"Öryggi Íslands yrði engu betur borgið innan ESB"

Leiðari Morgunblaðsins miðvikudaginn 19. mars greinir vel þau "villurök og hræðsluáróður" sem nú er haldið fram í umræðum um stöðuna í Evrópu. Vitnað er til málþings sem haldið var nýverið í Háskóla Íslands.

"Af þeirri umræðu mátti ráða að aðild að Evrópusambandinu gæti skipt sköpum um öryggi Íslands, þótt ekki létu allir ræðumenn að því liggja" segir m.a. í leiðaranum.

Síðan segir:

"Staðreyndin er sú að aðildin að Atlantshafsbandalaginu veitir bestu öryggistrygginguna. Evrópusambandið bætir þar engu við. Vissulega er skjálfti í mönnum. Yfirlýsingagleði Trumps getur vissulega verið ónotaleg og hefur valdið því að menn óttast jafnvel að Bandaríkjamenn snúi baki við NATO. Ólund Trumps helgast að mestu af því að honum finnst mörg hinna aðildarríkjanna í NATO ekki leggja sitt af mörkum og er hann ekki fyrsti Bandaríkjaforsetinn til að vekja máls á því, þótt hann gangi fastar fram en forverar hans.

Þrjú ár eru liðin frá innrás Rússa í Úkraínu, en það er fyrst nú þegar Trump byrstir sig að umræðan um framlög til varnarmála hefur tekið við sér fyrir alvöru í Evrópu. Taki Evrópa við sér dregur úr líkum á því að Bandaríkjamenn dragi sig í hlé.

Búast má við því að á næstunni muni þær raddir gerast háværari og ágengari, sem segja að ganga þurfi í Evrópusambandið af öryggisástæðum líkt og gerðist í efnahagshruninu 2008. Þá hrundi krónan og horfur voru slæmar, en efnahagur Íslands tók hratt við sér einmitt vegna eigin myntar. Öðru máli gegndi til dæmis um Grikki. Evran var eins og myllusteinn um háls þeirra og má segja að enn súpi þeir seyðið af að hafa kastað drökmunni."

Óhætt mun að taka undir hvert orð hérna.

í örstuttu máli

Fáir hafa tíma til að setja sig inn í anga málsins sem heitir bókun 35.

Nokkur helstu atriði eru í grein á Vísi í dag.  Hér fer sú grein beint úr kúnni:

 

Nokkur at­riði í ör­stuttu máli varðandi bókun 35

Haraldur Ólafsson skrifar 20. mars 2025 11:00

 

Bókun 35 er til umfjöllunar á Alþingi. Hér eru nokkur atriði sem vert er að rifja upp.

1. Bókun 35 geirneglir kerfi sem er á afar gráu svæði gagnvart stjórnarskrá og hugmyndum alls þorra fólks á Íslandi um lýðræði. Kerfið gengur út á að færa dóms- og einkum löggjafarvald í sívaxandi mæli til embættismanna erlends ríkjasambands.

2. Bókun 35 stenst ýmist ekki eða líklega ekki stjórnarskrá að rökstuddu mati margra helstu stjórnspekinga landsins, þar á meðal fv. forseta hæstaréttar og háskólamanna í lögum. Sama sögðu sérfræðingar utanríkisráðuneytis árið 2020 og núverandi innviðaráðherra í fyrra. (sjá t.d. umsagnir Hjartar J. Guðmundssonar og Arnars Þórs Jónssonar sem eru á https://www.althingi.is/thingstorf/thingmalin/erindi/156/85/?ltg=156&mnr=85). Óþarfi ætti að vera að minna Alþingismenn á að þeir hafa svarið eið að stjórnarskrá lýðveldisins, en skal það samt gert hér.

3. EES-samningurinn hefði að öllum líkindum aldrei verið samþykktur með bókun 35 innanborðs. Það eru mjög vond og óeðlileg vinnubrögð að koma valdaframsali í gegnum Alþingi með því að kippa framsalið í litla búta og þröngva þeim svo einum og einum í gegn.

