Leita í fréttum mbl.is

Bloggfærslur mánaðarins, ágúst 2011

Evran eyðileggur samheldni Evrópu

Evran eykur sundrungu í Evrópu. Grikkir, Spánverjar og Portúgalar mótmæla ekki aðeins stjórnvöldum í heimalöndum sínum heldur einnig Angelu Merkel kanslara Þýskalands. Ríki eins og Svíþjóð og Bretland, sem standa utan evru-samstarfsins, láta sér ekki til hugar koma að ganga inn í gjaldmiðlasamstarfið. Rúmenía er á hinn bóginn vís með að vilja inngöngu enda landlægur áhugi þar að komast undan ábyrgð á skuldbindingum. Evran er einmitt slíkt verkfæri; þar sem allir bera ábyrgð á skuldum allra ber í reynd enginn ábyrgð.

Á þessa leið skrifar Hans-Olaf Henkel fyrrum forseti Samtaka iðnaðarins í Þýskalandi í Financial Times. Hann segir það mestu mistökin á sínum ferli að hafa stutt gjaldmiðlasamstarfið um evruna.

Úr þessu verður evrunni ekki bjargað, skrifar Henkel. Tillaga hans er að Þýskaland ásamt Finnlandi, Austurríki og Hollandi kljúfi sig úr evru-samstarfinu og myndi nýjan gjaldmiðil. Suður-Evrópuríkin sætu uppi með evruna sem myndi gjaldfalla og skapa forsendur fyrir betri samkeppnishæfni.

Umræðan í Þýskalandi grefur jafnt og þétt undan tiltrú á evrunni. Þjóðverjar eru óðum að gera upp við sig að hvort vilja þeir né geta borið ábyrgð á skuldum evru-ríkjanna.

 


Össur: björt framtíð án ESB-aðildar

Ísland á sér bjarta framtíð, segir Össur Skarphéðinsson utanríkisráðherra í ítarlegri grein í Fréttablaðinu. Hvergi í greininni er aðildarumsókn Íslands til Evrópusambandsins nefnd á nafn. Þvert á móti viðurkennir utanríkisráðherra að mistök hafi verið gerð og er það óbein vísun í dauðvona umsókn.

Málflutningur Össurar og Samfylkingar er að jafnaði sá að Íslendingar kunni ekki fótum sínum forráð og séu því tilneyddir að sækja um aðild að Evrópusambandinu.

Nýfengin trú á getu þjóðarinnar að fara með sín mál sjálf er lofsverð. Össur ætti að sýna hug sinn í verki með því að græja þetta lítilræði sem útaf stendur og kippa umsókninni tilbaka.


Greiðsluþreyta Þjóðverja

Björgun evrunnar stendur og fellur með Þjóðverjum. Þýski ríkissjóðurinn er í bakábyrgð fyrir lánum til Grikkja, Portúgala og Íra. Sami ríkissjóður er óbeinn aðili að kaupum Evrópska seðlabankans að skuldabréfum Spánverja og Ítala til að halda ávöxtunarkröfunni í kringum fimm prósent.

Ambrose Evans-Pritchard í Telegraph hefur eftir þýskum yfirmanni björgunarsjóðs evru-ríkjanna að þýsk móðursýki hamli framgangi björgunaráætlunarinnar.

Á síðustu dögum hafa mikilvægar stofnanir í Þýskalandi, forsetaembætti og seðlabanki landsins, varað við yfirtöku skulda óreiðuríkja í Suður-Evrópu (vitanlega eru varnaðarorðin háttvís).

Þann 7. september boðar þýski stjórnlagadómstóllinn úrskurð í kæru vegna björgunarpakkans til Grikklands. Merkel kanslari var búinn að ákveða ferðlag til Rússlands um sama leyti. Ferðalaginu hefur verið frestað. 


Kindarleg þögn Vg um Evrópumál

Flokksráð Vinstri grænna hittist um helgina og samkvæmt venju var ályktað um stórt og smátt er lýtur að stjórnmálmálum t.d. velferðarmál, átökin í Líbíu og nauðsyn dýralækninga. Eitt mál var þó ekki nefnt stöku orði í ályktun flokksráðsins og skyldi þó ætla að skylt væri skeggið hökunni; Evrópumál, sem hafa verið í stefnuyfirlýsingu Vg frá stofnun 1999 fengu enga umfjöllun.

Í stefnuyfirlýsingunni frá 1999 segir

Hugsanlegur ávinningur af aðild Íslands að Evrópusambandinu réttlætir ekki frekara framsal á ákvörðunarrétti um málefni íslensku þjóðarinnar og er aðild að Evrópusambandinu því hafnað. Hagsmunir fjármagns og heimsfyrirtækja eru í alltof ríkum mæli drifkraftar Evrópusamrunans, miðstýring, skrifræði og skortur á lýðræði einkennir stofnanir þess um of.

Flokksforysta Vinstri grænna vanvirti þessa stefnu þegar samið var við Samfylkinguna um að styðja þingsályktun um að veita heimild til aðildarumsóknar að ESB. Tveir þingmenn Vinstri grænna hafa kvatt þingflokkinn gagnvart vegna Evrópumála.

Oft hefur verið ályktað af minna tilefni.

 


Breidd og dýpt; greinaflokkur Tómasar I. Olrich

Í sumar birti Morgunblaðið greinaflokk eftir Tómas I. Olrich, fyrrverandi menntamálaráðherra, um Evrópusambandið og Ísland. Tómas fjallar þar um tilurð sambandsins í ljósi evrópskrar sögu og alþjóðlegrar þróunar.

Tómas er þaulkunnur aðstæðum í Frakklandi og víða í Evrópu og miðlar af þekkingu sinni og reynslu í greinunum sem höfundur veitt góðfúslegt leyfi að yrðu birtar á heimasíðu Heimssýnar.

Greinaflokkur Tómasar veitir innsýn í þá pólitísku krafta sem móta Evrópusambandið og hver staða Íslands er gagnvart þeim reginöflum.

 


Evran stendur ekki undir Evrópusambandinu

Evran var pólitískt verkfæri sem átti að auka hraðann á samrunaferli Evrópusambandsins. Flest bendir til að evran valdi ekki þessu hlutverki og samstarf þeirra 17 ríkja sem hafa evru fyrir lögeyri mun ljúka með einum eða öðrum hætti.

Evran átti að vera tæknileg lausn á pólitísku álitaefni; hve langt á að ganga í samruna aldagamalla þjóðríkja. Rétti vettvangurinn fyrir úrlausn á þessu álitaefni er þjóðmálaumræðan. Evran átti að stytta leiðina að Stór-Evrópu.

Evran mun ekki fæða af sér Stór-Evrópu. Líkur eru til að kreppa gjaldmiðilsins mun færa samrunaþróun Evrópusambandins aftur um tvo til þrjá áratugi.


mbl.is Veðja á hrun evrunnar
Tilkynna um óviðeigandi tengingu við frétt

Lýðskrumið um ónýtu krónuna

Egill Jóhannsson forstjóri Brimborgar bloggar um krónu og hagstjórn

Guðmundur Steingrímsson sem í gær sagði sig úr Framsóknarflokknum nefnir að ónýtur gjaldmiðill sé m.a. ástæða úrsagnar hans úr flokknum í merkingunni að forsystumenn flokksins styðja ekki að Ísland taki upp evru.

Gjaldmiðill getur ekki verið ónýtur en aftur á móti getur hagstjórnin verið það léleg að það endurspeglast í gjaldmiðlinum. Ástand gjaldmiðils er tákn um ástand hagkerfisins.

Það er því einhverskonar bull þegar menn kasta fram lýðskrumsfrasanum "ónýt króna". Ekki er hægt að taka mark á þeim sem svona tala og horfa til töfralausna eins og ESB og evru.

Það er algerlega á kristaltæru að nákvæmlega sömu meðulum þarf að beita við hagstjórnina hvort sem menn eru með krónu eða evru sem er einmitt m.a. ástæða þess að evrusamstarfið gerir kröfu um svokölluð Maastrict hagstjórnarskilyrði.

Það er af þeirri nákvæmlega sömu ástæðu að Grikkland er í vondum málum ásamt fleiri evruríkum og Ísland vegna þess að þau fylgdu ekki leiðbeiningum Maastricht. Ásamt auðvitað fleiri atriðum því þótt Maastrict skilyrðin séu nauðsynleg þá eru þau ekki nægjanleg.

Það er því ekki mark takandi á neinum stjórnmálamanni sem vill "bíða eftir inngöngu í ESB og upptöku evru" til að taka á hagstjórninni í stað þess að einhenda sér í verkið strax. Það þarf nefnilega hvort sem er að taka á hagstjórnni hvort sem evra verður tekin upp eða ekki. ESB leyfir ekki annað.


Eistneskt fullveldi og íslenskur kjánaskapur

Eistneskir þingmenn heimsóttu Heimssýn fyrir tveim árum og gerðu grein fyrir ástæðum þess að Eistar gegnu í Evrópusambandið. Ástæðurnar voru tvíþættar. Í fyrsta lagi efnahagslegar, þar sem sjötti hver eistnesk króna kom frá Brussel, og í öðru lagi öryggishagsmunir gagnvart Rússlandi.

Þingmennirnir útskýrðu að Eistland væri á ,,áhrifasvæði" Rússa og löngum verið hernumið af grönnum sínum. Með því að tengjast Vestur-Evrópuríkjum nánari böndum í gegnum Evrópusambandið væru varnir efldar gegn rússnesku ofríki.

