Félagsfundur kl. 10-11:45 laugardaginn 8. febrúar

Almennur félagsfundur Heimssýnar verður í Kastalakaffi, hjá Hjálpræðishernum, austast við Suðurlandsbraut kl. 10-11:45 laugardaginn 8. febrúar 2025.  

Rætt verður um verkefnin framundan

Allir fullveldissinnar velkomnir

Stjórnin

 

Trump, Ásgeir og Þorgerður

Allir leggjast nú á eitt við að útskýra fyrir Íslendingum að það sé þeim hollast að stjórna málum sínum sjálfir, í stað þess að láta valdið í hendur erlends ríkjasambands. 

Trump, forseti í vesturheimi segist ætla í tollastríð við Evrópusambandið og Ásgeir seðlabankastjóri og Þorgerður Katrín, utanríkisráðherra, segja hvort með sínum hætti að Ísland eigi ekki að taka þátt í slíku stríði, það yrði hræðilegt. 

Eina leiðin til þess er vitaskuld að vera ekki í Evrópusambandinu. 

Það er heldur ekki vit í að ganga inn eftir að stríðinu lýkur, nema menn séu sannfærðir um að mannkyn muni aldrei framar fara í stríð og fjöldamargt annað sem ekki mun ganga eftir.

 

https://www.ruv.is/frettir/innlent/2025-02-05-vill-ad-island-fylgi-noregi-komi-til-tollastrids-435302

https://www.stjornmalin.is/?p=7062

 

 Almennur félagsfundur Heimssýnar verður í Kastalakaffi, austast við Suðurlandsbraut kl. 10-11:45 laugardaginn 8. febrúar 2025.  

 

Björn og Ögmundur lýsa upp ormagryfjuna

Sitthvað fer framhjá mönnum í myrkviðum alnetsins.  Ögmundur tók þó eftir merkilegri frétt Björns Malmquists.

Þar eru tvö atriði sem ættu að yfirgnæfa opinbera umræðu. 

Í fyrsta lagi er upplýst að ónefndir embættismenn hafi tilkynnt Evrópusambandinu að Ísland sætti sig við orkulagabálk númer 4.  Hvaðan kom þeim sú heimild? Er það fyrirskipun frá utanríkisráðherra?  Gleymdi hann að spyrja Alþingi, eða telur hann að það sé hlutverk annarra en Alþingis að setja lög á Íslandi?

Í öðru lagi er upplýst að Evrópusambandið sendir Norðmönnum fyrirmæli um hverjir megi og hverjir megi ekki koma í norskar hafnir.  Svoleiðis tilskipun frá útlöndum hefði líklega ekki komið Norðmönnum á óvart í ársbyrjun 1945, en kemur óneitanlega á óvart árið 2025.

Væri ekki rétt að Björn eða aðrir fréttamenn fylgdu þessum málum eftir?

https://www.ogmundur.is/is/greinar/grimulaust-evropusamband-og-grimulaust-island

https://www.ruv.is/frettir/erlent/2025-01-29-nordmenn-i-kroppum-dansi-gagnvart-evropusambandinu-434467

 

Almennur félagsfundur Heimssýnar verður í Kastalakaffi, austast við Suðurlandsbraut kl. 10-11:45 laugardaginn 8. febrúar 2025.  

Frumleg rök Sigmars

Þegar rök vantar, en þörf er á þeim til að koma einhverju máli áfram, verður útkoman stundum skrýtin. 

Sigmar Guðmundsson, þingmaður Viðreisnar, segir að Alþingi þurfi að samþykkja forgang laga sem byggja á fyrirmælum frá Evropusambandinu, til að efla jafnræði.  Lögin heita "bókun 35".

Sé þörf á að efla jafnræði á einhverju sviði er Alþingi í lófa lagið að setja um það lög.  Rétta leiðin til þess er ekki að búa til nýja forgangsreglu með ófyrirsjáanlegum afleiðingum. 

Þess utan felst enginn augljós skortur á jafnræði í því að á Íslandi gildi íslensk lög, fyrir alla sem þar eru, og að í ótilgreindu Evrópusambandsríki gildi Evrópulög eða lög ríkisins, fyrir alla sem þar eru.  

Hvað skyldi koma næst?  "Bókun fyrir betra veður"?  Það stuðlar að minnsta kosti. 

https://www.ruv.is/frettir/innlent/2025-02-04-hver-er-ad-fara-ad-borga-thetta-allt-saman-435010

 

Norski farsinn

Umræðan um fjórða orkupakka Evrópusambandsins sem sprengdi norsku ríkisstjórnina er keimlík því sem var á Íslandi þegar sá þriðji var til umræðu. 

