Vaxandi andstaða í Noregi við Evrópusambandsaðild

Norska dagblaðið Dagen greindi í gær frá niðurstöðum nýrrar skoðanakönnunar á afstöðu Norðmanna til Evrópusambandsaðildar. 51% aðspurðra sögðust andvíg aðild en einungis 37,6% hlynnt slíkum ráðahag. Sé aðeins miðað við þá sem tóku afstöðu eru 57,5% andvíg inngöngu í Evrópusambandið en 42,5% henni hlynnt.

Andstaða við Evrópusambandsaðild hefur ekki mælst meiri í Noregi síðan í apríl á síðasta ári að sögn Dagen. Andstæðingar aðildar hafa verið í samfelldum meirihluta í Noregi allt frá því fyrirhugaðri stjórnarskrá Evrópusambandsins var hafnað í þjóðaratkvæðagreiðslum í Frakklandi og Hollandi í byrjun sumars 2005.