Heimssýn á Fasbók

Heimssýn hvetur landsmenn alla, til sjávar og sveita, að fylgja félaginu á nýjum stað á Fasbókinni, en hann er hér: 

https://www.facebook.com/groups/heimssyn

 

Evrópusambandið sendir meira púður og fleiri byssukúlur á vígvöllinn

Ekki er langt síðan áhugamenn um innlimun Íslands í Evrópusambandið sóru og sárt við lögðu að ekkert væri fjarri sanni en að Evrópusambandið hygði á hernað eða yrði einhvers konar hernaðarbandalag.  Fjöldi fólks trúði því í alvöru. 

Nú kaupir Evrópusambandið púður og byssukúlur fyrir stjarnfræðilega háar upphæðir og sendir allt austureftir þar sem ungir menn eru neyddir í veg fyrir rússneskar fallbyssur í von um að geta drepið einn Rússa eða tvo áður en þeir eru sjálfir sprengdir í tætlur. 

Hlutverk Íslendinga er að reyna að fá þetta fólk til að róa sig, en að gæta þess, nú sem endranær, að þetta óróalið fái ekki meiri völd á Íslandi en það hefur nú þegar. 

https://kyivindependent.com/news-feed/eu-ministers-agree-to-provide-ukraine-with-1-billion-euros-in-immediate-military-aid

Erlent ríkjasamband á að ráða

Í svokölluðum lýðræðisríkjum sem eru fullvalda eru lög sett af fólki sem til þess er kjörið af fólkinu í viðkomandi ríki.  Það fyrirkomulag er auðvitað umdeilanlegt, en ekki hefur tekist að finna annað betra. 

Nú er í undirbúningi að hnykkja á forgangi laga sem koma í pósti frá útlöndum. Skiptir þá engu hvort þau lög henti Íslandi og Íslendingum, eða ekki.  

Er ekki tímabært að endurskoða þetta undarlega fyrirkomulag?

 

 

Mál nr. 27/2023:

„Drög að frumvarpi til laga um breytingu á lögum um Evrópska efnahagssvæðið nr. 2/1993, með síðari breytingum (bókun 35)“.

„Með frumvarpinu er lagt til að sett verði ný 4. gr., til viðbótar 3. gr. laga um Evrópska efnahagssvæðið nr. 2/1993, þess efnis að þegar lagaákvæði sem réttilega innleiðir skýra og óskilyrta reglu á grundvelli EES-samningsins er ósamrýmanlegt öðru almennu lagaákvæði skuli hið fyrrnefnda ganga framar."

EES sem viðskiptahindrun

Margir sáu EES-samninginn sem leið til frjálsari viðskipta, en íþyngjandi reglur Evrópusambandsins sem berast til Íslands með EES-samningnum virka oft á tíðum sem viðskiptahindrun.  Hjörtur J. Guðmundsson fer yfir málið með skilmerkilegum hætti, eins og honum er vant, í grein í Innherja.  Hjörtur bendir á leiðina til ljóssins: 

Hins vegar er leið út úr þessum aðstæðum. Leið sem ríki heimsins kjósa allajafna að fara þegar þau semja um milliríkjaviðskipti og þar á meðal stærstu efnahagsveldin með sína miklu viðskiptahagsmuni. Þar með talið Evrópusambandið. Víðtækur fríverzlunarsamningur. 

https://www.visir.is/g/20232385923d/minna-svigrum-til-vidskiptasamninga?fbclid=IwAR2_E9MSJ44Q5AtB4SJ94seLX8OZhWAEtEwfdVhDzIp9HXkraZU-H4dWoyU

Þarf keisarinn að rífa af sér hárið líka?

Það verður sífellt óþægilegra, en um leið skýrara, að lög á Íslandi eru sett af öðrum en þeim sem til þess voru kjörnir af fólkinu í landinu. Þau eru samin af fólki sem guð má vita hver valdi í fjarlægu landi og tilviljun ein ræður því hvort lögin eru til þess fallin að rækta sem best mannlíf á Íslandi.

Arnar Þór Jónsson hefur margsinnis bent á að keisarinn sé orðinn afar klæðalítill og bætir í með góðri færslu hér:

https://arnarthorjonsson.blog.is/blog/arnarthorjonsson/entry/2287731/

Löggjafinn í Evrópusambandinu vill leggja himinhá gjöld á atvinnulíf á Íslandi, gjöld sem undirstöðugreinar atvinnulífs í öðrum löndum Evrópu munu að mestu leyti sleppa við, af þeirri einföldu ástæðu atvinnulífið er öðruvísi en á Íslandi og ferðin til útlanda styttri. 

Hversu hár skyldi skatturinn þurfa að vera til að Íslendingar ranki við sér og taki þessa skrýtnu skepnu, EES, til endurskoðunar?