Hún er svona í örstuttu máli:

Ráðherra: Við verðum að samþykkja orkubálkinn.  Evrópusambandið leggur á það áherslu.  Það er líka allt í lagi því áhrifin verða sáralítil. 

Andstaðan: Það bendir allt til þess að áhrifin verði mikil og óhagstæð.  En hvers vegna skiptir svona miklu máli að samþykkja, ef áhrifin eru "sáralítil"?

Við þessari spurningu hefur aldrei komið boðlegt svar.  Þess í stað er þyrlað upp umræðuryki þar til flestir hafa gefist upp að fylgja þræði, sem oftast er slitinn og tættur.

 

Norski farsinn er líka íslenskur farsi, og margt bendir til þess að núverandi ríkisstjórn ætli að bjóða til sýningar innan skamms. Þá þurfa Íslendingar að taka fast á móti. 

 

Strætóstelpurnar

Sumir virðast telja að verðmæti sem mæld eru í peningum verði til með því að færa þau úr einni hendi í aðra nógu oft án þess að nein þjónusta eða vara verði til. 

Gullkornið um strætóstelpurnar tekur á því. Það eldist vel. 

https://www.youtube.com/watch?v=LMgAdI1pgso

Kverkatak

Snorri Másson birtir upptöku af átakamikilli ræðu sem Kristján Ingi Mikaelsson hélt á ráðstefnu um tækniframfarir.  Þar kemur fram að reglufargan Evrópusambandsins, sem Íslendingar fá sent í pósti með viðeigandi fyrirmælum frá Brussel, sé að ganga af gervigreindarfrumkvöðlastarfsemi dauðri í Evrópu. 

Það kemur ekki beinlínis á óvart.

Er ekki kominn tími til að endurskoða samstarf Íslendinga við það sem eftir er af Evrópusambandinu með víðtæka fríverslun sem markmið?

 

https://www.facebook.com/thykki97/videos/4006463699642875

Gömlu nýlenduveldin gabba mann og annan

Haraldur Ólafsson formaður Heimssýnar var í áhugaverðu viðtali á Útvarpi Sögu í gær (30.01.2025) þar sem m.a. var farið yfir stjórnarslit Miðflokksins og Verkamannaflokksins í Noregi.

Haraldur fór þar yfir hvernig ágreiningur um hinn svokallaða fjórða orkupakka Evrópusambandsins varð til að slíta samstarfinu. Norski Miðflokkurinn hefur tekið harða afstöðu gegn pakkanum sem hann telur hálfgert rothögg fyrir norskan iðnað. Trygve Slagsvold Vedum formaður norska Miðflokksins hefur látið hafa eftir sér að Norðmenn hafi látið gabba sig þegar sæstrengir voru lagðir til ESB landa í tíð síðustu ríkisstjórnar.

Það var því von að hugtakið nýlenduveldi bæri á góma í samræðum Haraldar við þáttastjórnandann. ESB hefur botnlausa þörf fyrir orku til iðnaðar, húshitunar, ljósa o.s.frv. Um hábjarta sumarnóttina hér uppi undir Heimskautsbaug þarf að lýsa upp borgir Evrópu. Þetta hefur hækkað verð á orku, einnig í Noregi þar sem fólk hefur vart lengur efni á að hita hús sín.

Og hvaðan á þá öll orkan í þetta "gímald" að koma eftir að Þjóðverjar lokuðu kjarnorkuverum sínum. Jú það er altalað og sagt upphátt að gömlu nýlenduveldin í ESB horfi þar til grænnar orku frá Noregi og Íslandi. (Raunar er Svíar ekki par hressir heldur eins og áður hefur verið greint frá hér á Heimssýnar blogginu.) Heimsmynd valdhafa í þessum löndum virðist þannig snúast um að orka verði framleidd í öðrum löndum en þeirra eigin með vatni, vindi, sjávarföllum eða öðru sem tiltækt er. Þett má bara ekki gerast í bakgörðum heima hjá þeim þar sem hávært nauðið í vindmyllunum bergmálar í kristalsglösunum í glasahringlinu í Brussel og plastflísarnar af spöðunum á þeim setjast á kavíarinn á snittunum.

Grjótkastið með Jóni Baldvin

Til þess að aðildarríki ESB, geti orðið aðilar að Myntbandalagi Evrópu (EMU) og tekið upp evru verða þau að fullnægja svokölluðum Maastricht-skilyrðum, sem samþykkt voru árið 1992 sem hluti af Maastricht-samningnum.

Í þessum skilyrðum felast strangar kröfur um efnahagslegan stöðugleika, þar á meðal verðbólgu og gengisstöðugleika, opinbera fjármálastjórn og skuldstöðu viðkomandi ríkis. Jón Baldvin Hannibalsson, fv. utanríkisráðherra, benti nýverið á í hlaðvarpinu Grjótkastið að Ísland hafi yfirleitt ekki uppfyllt þessi skilyrði og sé langt því frá að uppfylla þau nú.

Sem dæmi má halli á rekstri hins opinbera má ekki vera meiri en 3% af landsframleiðslu. Á árunum 2020-2023, en nýrri tölur liggja ekki fyrir hjá Hagstofu Íslands, var halli á rekstri hins opinbera hér á landi um 5,8% að jafnaði.

Þá mega opinberar skuldir ekki nema meira en 60% af landsframleiðslu. Heildarskuldir ríkissjóðs í árslok 2023 námu 81,1% af landsframleiðslu samkvæmt upplýsingum frá Hagstofu Íslandis.

Hagkerfi Íslands er smátt og opið og þar gegna ferðaþjónusta og fiskveiðar ásamt orkuframleiðslu og iðnaði lykilhlutverki. Þetta þýðir að efnhagsstoðir landsins eru ólíkar flestum ríkjum ESB sem hafa fleiri og eftir atvikum aðrar efnhagslegar stoðir eins og framleiðslu flókins vélbúnaðar, hátækniiðnað, margþætta fjármálastarfsemi, sértæka þjónustustarfsemi o.s.frv. Þarfir framleiðslustarfseminnar fara því ekki saman sem þýðir að það er fremur ólíklegt að sameiginleg mynt, sem stýrt er af ESB henti Íslandi eins og Jón Baldvin Hannibalsson kom inn á í fyrrnefndum hlaðvarpsþætti.

Veruleg áskorun er fyrir Ísland að uppfylla Maastricht-skilyrðin. Slík vegferð er líkleg til að taka hið minnsta 15 ár eins og Jón Daníelsson hagfræðiprófessor hefur bent á. Á þeim tíma yrði að lágmarki kosið þrisvar og jafnvel fjórum til fimm sinnum til Alþingis. Óraunhæft er að leggja í slíka vegferð með veikan stuðning við málið. Gleymum ekki að frá þingkosningunum 2013 hafa flokkar andvígir ESB aðild ávallt fengið meirihluta atkvæða. ESB aðild var raunar mjög lítið til umræðu fyrir síðustu kosningar og einn þeirra flokka sem mynda nú nýja ríkisstjórn lýsti afdráttarlausri andstöðu við aðild fyrir kosningar. Enginn þingmeirihluti er því nú fyrir málinu frekar en endranær.

Það er ekki af tilefnislausu sem ESB gerir þá almennu kröfu til ríkja sem sækja um aðild að þar hafi verið stöðugur meirihlutastuðningur við aðild að bandalaginu meðal þings og þjóðar. Ella má búast við að fjármunum og kröftum sem í aðlögunarferlið fara sé kastað á glæ, bæði af hálfu ESB og Íslands.

Evran tryggir ekki aukinn hagvöxt

Hagvöxtur á mann á föstu verðlagi í dollurum m.v. árið 2015, á tímabilinu 2000-2023 hefur numið 1,47% að meðaltlai á tímabilinu. Það er nokkuð hærra en í ESB og umtalsvert hærra en í evru-löndunum, 0,9%. Það merkir að á þennan mælikvarða hefur frammistaða íslenska hagkerfisins verið að batna hraðar en í samanburðarlöndunum. Meðfylgjandi tafla sem byggir á upplýingum frá Alþjóðabankanum sýnir þetta.

Hagvöxtur í löndum sem ekki tilheyra Myntbandalaginu hefur þannig verið meiri en í ESB-löndunum sem tekið upp Evru. Grikkland strögglar enn og þegar hagvöxtur er til lengri tíma undir meðaltali ESB þýðir það að landið dregst smám saman aftur úr í lífskjörum.

Grikkland 0,7%
Evrusvæðið 0,9%
Danmörk 0,95%
Þýskaland 1,02%
Svíþjóð 1,17%
ESB 1,27%
Ísland 1,47%

Þess má geta að umræddur mismunur í hagvexti milli Íslands og Evru-landanna upp á 0,57% á ári þýðir um 2,9% í VLF á mann eftir 5 ár og um 5.9% eftir 10 ár.

Ríkisstjórnir fá meiri skatttekjur sem hægt er að nota til að fjármagna opinbera þjónustu eins og menntun og heilbrigðiskerfi. Meiri tekjur og hagnaður í hagkerfinu eru grundvöllur aukinna fjárfestinga sem styðja við batnandi lífskjör.

Tala staðreyndir ekki sínu máli?