Evrópuhreyfingin og hervæðing Íslendinga

Sífellt verður ljósara að Evrópusambandið stefnir hraðbyri í stórfellda hervæðingu.   Og líklega stríð við Rússa þegar fram í sækir. 

Það mun bæði verða þörf á fallbyssufóðri og fleirum til að borga reikningana fyrir herveldið. Íslendingar teljast ágætir í bæði verkefnin. 

Fulltrúi evrópskra Evrópuhreyfinga, sem oft hefur sagt að of hægt gangi í þessum málum heimsótti Viðreisn um daginn og talaði við samherja sína.  Evrópuhreyfingin á Íslandi er aðili að umræddu félagi Evrópuhreyfinga, sem er vel að merkja á fóðrum hjá Evrópusambandinu. 

Hjörtur afhjúpar málið í grein sem hér er tengill á.  

Ætli kjósendur Viðreisnar sem héldu að þeir væru að styðja aðhlynningu geðsjúkra á Íslandi en ekki hervæðingu Íslands og Evrópu hafi áttað sig á þessari stefnu utanríkisráðherra flokksins? 

https://www.stjornmalin.is/?p=29544

 

 

Verhofstadt og Gosi

Viðtalið við Guy Verhofstadt hefur sitthvað meira að geyma.

Verhofstadt á sér draum um stóra og sterka Evrópu.  Í Evrópu Verhofstadts vinna Íslendingar yfirvinnu til að fóðra hergagnaiðnað gömlu evrópsku nýlenduveldanna.  Hann reynir að sannfæra Íslendinga um að það færi þeim öryggi.  Því trúir vitaskuld enginn á Íslandi, nema kannski sumir af þeim sem buðu honum í heimsókn.  

Fyrir nokkrum árum ávarpaði Guy Verhofstadt almúgann í Kænugarði.  Þar lofaði hann gulli og grænum skógum frá Evrópusambandinu og hvatti innfædda áfram sem mest hann mátti.  Nú nennir enginn að hlusta á hann þar í sveit og þá fer hann til Íslands til að kyrja sama söng; loforð um gull og græna skóga, bara ef við föllum fram og færum honum og vinum hans völdin á Íslandi. Það sé í góðu lagi því þeir séu svo góðir og svo fái Íslendingur sæti við veisluborð í Brussel.  

Sjaldan hefur meintur Íslandsvinur líkst skúrkunum sem blekktu Gosa forðum meira en Guy þessi Verhofstadt.

 

 

Kostulegt viðtal við trúboða

Guy Verhofstadt er sérstakur áhugamaður evrópskt stórríki.  Stjórnmálaflokki, sem heitir Viðreisn, þykir hann mikill spekingur og reynir að gera hann að Íslandsvini. 

Guy þessi lætur gamminn geisa í Vísi og gerir t.d. mikið úr meintum erfiðleikum Breta eftir Brexit. Það kallar á gagnaskoðun.  Samkvæmt tölum frá Alþjóðabankanum, sem finna má á tenglinum hér að neðan voru þjóðartekjur á mann (GNI pr. capita) í Bretlandi, sem hlutfall af tekjum í löndunum sem stjórna Evrópusambandinu, Frakklandi og Þýskalandi þessar:

 

Tekjur Breta (GNI) árið 2020: 

98,1 af tekjum Frakka

80,3% af tekjum Þjóðverja

 

Tekjur Breta (GNPI) árið 2024:

107,8% af tekjum Frakka

88,5 af tekjum Þjóðverja

 

Eftir Brexit hefur með öðrum orðum gengið mun betur að afla aura í Bretlandi en í stóru Evrópusambandslöndunum.  Það er kannski ekki Brexit að þakka, en þessar tölur ríma engu að síður frekar illa við meint stórkostlegt tap Breta af að hætta í Evrópusambandinu.  

Það verður seint sagt að málflutningur Evróputrúboðsins mótist af gögnum og staðreyndum, enda væri þá málstaðurinn algerlega vonlaus.  

 

https://data.worldbank.org/indicator/NY.GNP.PCAP.CD?end=2024&locations=GB-FR-DE&start=2000 

https://www.visir.is/g/20252778330d/esb-myndi-taka-is-landi-opnum-ormum

 

Sprengdur fyrir hið evrópska föðurland

Íslenskur stjórnmálaflokkur heldur landsfund.  Heiðursgestur fundarins er maður sem helst er þekktur fyrir að vilja hraða samruna í Evrópusambandinu.  Lokamarkmiðið er eitt stórt sambandsríki.  Það er ekki, og hefur ekki verið, neitt leyndarmál. Afstaða Viðreisnar er það svosem ekki heldur, en verður enn skýrari þessa dagana. 

