Frakkar róa Kínverja vegna evruóróans

Forystumönnum í ESB-löndunum, svo sem forsætisráðherra Frakklands, Manuel Valls, er umhugað um að telja Kínverjum trú um að evrusvæðið muni standa af sér þann ólgusjó sem Grikklandsfárið veldur. Kínverjar eru jú að fjárfesta í stórum stíl í mörgum ríkjum Evrópu og vilja uppskera sem þeir sá.

Á sama tíma er hin nýja gríska ríkisstjórn að stöðva áfrom um frekari fjárfestingar Kínverja í Grikklandi, svo sem kaup á Kínverja helstu höfnum landsins.

Gríska evrufárið er líklega rétt að byrja. Á endanum verða aðrar evruþjóðir að fallast á kröfur Grikkja.

Að öðrum kosti yfirgefa þeir evrusvæðið.

Reyndi að draga úr áhyggjum af evrusvæðinu

EES-reikningurinn hækkar verulega

EFTA-ríkin hafa þurft að greiða sem nemur um þrjú hundruð milljörðum króna á ári fyrir aðgang að EES-svæðinu. Nú vill ESB hækka þann reikning verulega eins og fram hefur komið í fréttum frá Noregi.

Greiðslan er hugsuð til þess að bæta efnahagslega- og félagslega stöðu í þeim löndum þar sem fólk hefur minnst á milli handanna.

Óljóst er enn hve mikið ESB vill hækka reikninginn en Erna Solberg, forsætisráðherra Noregs, segir að kröfur ESB séu algjörlega óraunhæfar. Vissulega hefur Noregur greitt bróðurpartinn af reikningnum en Ísland og önnur EFTA-lönd munar einnig um sinn hlut, hvað þá verði hann hækkaður verulega.

EES-aðildin kostar því sitt í framtíðinni þótt stærsti kostnaðurinn fyrir Íslendinga af aðildinni sé hið gallaða regluverk fyrir fjármálakerfið sem gerði íslenskum bönkum kleift að þenjast út í ESB-löndunum.

 

EES-samningurinn dýrasta gjörð stjórnvalda

EES-samningurinn er dýrasta gjörð íslenskra stjórnvalda. Hann gerði íslenskum bönkum kleift að þenjast út erlendis og stuðlaði þannig að einu mesta fjármálahruni í veraldarsögunni. Tugþúsundir skriffinna ESB framleiða reglur og lög á færibandi sem ríkjum á EES-svæðinu er ætlað að skrifa í sína lagabálka. Það er dýrt og það er ógerlegt.

Þess vegna eiga Íslendingar að bremsa af reglusetningargleðina í samstarfi við aðrar minni þjóðir á EES-svæðinu, svo sem Norðmenn sem eru orðnir æ fleiri þeirrar skoðunar að tempra beri EES-samninginn eða jafnvel segja honum upp.

Hvar er umræðan um agnúa EES-samningsins hér á landi?

Kostnaðarsöm mannfæð í stjórnkerfinu

Tveggja ára Icesave-afmæli

Það er ástæða til þess fyrir komandi kynslóðir Íslendinga að muna daginn 28. janúar 2013 því þá vannst fullnaðarsigur þjóðarinnar í Icesave-málinu. Ríkisstjórn landsins stóð ekki í lappirnar gegn útlendu valdi og samþykkti að þjóðin skyldi bera ábyrgð á skuldum og basli bankanna. Því neitaði þjóðin og Efta-dómstóllinn dæmdi þjóðinni í vil á þessum degi fyrir tveimur árum.

Þingmenn Framsóknarflokksins minntu á þennan merka áfanga í sögu þjóðarinnar á þingi í dag.

RUV segir svo frá:

Þingmenn Framsóknarflokksins hafa í umræðu um störf þingsins á Alþingi óskað þjóðinni til hamingju með daginn, en í dag eru tvö ár frá því að Ísland hafði sigur í Icesave málinu gegn Efta dómstólnum. Tala þingmennirnir um fullnaðarsigur í Icesave málinu sem vert sé að fagna á þessum degi.

Vigdís Hauksdóttir, Ásmundur Einar Daðason, Þorsteinn Sæmundsson og Þórunn Egilsdóttir, hófu öll ræður sínar undir liðnum störf þingsins, á að óska þingi og þjóð til hamingju með Icesave-sigurinn. Hægt er að heyra ræður þeirra hér. 

