dag (bls. 28).

Þar er enn fremur haft eftir Chopra að það hefði verið ósanngjarnt að leggja byrðarnar fyrst og fremst á írska skattgreiðendur á meðan á meðan ótryggðum skuldabréfaeigendum hefði verið bjargað.  Þetta auki skuldir ríkisins og valdi pólitískum vandamálum. 

Frétt Morgunblaðsins byggir á viðtali Financial Times við Chopra. 


Framleiðsla á mann hér um 15% meiri en að meðaltali í Evrópu

Þrátt fyrir fjarlægð frá mörkuðum, dreifða byggð og fámennið hér á landi er framleiðsla á mann með því mesta í heiminum. Framleiðsla á mann er að meðaltali um 15% meiri en í Evrópu.

VB.is segir svo frá:

 

Árið 2012 var verg landsframleiðsla (VLF) á mann í Lúxemborg, mælt á jafnvirðisgengi, tvisvar sinnum hærri en meðal landsframleiðslan á mann í Evrópu.

Sker landið sig talsvert mikið úr hvað varðar landsframleiðsluna, en í næstu sætum á eftir má finna Noreg, þar sem VLF á mann mældist 95% hærri en í Evrópu að meðaltali, og Sviss þar sem hún var tæplega 60% hærri en í öðrum löndum Evrópu. Samkvæmt útreikningum Eurostat var landsframleiðsla á mann á Íslandi í fyrra um 15% hærri en meðaltal Evrópulandanna segir til um, sem er óbreytt niðurstaða frá því í fyrra og árið 2010.

Ísland er þvi í 11. sæti á lista yfir mestu landsframleiðsluna á mann í Evrópu, og deilir sætinu með Finnlandi. Svíþjóð og Danmörk deila sjöunda sætinu á listanum, þar sem framleiðsla á mann mælist rúmlega fjórðungi hærri en að meðaltali á mann í Evrópu. 


Sundrung í ESB dregur úr lánshæfi sambandsins

Samstaða um aðgerðir innan ESB er ekki nægileg að mati lánshæfismatsfyrirtækja til að viðhalda góðri einkunn sambandsins. Enn fremur dregur umræða um úrsögn Bretlands úr styrk ESB.

Mbl.is greinir frá þessu:

 

Matsfyrirtækið Standard and Poor's hefur lækkað lánshæfiseinkunn Evrópusambandsins úr AAA í AA+. Ástæðan er meiri sundrung, þar á meðal þjóðaratkvæðagreiðsla Breta um aðild og fjárlagagerð.

Samkvæmt tilkynningu S&P eru horfur hins vegar stöðugar og einkunnir einstakra ríkja óbreyttir.

Undanfarin fimm ár hefur ESB og evruríkin sautján þurft að koma einstökum ríkjum ESB til bjargar og eins hafa róttækar breytingar verið gerðar á stofnunum ESB til þess að koma í veg fyrir upplausn innan sambandsins. 


mbl.is Lánshæfiseinkunn ESB lækkuð
Tilkynna um óviðeigandi tengingu við frétt

Næsta síða »

Heimssýn

Heimssýn

hreyfing sjálfstæðissinna í Evrópumálum, eru þverpólitísk samtök þeirra sem telja hagsmunum Íslendinga best borgið með því að halda áfram að vera sjálfstæð þjóð utan Evrópusambandsins.

 

Sími 895 5334 (Haraldur Ólafsson, formaður)


Nánar um Heimssýn

Vertu með!

Frjáls framlög

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 91
  • Sl. sólarhring: 426
  • Sl. viku: 1948
  • Frá upphafi: 1109236

Annað

  • Innlit í dag: 82
  • Innlit sl. viku: 1693
  • Gestir í dag: 81
  • IP-tölur í dag: 81

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband