Öskrandi stríðsvagn fyrir Íslendinga

Því var spáð fyrir löngu að Evrópusambandið mundi vígvæðast þegar tækifæri gæfist.  Hagsmunir evrópskra fyrirtækja viða um heim og hagsmunir vopnaiðnaðar sem er nátengdur stjórnmálum ráða för. Fátt er þar nýtt. 

Nú gafst lokst tækifæri og Evrópusambandið stekkur á það. Gríðarlegu fé er veitt frá almenningi í Evrópusambandslöndunum til vígbúnaðar. Það kemur til viðbótar við þá vígvæðingu sem fyrir er, sem er mikil, og er þá vægt til orða tekið. 

Ríkisstjórn Íslands vill ýta af stað ferli sem miðar að því að Íslendingar taki sér far með þessum vagni eyðingar og dauða.  Íslenskt verkafólk á að vinna aukavinnu til að fóðra evrópskan hergagnaiðnað og fá svo sprengju í hausinn að launum. 

https://www.tni.org/en/article/the-eu-is-on-a-war-path

Hann þrengir að öndunarveginum

Það er furðu útbreidd skoðun að íslenska þjóðin dragi nánast andann gegnum EES-samninginn og að án hans væru Íslendingar að borða úldið mjöl í torfkofum.   Ekkert er fjær sanni.  EES-samningurinn skiptir í raun litlu máli.  Ferðamenn kæmu þótt ekki væri EES, afurðir stóriðju fara á alþjóðlegan markað og fríverslun með iðnvarning innan Evrópu er í skjóli EFTA. Þá flytja þjóðir utan EES fisk til Evrópusambandslanda án tolla. Það er líka út í bláinn að fullyrða að EES skipti miklu máli fyrir menningu eða vísindi; engar vísbendingar eru um að það fé sem rennur til þeirra mála aukist við það eitt að sjóðir Evrópusambandsins séu þar milliliðir. 

Núna vilja margir Alþingismenn samþykkja bókun 35 sem flytur enn meira vald frá lýðræðislega kjörnum fullrúum á Íslandi til Evrópusambandsins.  Af því tilefni skrifar Arnar Þór þarfa ádrepu sem tengt er á hér að neðan. 

Það er nefnilega þannig að í stað þess að útvega súrefni þrengir EES og allt frekara framsal valds að öndunarvegi þjóðarinnar. 

 

https://arnarthorjonsson.blog.is/blog/arnarthorjonsson/entry/2314976/

 

 

Það er ekki smæðin

Hjörtur bendir á í Morgublaðsgrein að þingmaður Viðreisnar hafi enn einu sinni reynt að telja þjóðinni trú um að smæð myntsvæðisins sé orsök dýrra lána.  Ef Íslendingar gangist erlendu valdi á hönd muni fljóta til landsins ódýrt lánsfé.

Allt er þetta bull, eins og skýrt hefur komið fram í rökum hagfræðinganna Ólafs Margeirssonar, Ragnars Árnasonar og Tómasar Agnars Möller, svo aðeins nokkrir séu nefndir til sögunnar. 

Óljóst samhengi er milli stærðar myntsvæða og raunvaxta.  Það er annað sem ræður þeim.  

Hér er samantekt Hjartar J. Guðmundssonar

https://www.facebook.com/photo/?fbid=24560259276895379&set=gm.895852966040662&idorvanity=439592811666682

 

Bréfið

Heimssýn hefur sent forseta Íslands beiðni um fund vegna bókunar 35, með tilvísun í bréfið sem hér fer.

 

 

 

Reykjavík, 25. apríl 2025

 

Forseti Íslands

Halla Tómasdóttir

Staðarstað, Sóleyjargötu

101 Reykjavík

 

Heiðraði forseti

 

Enn á ný hefur ríkisstjórn Íslands lagt fyrir Alþingi frumvarp til laga um forgang löggjafar sem á sér rætur í EES-samningnum. Sama á við um skuldbindingar sem innleiddar eru með stjórnvaldsfyrirmælum. Frumvarpið er jafnan nefnt „bókun 35“.

