Guðmundur Ásgeirsson bendir réttilega

á að stjórnarskráin segir að Alþingi eigi að annast lagasetningu.  Það samræmist vitaskuld ekki stjórnarskránni að framselja það vald, hvort sem er til embættismanna Evrópusambandsins eða bæjarstjórans í Kardimommubæ. 

Það gekk treglega að skipta um stjórnaskrá um árið, meðal annars vegna þess að drög að nýrri stjórnarskrá auðvelduðu að koma valdinu úr landi.  Margir hafa lítið á móti því að hinir og þessir eigi "viðræður" við hina og þessa, en eru nógu vel að sér í mannkynssögu til að gjalda varhug við að færa stjórnvaldið til gömlu evrópsku nýlenduveldanna. 

 

Orðrétt segir Guðmundur á blogginu í gær:

Það er vitleysa að tala um þjóðaratkvæðagreiðslu um að fara í "viðræður" þegar staðreyndin er sú að það er ekkert umsemjanlegt. Ákvörðunin getur ekki snúist um neitt annað en hvort sækja eigi um aðild og undirgangast þar með sáttmála ESB, eða ekki. Svarmöguleikarnir eru einfaldlega já eða nei.

Svo er annað sem talsmenn fyrir aðild(arviðræðum) minnast aldrei á. Það er sú staðreynd að stjórnarskráin heimilar engum öðrum en Alþingi og forseta Íslands að fara með löggjafarvaldið, sem þýðir að stjórnarskráin bannar í reynd aðild að ESB.

Enn fremur skal sérhver nýr þingmaður vinna drengskaparheit að stjórnarskránni samkvæmt 47. gr. hennar. Hafandi gert það má þingmaður ekki aðhafast neitt í störfum sínum sem brýtur gegn því drengskaparheiti enda yrði hann þá brotlegur við stjórnarskránna. Þess vegna er þingmönnum beinlínis óheimilt að vinna að því að gera Ísland að aðildarríki ESB með framsali löggjafarvalds sem bryti í bága við 2. gr. stjórnarskrár.

Samt tala sumir þingmenn fyrir slíku og gerast þá brotlegir við drengskaparheit sitt, sem ætti að hafa þær afleiðingar að þeir skyldu afsala sér þingmennsku. Að öðrum kosti er það merkingarlaus athöfn að undirrita drengskaparheitið.

Höfundar stjórnarskrárinnar voru afar snjallir þegar þeir byggðu þennan varnagla inn í hana, en því miður virðist skorta nokkuð á að honum sé sýnd tilhlýðileg virðing.

 

Lýðræðisleg leið til afnáms lýðræðis

Víðir Reynisson, Samfylkingarmaður og Pawel Bartoszek, Viðreisnarmaður, ræða við Stefán Einar í Spursmálum.  Þeir slá úr og í þegar kemur að framsali á ríkisvaldi til Evrópusambandsins.  Þó er ljóst að þeim finnst viðeigandi að halda þjóðaratkvæðagreiðslu á næsta kjörtímabili. 

Svona sjá menn það ferli fyrir sér:  Þjóðaratkvæðagreiðsla er haldin um "viðræður".  Hver er svosem á móti viðræðum?   Í kjölfarið óskar ríkisstjórn Samfylkingar og Viðreisnar eftir aðild Íslands að Evrópusambandinu og í gang fer ferli sem miðar ákveðið að aðild og felst aðallega í breytingum á lögum Íslands til samræmis við óskir Evrópusambandsins.  Þessi lög eru samin af Evrópusambandinu og eru óumsemjanleg, eins og Evrópusambandið sjálft hefur margsinnis bent á. 

Allt fer svo í uppnám á Íslandi þegar kjósendur átta sig á því að þeir hafa verið blekktir, ef ekki fyrr. 

 

https://www.mbl.is/frettir/innlent/2024/11/07/munu_skattleggja_hargreidslufolk_smidi_og_pipara/

 

(Viðtalið í heild sinni er neðarlega í greininni)

Raunvextir húsnæðislána í Bandaríkjunum á svipuðu róli og á Íslandi

Fram hefur komið að Bandaríkjmenn hafa kosið sér forseta og þingmenn. Einhverjum þykir það ástæða til að biðja um að stjórnvald á Íslandi færist óafturkræft til Brussel.  Erfitt er að skilja það samhengi, enda líklega ekki ætlast til þess að það sé reynt.

Það er á hinn bóginn tilvalið að kanna vaxtamál í BNA.  Sumir telja að verð á lánsfjármagni á Íslandi sé hátt vegna þess að fáir nota íslenska krónu.  Mjög margir nota bandarískan dal. Lítum á kjörin í þeirri sveit:

Verðbólga í BNA er um 2,4%.  Hún er dálítið misjöfn eftir ríkjum, en við fáumst ekki um það. 

Vextir húsnæðislána í þremur flokkum, eftir binditíma eru frá 5,9% upp í 6,9%.  Ekki er getið um veðhlutfall í heimildinni sem að baki liggur sem er hér:

https://money.usnews.com/loans/rates/mortgages/mortgage-rates

Miðað við þessar tölur eru meðalraunvextir á húsnæðislánum í BNA um þessar mundir 3,4%-4,4%. 

Til samanburðar eru vextir á verðtryggðum húsnæðislánum á Íslandi hér: 

https://aurbjorg.is/samanburdur/husnaedislan

Niðurstaðan er í stuttu máli að raunvextir á húsnæðislánum í Bandaríkjunum eru á svipuðu róli og á Íslandi. 

 

Þessi niðurstaða fellur illa að kenningunni um að lítið myntsvæði leiði sjálfkrafa til hárra vaxta, enda líklega aldrei ætlast til þess að neinn græfist fyrir um sannleiksgildi hennar. 