 

 

Borgaðu bara og brostu

 

Það er kunnara en frá þurfi að segja að stórríki vantar sífellt meiri peninga.  Það þarf að reisa hallir, halda veislur og smíða skriðdreka, svo fátt eitt sé nefnt.  Forsvarsmenn Evrópusambandsins hafa lengi kvartað yfir því hversu lítið svigrúm þeir hafa til að skattleggja þegna sambandsins.  Svo virðist sem svigrúmið sé heldur að aukast, því uppi eru áform um að skattleggja ferðalög.  Ferðamenn sem koma frá Bretlandi og öðrum löndum utan Schengen skulu fá að borga og eins verður lagður hár skattur á eldsneyti flugvéla, sem allir sem fljúga til Íslands, munu þurfa að borga. 

Skattar þessir munu leggjast margfalt þyngra á íslenskt samfélag, en samfélög Mið-Evrópu.  „Íslandsskattur“ væri því réttnefni og minnir hann á þá tíma þegar Danakóngur skattlagði einokunarverslun við Ísland á 18. öld.   Ekkert er nýtt undir sólinni.

Arnar Þór Jónsson ræðir málið og flýgur hærra en venjan er í íslenskri stjórnmálaumræðu.  Það er ekki nýtt þegar hann á í hlut og ástæða til að leggja við hlustir.

 https://arnarthorjonsson.blog.is/blog/arnarthorjonsson/entry/2287689/

 

Fylgið við aðild að Evrópusambandinu sígur jafnt og þétt

Innrás Rússa í Úkraínu kom ýmsum í opna skjöldu.  Við slíkar annarlegar aðstæður getur fylgi við innlimun Íslands í Evrópusambandið sveiflast hratt, en fullvíst má telja að það sæki í hið sígilda far innan tíðar; að stór meirihluti Íslendinga kæri sig ekki um að vera þegnar í stórveldi gömlu evrópsku nýlenduveldanna.   

Svona sveiflur minna okkur á að það væri mjög óeðlilegt að láta atkvæðagreiðslu við annarlegar aðstæðum ráða örlögum lýðræðis á Íslandi. 

 

Hjörtur ræðir fylgið á visir.is

 

https://www.visir.is/g/20232379681d/dvinandi-studningur-vid-inngongu-i-esb

Herveldið sem er alls ekki herveldi, en langar til þess

Margir muna þegar ákafamenn um innlimun Íslands í Evrópusambandið sóru og sárt við lögðu að bandalagið væri alls ekki herveldi, ætti enga fallbyssu og að hún væri auk þess ryðguð. Nú hefur komið á daginn að bandalagið er á bólakafi í styrjöld og á færri fallbyssur en leiðtogar þess mundu vilja. En það vantar ekki viljann til að vera með í þeim leik sem Evrópumenn hafa stundað lengur en heimildir eru um, á kostnað almennings. 

Haraldur Ólafsson ræðir þessi mál á Vísi (visir.is). Þar segir m.a.:

Að þessu sinni taka flest ríki Evrópu þátt og Evrópusambandið að auki, enda er annar stríðsaðilinn á hraðri leið þar inn. Það er sérlega eftirtektarvert, vegna þess að aðeins örfá ár eru síðan ákafamenn um að Íslendingar yrðu þegnar í Evrópusambandinu sóru við æru sína og ömmu, að það samband væri allt annað en hernaðarbandalag.

https://www.visir.is/g/20232377461d/birtingar-mynd-sturlunar

Samviska þjóðarinnar kveður sér hljóðs

Fjölmiðlun á Íslandi á undir högg að sækja.  Krónunum sem til skiptanna eru fækkar, hvort heldur er í formi auglýsinga, sem margar fara til erlendra samfélagsmiðla, eða í formi áskriftargjalda sem sífellt færri vilja greiða.  

Það er því gleðilefni að nýr fjölmiðill eða pistlasmiðja hefur litið dagsins ljós.  Þar skrifar hinn þekkti fullveldissinni Arnar Þór Jónsson fv. dómari.  Arnar Þór segir m.a. í fyrsta pistlinum sem út kom 22. janúar sl.:

Þjóð sem sættir sig við að fá lög send í pósti og að löggjafarsamkoman umbreytist í leikhús getur ekki kvartað þegar hún vaknar upp við það að lögin eru orðin að barefli sem notað er gegn henni sjálfri.

Því skal spáð að eftir mörg ár munu menn segja að penni Arnars Þórs hafi verið pískurinn sem vakti þjóðina af þyrnirósarsvefni.

https://arnarthorjonsson.blog.is/blog/arnarthorjonsson/entry/2286401/

Þetta er dýrt

 

Hjörtur J. Guðmundsson fjallar skilmerkilega um íþyngjandi reglur frá Evrópusambandinu. Vera má að einhverjar þeirra séu af skynsamlegu viti, en ljóst er að þær eru ekki ókeypis.  Þær kosta íslenskt samfélag mikla fjármuni.  Það eru fjármunir sem í mörgum, ef ekki flestum, tilvikum væru betur komnir annars stðar en í kerfi sem er sniðið að samfélagi stórþjóða sem um margt er ólíkt íslensku samfélagi.   

Hjörtur bendir á hugsanlega lausn: Að skipta EES út fyrir fríverslunarsamning.

https://www.visir.is/g/20232361216d/meginvandinn-er-sjalft-regluverkid?fbclid=IwAR2-s-h8fPNUN6Zl6OWQyP1oc3EFs4uacRhEIgiQ1201C2sgGxZicF5pdkY