 

Í stjórnarskrá lýðveldisins Íslands segir að Ísland sé fullvalda ríki og að löggjafarvaldið sé aðeins í höndum Alþingis og forseta Íslands. Sífellt vandséðara er að það fyrirkomulag að taka við löggjöf frá útlöndum, undir hótunum um refsingar verði hún ekki samþykkt, standist stjórnarskrána. Bókun 35 hnykkir rækilega á þessu fyrirkomulagi og færir stjórnkerfið því enn fjær þeim ramma sem stjórnarskráin setur.

 

Er þetta ekki aðeins álit Heimssýnar, heldur fjölda sérfræðinga sem tekið hafa málið til skoðunar. Hafa þeir allir efasemdir um að lögin standist stjórnarskrá. Þeirra rök verða ekki endurtekin hér, en vísað er til umsagna Arnars Þórs Jónssonar, fyrrverandi dómara, um frumvarpið, álits Jóns Steinars Gunnlaugssonar, fyrrverandi hæstaréttardómara og prófessors í lögum, sem gerð er grein fyrir í umsögn Hjartar J. Guðmundssonar um umrætt frumvarp. Einnig er vísað til greinar Markúsar Sigurbjörnssonar, fyrrverandi forseta hæstaréttar, í afmælisriti EFTA árið 2014, til greinar Stefáns Más Stefánssonar fyrrverandi prófessors í lögum í Morgunblaðinu, 17. febrúar 2025 og til umsagnar Skúla Sveinssonar hæstaréttarlögmanns um frumvarpið. Þá er einnig vísað til umsagna Ögmundar Jónassonar, fyrrverandi dómsmálaráðherra, fyrrnefndrar umsagnar Hjartar J. Guðmundssonar og umsagna Heimssýnar um ýmsa þætti þessa máls.

 

Einnig verður ekki annað séð en að drjúgur meirihluti þjóðarinnar, skv. skoðanakönnun sem gerð var að beiðni Heimssýnar, sé andvígur málinu. Samþykki Alþingi lögin um bókun 35 er því komin gjá milli þings og þjóðar.

 

Félagið Heimssýn, sem hefur að markmiði að standa vörð um fullveldi Íslands, hefur af þessu máli mjög miklar áhyggjur. Í því sambandi verður ekki hjá því komist að minna á að frumvarp það sem hér um ræðir var ekki hluti EES-lagabálksins þegar sá samningur var samþykktur. Það var meðal annars vegna þess að ef svo hefði verið, hefði samningurinn gengið gegn stjórnarskránni.

 

Förum við þess góðfúslega á leit við forseta Íslands að hann veiti máli þessu viðeigandi athygli og beini því til ríkisstjórnar og Alþingis að virða stjórnarskrána. Fari svo að Alþingi samþykki umrætt frumvarp förum við fram á að forseti staðfesti ekki þau lög, enda gangi þau gegn stjórnarská lýðveldisins.

 

Fyrir hönd Heimssýnar

 

Haraldur Ólafsson, formaður

Einföld útskýring Jóns Steinars - og upprifjun Jóns Bjarnasonar á sögulegum staðreyndum

Jón Steinar Gunnlaugsson hetir maður sem velt hefur lögum og rétti fyrir sér um nokkra hríð. Hann hafði það einu sinni að atvinnu, en er nú á eftirlaunum.  Það er einmitt áberandi að vísdómsmenn sem taka kröfuglegast til máls gegn bókun 35 eru margir á eftirlanum, en ekki á fóðrum með beinum eða óbeinum hætti hjá hinu opinbera. 

 

Jón Steinar mælir svo um bokun 35 (án feitletrunar):

"Í þessu felast fyrirmæli um að eldri reglur skv. EES-samningnum skuli ganga fyrir yngri lögum sem Alþingi setur ef ekki er efnislegt samræmi á milli. Þetta felur það í sér að löggjafarvald Alþingis er takmarkað, því að ný sett lög á Alþingi víkja auðvitað ævinlega til hliðar eða fella niður eldri lagareglur ef efnislegt ósamræmi er til staðar. Í reynd er því lagasetningarvald Alþingis takmarkað að þessu leyti án þess að stjórnarskráin heimili slíkt.