Vigdís Hauksdóttir sagði þjóðina hafa unnið fullnaðarsigur. „Í dag eru tvö ár síðan við Íslendingar unnum mál fyrir alþjóðlegum dómstóli, EFTA-dómstólnum, og unnum þar með fullnaðarsigur yfir Bretum og Hollendingum og ESB sem stefndi sér inn í Icesave-málið,“ sagði Vigdís. 

EFTA dómstóllinn hafnaði öllum kröfum ESA í Icesave málinu, en þær voru að viðurkennt yrði með dómi að Ísland hefði annars vegar brotið gegn Evróputilskipun um innstæðutryggingar með því að greiða ekki eigendum Icesave reikninga lágmarksinnstæðutryggingu. Hins vegar var þess krafist að viðurkennt yrði með dómi að Ísland hefði brotið gegn almennum reglum EES samningsins um bann við mismunun á grundvelli þjóðernis. Íslensk stjórnvöld tryggðu að fullu innstæður á reikningum hinna föllnu banka hér á landi en ekki innstæður á reikningum í útibúum Landsbankans í Bretlandi og Hollandi. Niðurstaða dómsins var sú að ekki var um brot á EES samningnum að ræða.

Evran eru mistök sem ekki er hægt að leiðrétta

Nánast allir eru nú sammála um að það hafi verið mistök að Grikkir skyldu taka upp evru. Vandamálin voru næg fyrir en þau hafa vaxið hrikalega vegna sparnaðaraðgerða til bjargar evrunni.

Nýr fjármálaráðherra Grikkja, Yanis Varoufakis, segir að eina leiðin sé að fella niður hluta skulda Grikkja. Þótt það hafi verið hrikaleg mistök að taka upp evruna þá yrðu afleiðingarnar af því að yfirgefa hana ennþá verri.

Það að fara úr ESB hefur verið líkt við það að reyna að afbaka pítsu. Þegar búið er að baka pítsuna (búa til ESB), er ekki hægt að yfirgefa ESB (afbaka pítsuna).

Yanis Varoufakis, fjármálaráðherra Grikkja, sem áður var prófessor í hagfræði, líkir þessu við laglínurnar í lagi Eagles, Hótel Kalifornía: „You can check-out any time you like,But you can never leave!“

Frekar Kanadadollar en evra

Evran hentar ekki Íslendingum segir spútnikhagfræðingur Dana

Einn fremsti hagfræðingur Dana, Lars Christensen, aðalhagfræðingur Danske Bank, segir evruna engan veginn henta Íslendingum vegna þess hve hagkerfið hér á landi er ólíkt hagkerfum evrulandanna. 

Þetta kom fram á fundi sem VÍB, Verðbréfamarkaður Íslandsbanka, hélt í morgun með Christensen,Bjarna Benediktssyni fjármála- og efnahagsráðherra og fleirum. Bylgjan greindi frá þessu í hádegisfréttum. 

Christensen varð kunnur hér á landi árið 2006 þegar hann spáði miklum erfiðleikum íslensku bankanna og reyndist þar heldur betur sannspár. 

Christensen sagði að jafnvel þótt meirihluti yrði fyrir því hér á landi, sem væri alls ekki líklegt, að ganga í ESB, þá myndi evran engan veginn henta Íslendingum þar sem Ísland væri svo ólíkt ESB-löndunum. 

Sjá meðal annars stutta frétt um þetta á Visir.is

Sjá einnig umfjöllun á Vb.is

Icesave-kröfuhópar heimta áframhaldandi ESB-umsókn

Það er merkilegt að sjá þá hópa sem kröfðust þess hvað harðast að Icesave-klyfjunum yrði smellt á herðar íslensks almennings heimta nú að umsókninni um inngöngu í ESB verði haldið lifandi.

Félagi atvinnurekenda er greinilega ekki treystandi til að hugsa um hag almennings í landinu. Félagið lítur þröng á hagsmuni tiltekinna aðila. Spurningin er sú hvort félagið og stjórn þess endurspegli fyllilega vilja félagsmanna sinna.

Mótmæla afturköllun aðildarumsóknar

Finnar vilja létta skuldabyrði Grikkja

Fyrir nokkrum árum voru Finnar einna harðastir evruþjóða í því að láta Grikki standa við skuldbindingar sínar. Þess vegna vilja ýmsir vita hvað Finnar vilja gera núna í skuldamálum Grikkja. Og viti menn: Finnar eru tilbúnir að endursemja um skuldir Grikkja þótt þeir vilji ekki ganga svo langt að fella þær niður eða afskrifa. Breyttir skilamálar og lánalengingar - það er það sem Finnar eru tilbúnir að skoða.