Ætli það hafi farið framhjá Viðreisnarmönnum að Evrópusambandið á í blóðugri styrjöld við mesta kjarnorkuveldi heims?  Það er stórveldi sem telur sig ekki hafa efni á að tapa styrjöldinni sem nú þegar hefur líklega kostað milljón mannslíf.  Bandaríkin hafa að mestu gefist upp og leita allra leiða til að losna frá þessu stríði. Á sama tíma vilja stærstu Evrópuríkin, sem stjórna Evrópusambandinu, og Evrópusambandið sjálft sprengja meira.

Enginn veit hvað þegnréttur í Evrópusambandi mun í framtíðinni fela í sér.  Það er þó ljóst að þeir Íslendingar sem eru lítið spenntir fyrir því að afkomendur þeirra verði drepnir fyrir hið evrópska föðurland munu hugsa sig tvisvar um áður en þeir flytja inn í stofur Evrópusambands. 

https://www.mbl.is/frettir/innlent/2025/09/21/segir_vidreisn_afhjupa_sig/

Bakdyralykillin notaður að öryggis og varnarsamstarfi við ESB

Ríkisstjórnin undirbýr yfirlýsingu sem myndi hlekkja Ísland formlega við ESB á sviði öryggis- og varnarmála, án aðkomu Alþingis eða þjóðarinnar.

Þegar Ursula von der Leyen, forseti framkvæmdastjórnar ESB, heimsótti Ísland í sumar hitti hún forsætisráðherra á Keflavíkurflugvelli, á sjálfu "öryggissvæðinu". Þar var lagt upp með að undirbúa samstarfsyfirlýsingu milli Íslands og Evrópusambandsins um öryggis- og varnarmál. Forsætisráðherra Kristrún Frostadóttir sagði berum orðum að slíkt samkomulag gæti orðið tilbúið til undirritunar fyrir árslok.

Samstarfsyfirlýsingin yrði fyrsta skjalfesta skrefið til að tengja Ísland formlega inn í varnarkerfi Evrópusambandsins. Hún verður fyrsta yfirlýsingin sinnar tegundar milli Íslands og ESB á sviði öryggis- og varnarmála og það sem skiptir mestu máli: hún yrði undirrituð af ríkisstjórninni einni saman, án þess að Alþingi fengi málið til umfjöllunar.

Gæðingarnir við hlið ráðherranna
Kristrún hefur Dag B. Eggertsson sér við hlið sem skrifaði undir skýrslu nefndarinnar, þar sem meginstoðir íslenskra varna eru skilgreindar sem aðildin að NATO og varnarsamningurinn við Bandaríkin, en skrifaði svo í kjallaragrein í Morgunblaðinu að Ísland ætti að halla sér að Evrópusambandinu "eins nánum böndum og kostur er" í varnarmálum. Þorgerður Katrín getur á sama hátt treyst á sinn gæðing, Aðalstein Leifsson aðstoðarmann, sem sat í sömu nefnd og Dagur og stýrði vinnunni við þessa sömu skýrslu sem ráðherrann sjálf virðist þó ekki leggja til grundvallar í sínum málflutningi.

Og hér blasir sú hætta að ríkisstjórninni takist að "hlekkja Ísland við Evrópusambandið" í öryggis- og varnarmálum með bakdyralyklinum einum saman undir nafninu samstarfsyfirlýsing. Alþingi og þjóðin sitja eftir, með fréttatilkynninguna eina til að lesa.

Fréttin sem vitnað er til birtist á arctictoday.com, þann 20. júlí 2025 "Iceland to launch negotiations on security, defense partnership with EU"

Góðan daginn forsætisráðherra - áttu aldrei viðtalsbil, bara þögn?

Þegar varnar- og öryggismál eru til umræðu er hún hvergi sjáanleg

Það er ljóst að þjóðaröryggi og almannavarnir heyra að hluta undir forsætisráðuneytið, ekki aðeins utanríkisráðherra. Forsætisráðherra er leiðtogi ríkisstjórnarinnar og formlega ábyrg fyrir heildarsamhæfingu. Af hverju heyrist þá ekkert frá henni nú þegar ný skýrsla um varnar- og öryggismál liggur fyrir, skýrsla sem segir skýrt að ESB leiki ekki einu sinni aukahlutverk á þessu sviði?

Þögn hennar getur ekki talist eðlileg í ljósi þess hvernig utanríkisráðherra og jafnvel samflokksmenn hennar, hafa þvert á móti talað upp mikilvægi nánara samstarfs við ESB til að tryggja öryggi landsins. Þetta getur hvorki talist hlutleysi né afstaða, enda hvorugt boðlegt þegar þessi mál eru á dagskrá.

Spurningarnar eru margar:

Hvers vegna er leiðtogi ríkisstjórnarinnar ósýnilegur þegar öryggismál eru rædd opinberlega?

Hvernig getur hún látið aðra, í þessu tilviki utanríkisráðherra og fyrrverandi borgarstjóra, stilla Íslandi upp sem peði á taflborði Evrópusambandins án þess að segja sjálf orð?

Er þögnin bara gamla þegjandi samþykkið? Forsætisráðherra á að gera betur ekki satt?