 

Ekki verður annað séð en að sú skipan sem felst í þessu frumvarpi standist ekki nema stjórnarskránni sé fyrst breytt og í hana sett ákvæði sem heimilar þetta. Alþingismönnum er skylt að haga störfum sínum að lagasetningu samkvæmt þeim heimildum sem stjórnarskráin veitir. Þess vegna hefur Alþingi ekki stjórnskipulega heimild til að lögfesta þetta frumvarp."

 

 

Það er stórundarlegt að Alþingismenn séu enn að ræða þetta mál, í stað þess að leggja það orðalaust til hliðar vegna þess að þeir hafa enga heimild til gjörningsins!

 

 

Og að öðru máli; Í umræðum á Alþingi, og viðar, er reynt að búa til þá fortíð að EES-samningurinn hafi verið samþykktur nánast samhljóða á sínum tíma.  Því fer fjarri, eins og Jón Bjarnason fv. ráðherra rifjar upp. Hin raunverulega afgreiðsla fólst í atkvæðagreiðslu um frávísun og fóru atkvæði 33:30.  EES-menn rétt mörðu það.

 

https://jonbjarnason.blog.is/blog/jonbjarnason/

 

 

 

 

 

Fátt um svör

Annar punktur upptalningarinnar í fyrradag hljóðaði svo:

2. Bókun 35 stenst ýmist ekki eða líklega ekki stjórnarskrá að rökstuddu mati margra helstu stjórnspekinga landsins, þar á meðal fv. forseta hæstaréttar og háskólamanna í lögum. Sama sögðu sérfræðingar utanríkisráðuneytis árið 2020 og núverandi innviðaráðherra í fyrra. (sjá t.d. umsagnir Hjartar J. Guðmundssonar og Arnars Þórs Jónssonar sem eru á https://www.althingi.is/thingstorf/thingmalin/erindi/156/85/?ltg=156&mnr=85). Óþarfi ætti að vera að minna Alþingismenn á að þeir hafa svarið eið að stjórnarskrá lýðveldisins, en skal það samt gert hér.

 

Auk þeirra Markúsar fv. foreta hæstaréttar og Stefáns Más, lagaprófessors má nefna til sögunnar menn sem seint verða taldir aukvisar í lögum, þá Jón Steinar og Arnar Þór.  Efasemdir þessarra manna eru miklar, svo vægt sé til orða tekið, og vel rökstuddar.

Svar Alþingismanna, sem styðja bókun 35 er efnislega ekki neitt og þetta ekki neitt drukknar í lofgjörð um EES-samninginn, sem þó er vitað að skiptir hag Íslendinga furðu litlu máli. 

 

Undarleg rök þingmanna

Bókun 35 er til umfjöllunar á Alþingi.

Fylgismenn tilflutnings valds frá kjörnum fulltrúum Íslendinga til Evrópusambandsins hafa sitthvað um máið að segja.  Flest er það skrýtið. 

 

Sagt er að bókun 35 sé til að auka réttindi fólks. 

 

Í fyrsta lagi:

Augljóst má vera að gjörningur á við bókun 35 getur virkað í báðar áttir hvað réttindi varðar.  Ef Alþingi ákveður að bæta réttindi með einhverjum hætti og það gengur gegn lögum með uppruna í Evrópusambandinu, víkja réttindin. 

 

Í öðru lagi:

Sé vilji til að bæta réttindi með einhverjum hætti er Alþingi í fullum færum til að gera það.  Það verður ekki gert með því að gefa erlendum rétti forgang á Íslandi, óháð málefni.