Nýr fasi er hafinn í björgunarleiðangri fyrir evruna. Hann heitir SKILMÁLABREYTING EVRUSKULDANNA.

EUBusiness greinir frá þessu.

Fróðlegt verður að fylgjast með afstöðu Þjóðverja til skilmálabreytinga fyrir Grikki.

Lánardrottnar Grikkja brýna kutana

Uggur er í fjármálafurstum evruríkjanna vegna stórsigurs andstæðinga stefnu ESB í Grikklandi í gær. Grikkir hafa fengið sem svarar 40 þúsundum milljarða króna (í evrum!) gegn því að skera hressilega niður í ríkisrekstrinum. Evrumilljarðarnir hafa ekki farið í ríkisreksturinn í Grikklandi heldur eru væntanlega geymdir sem eins konar sýndarfé á reikningum lánardrottnanna sjálfra til að tryggja að viðskipti Grikkja við útlönd geti gengið eðlilega fyrir sig. En nú segjast lánardrottnarnir vilja fá sitt aftur með vöxtum og engum refjum og brýna þeir því nú kutana til að skapa sér vígstöðu gagnvart nýjum stjórnvöldum í Grikklandi.

Líklegasta þróunin er þó sú að ESB, seðlabanki evrunnar og AGS gefi eftir gegn þeirri skýru kröfu grísku þjóðarinnar sem felst í niðurstöðu kosninganna að skilmálum lánanna verði breytt. ESB mun fremur samþykkja léttari skilmála fyrir Grikki en að missa þá úr evrusamstarfinu með öllum þeim kollsteypum sem það gæti haft í för með sér.

Kutum lánardrottnanna er því bara ætlað að hræða - því verði þeim beitt munu þeir á endanum beinast gegn lánardrottnunum sjálfum.

 

Endalok evrunnar í Grikklandi?

Háttsettur embættismaður segir ástandið grafa undan stoðum ESB

Benoit Coeure, sem á sæti í framkvæmdastjórn seðlabanka evrunnar, segir að vegna lítils hagvaxtar og langavarandi atvinnuleysis séu grunnstoðir hins pólitíska samstarfs í Evrópu að veikjast. Þetta ástand megi ekki vara mikið lengur, því þá sé samstarfið hreinlega í hættu.

Viðskiptablaðið greinir frá þessu.

Nánar segir blaðið:

Háttsettur embættismaður hjá evrópska seðlabankanum (seðlabanka evrunnar - innskot Heimssýnar) varar við að atvinnuleysi og lítill hagvöxtur á evrusvæðinu sé að grafa undan grunnstoðum Evrópusambandsins. Fjallað er um málið á vef BBC.

Benoit Coeure, sem á sæti í framkvæmdastjórn evrópska seðlabankans, hélt í gær erindi á Alþjóðaefnahagsþinginu (World Evonomic Forum) í Davos í Sviss. Þar sagði hann að seðlabankinn gæti ekki einn síns liðs stuðlað að langvarandi hagvexti á evrusvæðinu, heldur væri það hlutverk stjórnvalda. Hann hvatti stjórnvöld evruríkjanna til að reyna að örva efnahagslífið.

Á fimmtudaginn var tilkynnt um magnaðgerðir Seðlabanka Evrópu en þær eru hugsaðar til að örva efnahagslífið á svæðinu. Seðlabankinn mun verja 60 milljörðum evra í skuldabréfakaup mánaðarlega þar til í septembermánuði á næsta ári. Aðgerðirnar hefjast í marsmánuði og mun endanleg fjárhæð kaupanna því nema 1.200 milljörðum evra.

Ástandið má ekki vara mikið lengur

Coure sagði að með aðgerðunum væri evrópski seðlabankinn að gera það sem í þeirra valdi stendur en bankinn hefði ekki tök á að stuðla að langvarandi hagvexti einn síns liðs. Stjórnvöld ríkjanna þyrftu líka að leggja lóð á vogarskálarnar. „Við getum gert fjárfestingar ódýrari, en fólk þarf að vilja fjárfesta og það er hlutverk fjármálaráðherra og ríkisstjórna,“ sagði Coure á efnahagsþinginu.

Hann sagði jafnframt að vegna lítils hagvaxtar og langavarandi atvinnuleysis séu grunnstoðir hins pólitíska samstarfs í Evrópu að veikjast. Þetta ástand megi ekki vara mikið lengur, því þá sé samstarfið hreinlega í hættu. Á fundi Eurogroup á mánudaginn hyggst Coure greina fjármálaráðherrum aðildarríkjanna frá áhyggjum sínum.