ESB stillti Írum upp við vegg

 

 

 

 

 

 

 

 

Birting bréfa á milli fjármálaráðherra Íra og bankastjóra Seðlabanka Evrópu sýna að bankinn og framkvæmdastjórn ESB þvinguðu Íra til að beita harkalegum aðhaldsaðgerðum í kjölfar evrukreppunnar. Breska stórblaðið Financial Times túlkar bréfin á þá lund að Írum hafi í raun verið stillt upp við vegg.

Ýmsir hafa lengi reynt að fá birt bréfin sem gengu á milli Trichet seðlabankastjóra og Lenihan, fjármálaráðherra Íra, síðla árs 2010. Þeirri skoðun hefur vaxið fylgi á Írlandi að Trichet bankastjóri hafi í raun þvingað Írum inn í björgunaraðgerðaprógram Seðlabanka Evrópu og ESB en afleiðingar þess voru að Írar urðu að samþykkja kröfur um harkalegan niðurskurð. 

Financial Times greinir frá þessu. Sjá einnig The Irish Times. Fram hefur komið að seðlabankastjóri ECB og forystumenn ESB reyndu með svipuðum hætti að þvinga Ítulum og Spánverjum út í svipaðar aðgerðir. Dæmi um viðbrögð á Írlandi er það sem segir í vefmiðlinum Infowars.com: Fyrrum stjóri ECB þvingaði Írum út í harkalegar aðhaldsaðgerðir: Trichet hélt hlaðinni byssu að höfði þeirra.

Í bréfinu sem nú hefur verið gert opinbert segir Trichet seðlabankastjóri 19. nóvember 2010 að Írar fái áframhaldandi stuðning aðeins ef ríkisstjórn Írlands fallist á skilyrði ESB um frekari stuðning, en þau skilyrði kváðu á um harkalegan niðurskurð í opinberum rekstri og gjörbreytingu á bankakerfinu. 

Fram hefur komið að nokkrir fulltrúar í stjórn Seðlabanka Evrópu voru mjög ósammála og ósáttir við þessi vinnubrögð bankans og sögðu þau til marks um óeðlieg afskipti bankans af innanríkismálum aðildarríkja, og ennfremur að þeim aðgerðum sem bankinn krafðist ætti að ráða til lykta með lýðræðislegum hætti en ekki með bankatilskipun. Þýski fulltrúinn Jurgen Stark er sagður hafa tilkynnt Trichet seðlabankastjóra að hann myndi hætta í framkvæmdastjórn Seðlabanka Evrópu vegna þessara vinnubragða.

Talið er að aðgerðirnar hafi kostað skattgreiðendur á Írlandi sem svarar um tíu þúsund milljörðum króna.

Sjá hér einnig upplýsingar á vef Seðlabanka Evrópu.

 

 

Sjálfstæðisflokkurinn er grjótharður á móti aðild að ESB

Stefna Sjálfstæðisflokksins er sú að best sé fyrir Íslendinga að vera utan ESB. Það var síðast áréttað af flokksráði Sjálfstæðisflokksins nýverið.

Hjörtur J. Guðmundsson blaðamaður ritar um stöðu flokksins í þessu máli og eru skrif hans birt í Morgunblaðinu í dag. Grein Hjartar eru endurbirt hér. Heiti greinarinnar er Stefnan er skýr:

 

 

Flokksráð Sjálfstæðisflokksins samþykkti á dögunum ályktun þar sem ítrekuð er andstaða flokksins við inngöngu í Evrópusambandið líkt og áður. Ennfremur var áréttað að viðræðum um inngöngu í sambandið hefði verið hætt á síðasta ári og engin áform væru um að taka þær upp að nýju. Einhverjir hafa gagnrýnt að ekki sé kveðið á um það með beinum hætti að draga eigi umsókn Íslands að Evrópusambandinu til baka. Það er skiljanlegt en hins vegar er slíkt orðalag með öllu óþarft.

Fyrir því er einföld ástæða. Ekki þarf annað að koma fram en að Sjálfstæðisflokkurinn sé andvígur inngöngu í sambandið enda felur það orðalag vitanlega um leið í sér andstöðu við það að tekin verði skref í þá átt og ennfremur að slík skref sem kunna að hafa verið tekin verði stigin til baka. Þannig hefur stefna Sjálfstæðisflokksins í Evrópumálum ætíð verið. Einfaldlega hefur verið tekið fram að flokkurinn sé andvígur því að gengið sé í Evrópusambandið. Engum datt í hug að þar með gæti Sjálfstæðisflokkurinn eftir sem áður staðið að umsókn um inngöngu í sambandið. Ekki einu sinni hörðustu stuðningsmönnum þess.

Sama var að segja um Vinstrihreyfinguna - grænt framboð áður en flokkurinn settist í ríkisstjórn árið 2009, seldi stefnu sína í Evrópumálum fyrir ráðherrastóla og gerði að sínum þann málflutning að einhvern veginn væri hægt að vera andvígur því að ganga í Evrópusambandið en samt standa að umsókn um inngöngu í þetta sama samband. Málflutning sem forystumenn VG höfðu áður margítrekað hafnað. Eðli málsins samkvæmt.

Sjálfstæðisflokkurinn hefur ekki tekið þátt í þeim blekkingarleik sem á upphaf sitt í þeirri niðurstöðu stuðningsmanna inngöngu í Evrópusambandið fyrir um það bil 15 árum síðan að líklega tækizt aldrei að tryggja nægjanlegan stuðning á meðal þjóðarinnar við inngöngu í sambandið. Meiri líkur væru á því að hnika málinu áfram ef hægt yrði að samfæra nógu marga um að umsókn um inngöngu í Evrópusambandið og eiginleg innganga væri tvennt ólíkt. Þaðan kom síðan orðalagið um að kíkja í pakkann, pakka sem alltaf hefur verið opinn, sem og skoðanakannanir þar sem sérstaklega hefur verið spurt um afstöðuna til umsóknar eða aðildarviðræðna.

Skemmst er frá því að segja að slíkar skoðanakannanir þekkjast hvergi nema hér á landi. Þannig er aldrei spurt um annað í Noregi en afstöðu fólks til inngöngu í Evrópusambandið. Enda líta Norðmenn svo á, rétt eins og sambandið sjálft, að umsókn um inngöngu feli í sér yfirlýsingu um að ætlunin sé að ganga þar inn. Þar er ekkert til sem heitir að kíkja í pakkann.

Sjálfstæðisflokknum er þannig nákvæmlega ekkert að vanbúnaði að standa að því að umsóknin um inngöngu í Evrópusambandið verði dregin til baka. Stefnan er skýr, inngöngu er hafnað.