 

 

Sagt er að nýfallinn dómur hæstaréttar kalli á bókun 35

Í fyrsta lagi: 

Það er ekki hlutverk hæstaréttar að panta lög frá Alþingi.  Svoleiðis gera menn ekki, enda byggir umræða á þeim nótum á frjálslegri túlkun á dómi hæstaréttar

 

Í öðru lagi:

Alþingi getur hæglega bruðist við því réttindamáli sem hæstaréttardómurinn fjallar um með breytingu á lögum.  Ekkert kallar á breytingu á almennum forgangi Evrópulaga í því sambandi. 

 

Sagt er að ef Íslendingar hlýði ekki fari málið fyrir dómstól EFTA. 

Það er alerlegsa að meinalausu.

 

Almennt einkennir umræðuna að þingmenn sem vilja ganga í Evrópusambandið tala um sambandið eins og um guðlega veru, sem verður að hlýða, sé að ræða. 

Það minnir okkur á að það er tímabært að endurskoða samband Íslands við gömlu nýlenduveldin á meginlandi Evrópu með það fyrir augum að styrkja íslenskt stjórnvald.  Eðilegt væri að skoða víðtækan fríverslunarsamning í þeim dúr sem gerður hefur verið við Bretland.

 

 

 

 

7 aðalatriði

Alþingi virðist ætla að taka bókunarslaginn. Heimssýn hvetur þingmenn til að sýna skynsemi og virða stjórnarskrána. Hér eru stóru punktarnir:

 

1. Bókun 35 geirneglir kerfi sem er á afar gráu svæði gagnvart stjórnarskrá og hugmyndum alls þorra fólks á Íslandi um lýðræði. Kerfið gengur út á að færa dóms- og einkum löggjafarvald í sívaxandi mæli til embættismanna erlends ríkjasambands.

2. Bókun 35 stenst ýmist ekki eða líklega ekki stjórnarskrá að rökstuddu mati margra helstu stjórnspekinga landsins, þar á meðal fv. forseta hæstaréttar og háskólamanna í lögum. Sama sögðu sérfræðingar utanríkisráðuneytis árið 2020 og núverandi innviðaráðherra í fyrra. (sjá t.d. umsagnir Hjartar J. Guðmundssonar og Arnars Þórs Jónssonar sem eru á https://www.althingi.is/thingstorf/thingmalin/erindi/156/85/?ltg=156&mnr=85). Óþarfi ætti að vera að minna Alþingismenn á að þeir hafa svarið eið að stjórnarskrá lýðveldisins, en skal það samt gert hér.

3. EES-samningurinn hefði að öllum líkindum aldrei verið samþykktur með bókun 35 innanborðs. Það eru mjög vond og óeðlileg vinnubrögð að koma valdaframsali í gegnum Alþingi með því að kippa framsalið í litla búta og þröngva þeim svo einum og einum í gegn.

4. Bókun 35 er ný forgangsregla sem setur lagasafn Íslands í uppnám. Hvaða lög falla úr gildi? Það er vægast sagt óljóst Mun fyrirvari um sæstreng í lögum um orkumál verða að engu, svo dæmi sé tekið? Áður en Alþingi samþykkir bókun 35, standi vilji til þess, þarf að svara spurningum af þessu tagi.

5. Bókun 35 flækir stjórnkerfi Íslands. Það er dýrt og það geri óinnvígðum enn erfiðara að átta sig á hvað gildir og hvað ekki.

6. Það er óljóst hver hin raunverulega ástæða er fyrir því að utanríkisráðuneytið leggur allt í einu svona mikla áherslu á að Alþingi samþykki bókun 35. Fjarvera bókunar 35 í þá 3 áratugi sem EES hefur verið í gildi hefur ekki verið til teljandi vandræða og það er líka vandræðalaust að leyfa málinu að fara fyrir dóm, sé það vilji þeirra sem ráða í Brussel.

7. Meirihluti þjóðarinnar er andvígur bókun 35, skv. skoðanakönnun Prósents í september 2024. Núverandi ríkisstjórn hefur sagt að mikilvægt sé að leyfa þjóðinni að ráða í svokölluðum Evrópumálum. Nú er ágætt tækifæri til þess.

 

https://www.visir.is/g/20252703654d/nokkur-atridi-i-orstuttu-mali-vardandi-bokun-35