Forsætisráðherra er líka leiðtogi stærsta flokksins í ríkisstjórn og sú sem ber endanlega ábyrgð á heildarstefnu hennar. Þess vegna er þögn ekki í boði. Hún skilur eftir pólitískt tómarúm sem aðrir fylla með því að herða umræðuna um bókun 35, aðlögun fjárlaga að kröfum ESB og stækka reikninginn fyrir flugmiðakaup fyrir opinbera starfsmenn á fundi og námskeið í Brussel.

Þjóðin á betra skilið en þögn.

"Af stað út í heim litli kútur..." – og nú með skriðdreka

Dagur B. Eggertsson er kominn aftur. Nú með pistil um öryggis- og varnarmál þar sem hann kallar eftir því að Ísland tengist Evrópusambandinu "eins nánum böndum og kostur er" á þessu sviði.

Sami maður játaði fyrir skemmstu að "hrollur" hefði farið um hann þegar hann spurði yfirmann NATO hvort Ísland ætti að stofna her – því hann vissi ekki hvað hann hefði gert við svarið ef það hefði verið já.

Það er erfitt að lesa þetta án þess að rifja upp skopmynd Halldórs Baldurssonar á Vísi 13. september þar sem Þorgerður Katrín ýtir leikfangaskriðdreka út í heim, mannaðan dáta með íslenska fánann í hönd. Já, litli kúturinn er orðinn herskárri en áður, með skriðdreka undir sér.

Þarna sjáum við mynstrið skýrt:

Spurningum og fullyrðingum er kastað út, án þess að reiknað sé með því að nokkur þori að bregðast við.

Lagt er í vegferð að skuldbindingum sem enginn þorir þó að segja skýrt hverjar eru.

Allt ber þetta að sama brunni: sjónhverfingar í stað stefnu.

Dagur stillir sér upp sem hugmyndasmiður varnar- og öryggisstefnu Íslands, þó hann viðurkenni á sama tíma að hann þori ekki að horfast í augu við afleiðingar eigin spurninga. Nú vill hann opna bakdyr fyrir Evrópusambandið í íslenskum varnarmálum, þrátt fyrir að engin skuldbinding við ESB knýi þar á.

Þetta er sami leikurinn og í aðildarbröltinu: fyrst er talað um "samráð" og "öryggi". Síðan er bætt við "réttaröryggi" og "sameiginlegar varnir" og allt í einu erum við búin að undirgangast skuldbindingar sem aldrei hafa verið bornar undir þjóðina.

Það er ekki stefnumótun að setja Ísland í fang ESB með hauspoka yfir höfðinu. Það er ekki forysta að bjóða þjóðinni upp á væntingar sem menn þora ekki einu sinni sjálfir að lifa við.

Hér eru ekki hagsmunir Íslands í fyrirrúmi. Þetta snýst um að safna stjörnum í hegðunarkladda Brussel, rétt eins og krakkar fá stjörnur fyrir að setja diskinn sinn í vaskinn eftir matinn.

Alþingi veikt í nafni "réttaröryggis"

Þorgerður Katrín Gunnarsdóttir, utanríkisráðherra og formaður Viðreisnar, hefur gert innleiðingu bókunar 35 að sínu forgangsmáli í þinginu. Hún kallar það "prinsippmál" um að standa við skuldbindingar Íslands gagnvart EES og talar um að tryggja "réttaröryggi" einstaklinga og fyrirtækja. En það er ekki smámál þegar Alþingi er sett í það hlutverk að stimpla eigin veikingu og það gert í nafni "réttaröryggis".

Hvað felst í þessu í reynd? Bókunin setur skýra forgangsreglu sem gefur EES-reglum forgang fram yfir lög frá Alþingi. Það er ekki smámál þegar Alþingi er veikt með þessum hætti og það án þess að það hafi verið borið undir þjóðina.

Í þessu sambandi má spyrja: Hverjar eru skuldbindingar Íslands í þessu samhengi? Bókun 35 hefur verið hluti samningsins allt frá upphafi. Engin krafa var gerð um breytingu á bókuninni fyrr en rúmum 25 árum eftir gildistöku samningsins. Í viðtali við Morgunblaðið 16. september 2024 sagði Carl Baudenbacher, fyrrverandi forseti EFTA-dómstólsins til margra ára, að á "meðan ég var í dómnum var ég þeirrar skoðunar að Ísland hefði ekki innleitt bókunina með réttum hætti og að því bæri að gera það. En það mætti líka segja að þetta ástand hafi varað svo lengi og án teljandi vandkvæða, að það væri ástæðulaust með öllu að hrófla við því."

Ekki einu sinni fyrrverandi forseti EFTA-dómstólsins til margra ára sér tilefni til að hrófla við þessu fyrirkomulagi. Að gera bókun 35 að forgangsmáli nú er því hvorki prinsipp um lýðræði né réttaröryggi, heldur er verið að veikja Alþingi.

Þetta er í andstöðu við íslenska hagsmuni.