Aðildarsinnar á Íslandi, trúir söguleysi sínu og einfeldningshætti, setja jafnaðarmerki milli fullveldis Eista og Íslands. Það er eins og að bera saman sjávarútveg á Íslandi og í Sviss. 


Þingmaðurinn og evrópska Brussan

Haraldur Hansson bloggar um aðildarsinnaða þingmenn og fer á kostum. 

Svo blindir geta menn orðið í trúnni á draum sinn, að hvítt verður svart og vont verður gott. Þingmaður skrifaði grein í Fréttablaðið og er engu líkara en að Birtíngur hafi stýrt pennanum.

Birtíngur trúði af sakleysi öllu sem Altúnga, lærifaðir hans, kenndi honum, enda „mikið einfaldur að hjartalagi". Altúnga kenndi að þeir lifðu í hinum allra besta heimi og að allt sem þar gerist miði til góðs.

Þeir sem segja að alt sé í lagi eru hálfvitar; maður á að segja að alt sé í allrabesta lagi.

Magnús Orri Schram ritar í Fréttablaðið og tekst, eins og Birtíngi, að lesa vondar fréttir sem gleðitíðindi. Evrópskir stjórnmálamenn óttast aukna miðstýringu en Magnús Orri kallar það „nánara samstarf".  Ytra telja menn að aldrei verði hægt að ná sátt um slíkt fullveldisafsal, en okkar maður telur það „jákvæðar breytingar".

Þannig trúir hann að allt sem gerist í Evrópusambandinu miði til góðs, sama hversu slæmt það er. Hann trúir bábiljunum öllum og getur varla beðið eftir evrunni, sem sligar nú hvert jaðarríkið á fætur öðru.

Magnús Orri bregður sér í hlutverki Birtíngs, Evrópusambandið er hans Kúnígúnd og Össur er lærifaðirinn Altúnga. Þingmaðurinn er jafn blindaður af hrifningu sinni á Brussel og Birtíngur var af ást sinni á Kúnígúnd.
 

Vinstrihandargiftíng

Birtíngur eyddi aumri ævinni í að leita að æskuástinni Kúnígúnd. Þrátt fyrir samfelldar hrakningar og þjáningar trúði hann því að hlutirnir geti ekki verið öðru vísi en þeir eru og hljóti að fá hinn allra besta endi.

Þegar hann loks fann Kúnígúnd hafði hún ljókkað svo mjög að hann hrökk skelfdur þrjú skref afturábak. Hann bar enga löngun til að giftast henni en hún gekk svo freklega eftir honum að hann komst ekki undan því.

Lærifaðirinn Altúnga tók saman ritgerð og sannaði að hin eðalborna Kúnígúnd gæti gifst Britíngi vinstrihandargiftíngu. Jafnvel þegar allir draumar Birtíngs höfðu molnað sannaði Altúnga að þeir byggju í hinum besta allra heima.

Birtíngur tók að efast í mesta mótlætinu og taldi „brjálsemi að halda því fram að allt sé í lagi þegar allt er í ólagi". Þingmaðurinn á eftir að ná þeim þroska. Og að skilja að hamingjan fæst ekki með því að giftast óhrjálegri evrópskri Brussu vinstrihandargiftíngu.


Hraðferð inn í brennandi hús

William Hague breski utanríkisráðherrann er höfundur þeirrar myndlíkingar að evran væri eins og brennandi hús þar sem allar útgönguleiðir eru lokaðar. Hague notaði líkinguna fyrir áratug þegar umræða var í Bretlandi um að gerast aðili að Evrulandi.  Sumir vildu það á sínum tíma en þær raddir eru löngu þagnaðar. En þegar eldar loga í evruhúsi berast skringilegar fréttir af eyju í norðri.

Á Íslandi er utanríkisráðherra sem biður stækkunarstjóra Evrópusambandsins að taka Ísland í hraðferð inn í brennandi evruhúsið.

Er Össur orðinn háður því að hlegið sé að honum í útlöndum?


mbl.is Segir ESB-umsóknina tilgangslausa
Tilkynna um óviðeigandi tengingu við frétt

Næsta síða »

Heimssýn

Heimssýn

hreyfing sjálfstæðissinna í Evrópumálum, eru þverpólitísk samtök þeirra sem telja hagsmunum Íslendinga best borgið með því að halda áfram að vera sjálfstæð þjóð utan Evrópusambandsins.

 

Sími 895 5334 (Haraldur Ólafsson, formaður)


Nánar um Heimssýn

Vertu með!

Frjáls framlög

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 19
  • Sl. sólarhring: 428
  • Sl. viku: 1876
  • Frá upphafi: 1109164

Annað

  • Innlit í dag: 15
  • Innlit sl. viku: 1626
  • Gestir í dag: 15
  • IP-tölur í dag: 15

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband