Haraldur Ólafsson kjörinn formaður Heimssýnar

Haraldur Ólafsson prófessor var í kvöld kjörinn formaður Heimssýnar á aðalfundi félagsins sem var haldinn á Hótel Sögu í Reykjavík. Haraldur tekur við formennsku af Ernu Bjarnadóttur sem verið hefur formaður síðastliðið ár, en hún var áður gjaldkeri félagsins og í framkvæmdastjórn til nokkurra ára. Á aðalfundinum í kvöld voru samþykktar ályktanir sem nánar verður greint frá síðar, auk þess sem Kathrine Kleveland, formaður Nei til EU í Noregi, flutti stórfróðlegt erindi um það hvernig EES-samningurinn dregur smám saman úr fullveldi Noregs ef ekki er spyrnt við fótum. Um þessar mundir snýst baráttan um að halda orkumálum utan áhrifasviðs EES og ESB, sem er nokkuð sem fremur lítið hefur verið rætt hér á landi til þessa. 

Meðfylgjandi myndir voru teknar á aðalfundinum í kvöld. Á efstu myndinni eru Haraldur Ólafsson, nýkjörinn formaður Heimssýnar og Kathrine Kleveland, formaður norsku samtakanna Nei til EU. Á næstu mynd er Erna Bjarnadóttir, fráfarandi formaður Heimssýnar, Kathrine Kleveland og Haraldur Ólafsson. Á þriðju myndinni má sjá Frosta Sigurjónsson, fyrrverandi þingmann, í ræðustól á fundinum.

 

 

Athugasemdir

[Valdimar Samúelsson, 1.3.2018 kl. 22:33]

 Vona að það hafi verið hlustað á Kathrine Kleveland, formaður Nei til EU í Noregi. Það er komin tími á að gera einhvað í þessum málum.

[Helga Kristjánsdóttir, 1.3.2018 kl. 23:44]

Tek undir það Valdimar.

[Gunnar Heiðarsson, 2.3.2018 kl. 04:53]

Ekki er að finna í neinum fjölmiðli frétt af fundinum eða erindi Katherine Kleveland! Voru fjölmiðlar ekki boðaðir á fundinn? Eða eru samantekin ráð hjá þeim að fjalla ekkert um erindi Katherine?

[Erna Bjarnadóttir, 2.3.2018 kl. 11:55]

Fréttatilkynning um fundinn var send á fjölmiðla og hátt í heilsíðu viðtal við Kathrine Kleveland í Morgunblaðinu í gær.