 

 

Raunvextir í Bretlandi á svipuðu róli og á Íslandi

Vaxtaspjall Heimssýnar var ekki fyrr komið í loftið en mbl.is birti vaxta- og verðbólgufréttir frá Bretlandi.  Þar er verðbólgan nú 1,7%. 

https://www.mbl.is/vidskipti/frettir/2024/11/07/laekka_styrivexti_i_annad_sinn_a_arinu/

 

Nýleg grein um húsnæðisvexti í Bretlandssveit er hér:

https://www.rightmove.co.uk/news/articles/property-news/current-uk-mortgage-rates/#:~:text=The%20average%20rate%20for%20a,both%20unchanged%20from%20last%20week.

Þar segir að meðaltal vaxta af íbúðalánum í Bretlandi sé frá 4 upp í 5,6%.  Veðhlutfall og binditími vaxta eru þar breytistærðir.  Það gefur raunvexti í Bretlandi frá 2,2 upp í 3,8%. 

 

Aurbjörg heitir vefur sem sýnir vaxtakjör íbúðalána á Íslandi.  Hann er hér:

https://aurbjorg.is/samanburdur/husnaedislan

Lægstu vextir á verðtryggðum lánum (sem segja má að séu raunvextir) eru þar 3,04% og margir sjóðir bjóða lán með 3-4% vöxtum.

 

Niðurstaðan er skýr:  Raunvextir á húsnæðislánum í Bretlandi eru á svipuðu róli og á Íslandi

  

 

 

Vaxtavitleysa

Það er alkunna að raunvextir eru betri mælikvarði en nafnvextir á verð á lánsfjármagni. 

Í daglegu tali má segja að raunvextir séu vextir umfram verðbólgu. Ekki er alveg vandalaust að reikna raunvexti, því það má mæla verðbólgu með ýmsum hætti. Ólíkar aðferðir leiða þó oftast til svipaðrar niðurstöðu. 

Raunvextir eru oft á svipuðu róli á Íslandi og víða í Evrópu, en stundum lítið eitt hærri á Íslandi. Stutt ferð um vefinn sýnir að raunvextir á húsnæðislánum í Eistlandi og í Króatíu eru 2-3 %.  Íbúðlalánasjóður býður lán með 4% raunvöxtum.  Raunvextir eru með öðrum orðum 1-2 prósentustigum hærri í fyrrnefndum 2 Evrópulöndum en hjá Íbúðalánasjóði á Íslandi.  Það er vissulega nokkur munur en vísbendingar eru um að hann muni minnka fljótlega. 

Þessi 1-2 prósentustiga munur er ekki í neinu samræmi við umræðu sem byggir á nafnvöxtum og stundum líka á frjálslegri meðferð talna.  Sú umræða miðar að því að sannfæra einhverja um að þeir fái hestburð af ódýrum peningum, bara ef þeir fá nýjan gjaldmiðil. 

Það er í stuttu máli tóm vitleysa.   

Er stefnan eintóm blekking?

Sósíalistaflokkur Íslands hefur birt stefnu sína.  Hún er í mörgum köflum og í hverjum kafla eru fjölmargir liðir.  Sumir þættir í stefnunni stangast á við stefnu Evrópusambandsins og aðrir eru þess eðlis að þeim verður ekki komið í framkvæmd, nema Evrópusambandið vilji það, ef Ísland gengur í Evrópusambandið. 

Engu að siður er ekki stafkrókur um samband Íslands við Evrópusambandið í annars langri stefnu sem meðal annars fjallar um utanríkismál, lýðræði og auðlindir.

Að minnsta kosti tveir frambjóðendur sósíalista hafa séð sig knúna til að skrifa í blöðin til að biðja um að Ísland verði innlimað í Evrópusambandið.  Ef þeim verður að ósk sinni þarf ekki fara í grafgötur um hverju þeir munu svara þegar spurt verður hvers vegna stefnunni sé ekki fylgt:  "Evrópusambandið bannar það, við getum ekkert gert".  

 

Um hvað snýst málið?

Það er háttur sumra að hrópa "Ég vil líka" í hvert sinn þegar þeir sjá eitthvað sem þeim líkar vel í Evrópusambandinu.  Einn daginn er það ódýr brauðbiti í Grikklandi og annan daginn ódýr vínsopi í Portúgal.  Viljinn stendur vitaskuld til brauðsins og vínsins, ekki til þess að vinna fyrir laun bakarans og víngerðarmannsins í þessum löndum. Þó er þarna órjúfanlegt samhengi á milli.  

Aðild að Evrópusambandi snýst um hvernig eigi að velja þá sem ráða.  Á að gera það með kosningum öðru hverju, eða á að fela valdið í hendur nafnlausra manna í útlöndum sem eiga nákvæmlega ekkert undir vilja kjósenda á Íslandi og þurfa aldrei að skila því aftur.  

Hjörtur ræðir ýmis grundvallaratriði í nýrri grein á Vísi.  Hann segir m.a. réttilega:

Kæmi til þess að Ísland gengi í Evrópusambandið yrði vægi landsins þegar ákvarðanir væru teknar í ráðherraráði sambandsins, sem gjarnan er talið vera valdamesta stofnun þess, allajafna einungis um 0,08%

 

https://www.fullveldi.is/?p=10867

Á Seltjarnarnesi

verður fundað kl. 20 á mánudagskvöld.  Félagið heitir Frelsi og fullveldi og ekki ómerkari menn en sr. Geir í Reykholti og sr. Halldór í Holti tala fyrstir.  

Þar verður nú varla töluð vitleysan.

 

https://www.facebook.com/frelsiogfullveldi