4. Bókun 35 er ný forgangsregla sem setur lagasafn Íslands í uppnám. Hvaða lög falla úr gildi? Það er vægast sagt óljóst Mun fyrirvari um sæstreng í lögum um orkumál verða að engu, svo dæmi sé tekið? Áður en Alþingi samþykkir bókun 35, standi vilji til þess, þarf að svara spurningum af þessu tagi.

5. Bókun 35 flækir stjórnkerfi Íslands. Það er dýrt og það gerir óinnvígðum enn erfiðara að átta sig á hvað gildir og hvað ekki.

6. Það er óljóst hver hin raunverulega ástæða er fyrir því að utanríkisráðuneytið leggur allt í einu svona mikla áherslu á að Alþingi samþykki bókun 35. Fjarvera bókunar 35 í þá 3 áratugi sem EES hefur verið í gildi hefur ekki verið til teljandi vandræða og það er líka vandræðalaust að leyfa málinu að fara fyrir dóm, sé það vilji þeirra sem ráða í Brussel.

7. Meirihluti þjóðarinnar er andvígur bókun 35, skv. skoðanakönnun Prósents í september 2024. Núverandi ríkisstjórn hefur sagt að mikilvægt sé að leyfa þjóðinni að ráða í svokölluðum Evrópumálum. Nú er ágætt tækifæri til þess.

Höfundur er formaður Heimssýnar, félags um fullveldi Íslands.

 

https://www.visir.is/g/20252703654d/nokkur-atridi-i-orstuttu-mali-vardandi-bokun-35

 

Þung rök gegn óráðshjali

Fátt gerist í heiminum, sem ekki verður hinum heittrúuðu tilefni til að biðja um verða þegnar í Evrópusambandinu.   Nú síðast stríð í Úkraínu og ólga í stjórnkerfi Bandaríkjanna.  Menn geta valið úr röksemdum í máli af þessu tagi, allt eftir smekk og skoðunum.  Lítum á:

 

1. Bandaríkin og Bretar munu aldrei láta það viðgangast að ríki sem þeim er óvinveitt nái neinni fótfestu á Íslandi, óháð öllum samningum. 

2. Svokallaður "varnarsamningur" milli BNA og Íslands hefur verið í gildi í mannsaldur og enginn utan Íslands hefur lagt til að honum verði rift. 

3. Erfitt er að koma auga á hernaðarlega ógn við Ísland

4. Herleysi er að margra mati besta vörnin gegn stríði.  

5. Vesturveldin eyða nú þegar um 15 sinnum meira fé til hermála en t.d. Rússar.  

 

Evrópusambandið læknar öll sár

Sá er siður þeirra sem tekið hafa trú á Evrópusambandið að kynna aðild að Evrópusambandinu sem lausn á hvers kyns vanda og skiptir þá litlu hver vandinn er, og jafnvel líka hvort vandinn sé raunverulegur eða ekki.  

Nú síðast kom sú hugmynd að Íslendingar yrðu með einhverjum hætti öruggari ef þeir yrðu þegnar í bandalaginu.  Allt er það vitaskuld úr lausu lofti gripið.  Rætt er um þessi mál og margt fleira sem lýtur að mikilvægi þess að Ísland haldi fullveldi sínu í viðtali Oddnýjar Eir við Harald Ólafsson á Samstöðinni sem hér er tengt við.

https://www.youtube.com/watch?v=ldXmhmcGzRw

Eilífðarmálið og aðalmálið

Þessa dagana fjallar Alþingi um bókun 35 enn einu sinni.

Ýmsir angar þess máls kunna að vera flóknir.  Það eitt mælir gegn bókuninni. 

Aðalmálið er þó að bókun 35 er liður í því að færa vald frá lýðræðislega kjörnum fulltrúum á Íslandi til ókjörinna fulltrúa í erlendu ríkjasambandi.  Slíkt verður Íslendingum fyrr eða síðar til tjóns. 

