Reiður Cameron rauk inn á ESB-fund

David Cameron, forsætisráðherra Breta, er reiður þessa dagana yfir þróuninni í ESB og það var greinilegt að reiðin var ekki úr honum rokin er hann fór í hálfgerðu fússi inn á fund  ESB-toppanna í dag, svo sem sjá má í sjónvarpsfréttum BBC.

Cameron hefur verið skilinn eftir úti á berangri af leiðtogum Þýskalands, Svíþjóðar og Hollands sem gáfu honum vilyrði um stuðning gegn útnefningu Junckers í stöðu forseta framkvæmdastjórnar ESB. Fyrir vikið vex óánægjan í Bretlandi með ESB.

Í sama fréttatíma og BBC sýndi reiðan Cameron rjúka inn á ESB-fundinn var frétt um að mesta áhyggjuefni Breta þessa dagana væri frjáls för fólks í ESB. Tekið var fram að þetta væri í fyrsta skipti í langan tíma sem efnahagsmálin væru ekki aðaláhyggjuefni Bretanna. Jafnframt kemur fram í breskum miðlum að óánægja hafi aukist með þá spennu sem fjölmenningarsamfélagið skapar.

Á sama tíma eykst þeim máttur í Bretlandi sem gagnrýna ESB harðlega. Sem dæmi um það eru skrif fréttaskýrandans Leo McKinstry í Daily Express í gær. Þar segir McKinstry að Juncker, næsti æðstráðandi ESB, sé fanatískur federalisti sem hafi verið einn af arkítektum evrusvæðisins, sem vilji að ESB hafi eigið dómsvald, her, lögreglu og skattakerfi. Hann hafi jafnvel mælt fyrir því að þegnar ólíkra landa fengju að kjósa í kosningum hverjir hjá öðrum (ekki er ljóst hvort hann hafi átt hugmyndina að því að landslið ESB-landa væru með ESB-fánann í barminum - kannski eins gott að ekki varð úr því miðað við frammistöðu sumra Evrópuliða á HM núna ...).

Annars segir McKinsey í grein sinni í Daily Express í gær að landamæraeftirlit sé í molum í Bretlandi vegna ESB með þeim afleiðingum að innflutningur fólks hafi aukist verulega. Um eitt hundrað þúsund manns komu þannig til London á síðasta ári. Komið hefur fram að margt af þessu fólki hefur komið með ólöglegum hætti sem stúdentar, en af allri mannfjölgun í Bretlandi síðasta árið hefur um helmingur, eða tvö hundruð þúsund, verið vegna innflutnings. Nú sé svo komið að Bretland sé að verða útnára í ESB.

Með þessari frásögn er ekki verið að taka undir sjónarmið McKinsey heldur reyna að lýsa því hvernig umræðan er í Bretlandi. Hann segir að reglur ESB hafi gert það að verkum að verið sé að eyðileggja bresk þjóðareinkenni en skapa ein einkenni fyrir allt ESB, auk þess sem verið sé að íþyngja verulega ýmsum samfélagsstofnunum. Hann minnir á að í Ungverjalandi sé ríkisborgararéttur seldur og að frá 2011 hafi meira en hálf milljón manna keypt ríkisborgararétt í ESB og hafi þar með fengið frjálsan aðgang að öllum ESB löndum og flestir kjósi að leita til Bretlands.

Pistlahöfundurinn segir málamyndagiftingar hafa aukist í þeim tilgangi að fólk geti sest að í Bretlandi. Alls hafi 9.100 slík brúðkaup verið tilkynnt á síðasta ári. Þar á meðal voru hjónabönd kvenna í Búlgaríu sem fluttust til Bretlands til þess eins að ganga í málamyndahjónaband við Pakistana í Bretlandi.

Svona er umræðan í Bretlandi. Kannski má ekki segja frá eða ræða svona hluti annars staðar.

Alltént þykir þessum ívitnaða pistlahöfundi að Juncker og aðrir af því tagi vilji eyða öllum sérkennum Evrópuþjóða og búa til nýja þjóð sambandsríkis ESB.

Þannig er nú það. Og þess vegna vann UKIP kosningarnar í Bretlandi í vor og þess vegna eru Bretar, eins og staðan er nú, á leið út úr ESB.