 

Viðskiptasamningur sem breyttist í yfirtökusamning

Hvernig stendur á því að íslensk stjórnvöld komast skyndilega að því að bókun 35 sé ljómandi góð, eftir að hafa afþakkað hana í 30 ár og mótmælt Evrópusambandinu þegar það vildi að Ísland lögfesti bókunina?

Hvernig stendur á því að bókun 35 var talin í andstöðu við stjórnarskrá fyrir 30 árum, en alls ekki núna, og hefur stjórnarskráin þó lítið breyst?

Hvernig stendur á því að viðskiptasamningur sem gerður var fyrir 30 árum breytist í víðtækt framsal á löggjafar- og dómsvaldi, með tilheyrandi hótunum um refsingar ef hinum nýju valdhöfum er ekki hlýtt? 

Það væri viðeigandi að stjórnvöld svöruðu þessu, og fleiru, í stað þess að krefjast þess að Alþingi lögfesti bókun 35.  

Sigurbjörn Svavarsson ræðir EES-málin og bókun 35 í hjálagðri Moggagrein.  

https://www.facebook.com/messenger_media/?attachment_id=4021713261413273&message_id=mid.%24cAAAABfHtrKGbtPquPWVg7VlKbpjk&thread_id=100016519960567

Spurningunni sem aldrei var svarað

Ein af grundvallarspurningunum er þessi: 

Hvers vegna ætti ríkjabandalag undir stjórn gömlu nýlenduveldanna á meginlandi Evrópu að ráða orkulindum Íslands?

Enginn sem vill þetta hefur svarað öðruvísi en með útúrsnúningum. 

Grein Birgis Steingrímssonar í Mogga er enginn útúrsnúningur.  Hann segir m.a.

 

"Orkupakkar ESB hafa eingöngu orðið til skaða fyrir íslenskan almenning og munu hægt og rólega draga úr getu landsins til að byggja upp samfélag sem hefur verið eitt það besta í heimi þegar forræðið á helstu auðlind landsins færist úr landi. Afleiðingarnar eru ófyrirsjáanlegar."

 

https://www.facebook.com/photo/?fbid=10162812814427905&set=gm.835647572061202&idorvanity=439592811666682

 

Klipptir strengir

Jón nokkur Ásgeir lætur gamminn geisa um evru og Evrópusamband. 

Í því sambandi er gott að hafa nokkur atriði í huga:

Nokkur lönd vilja komast í Evrópusambandið, þau eru öll miklu fátækari en sambandið og vonast til að fá peninga út úr sambandsvistinni.  Ekkert ríki sem er ríkara en meðaltalið í Evrópusambandinu er í biðröðinni.  Hvorki, Noregur, Sviss, Liechtenstein né Ísland.  Þeirra hlutverk er nefnilega að hlýða og borga. 

Margt ræður því hvort menn fjárfesta í fjarlægu landi.  Það sem er Íslandi mótdrægt er nokku margt, s.s. smæð atvinnumarkaðar, smæð heimamarkaðar, fjarlægð frá stórum mörkuðum og dýrt vinnuafl. Gjaldmiðill er neðarlega á þessum lista, ef hann er þá þar.  Menn kaupa og selja gjaldmiðla að vild.  Ef mikill velsældarkippur fær ekki að skila sér í sterkara gengi mun hann skila sér í dýrara vinnuafli og dýrari aðföngum. 

Hjörtur var snöggur að svara Jóni Ásgeiri.  Það gerði hann skilmerkilega og benti í leiðinni á að Evrópusambandið vinnur ákaft gegn því að Írar komist upp með skattastefnu sem Jón Ásgeir vill að Íslendingar taki upp, jafnframt því að ganga í Evrópusambandið! 

Það er eins og að stilla fiðlu með því að klippa stengina. 

https://www.stjornmalin.is/?p=10718