Ísland: minna en 1% áhrif í ESB

Samkvæmt könnun Eurobarometer eru 76 prósent Íslendinga sammála fullyrðingunni ,,Á Íslandi skiptir rödd mín máli." Aðeins þriðjungur landsmanna er sammála fullyrðingunni þegar ,,Evrópusambandið" er sett inn fyrir Ísland. Almenningur veit að Ísland væri dæmt til áhrifaleysis í Evrópusambandinu.

Á Evrópuþinginu fengi Ísland fimm fulltrúa af 736 eða innan við 1 prósent áhrif.

Ísland yrði áhrifalaus hreppur í væntanlegum Bandaríkjum Evrópu.

(Tekið héðan.)

 

 

Önugir hrunkvöðlar vilja ESB-aðild

Sjálfstæðir atvinnurekendur eru hvað gagnrýnastir á aðild Íslands að Evrópusambandinu. Aðeins 11 prósent sjálfstæðra atvinnurekenda telja að aðild yrði til hagsbóta, en í öðrum starfsstéttum er hlutfallið 39 - 45 prósent. Könnun Eurobarometer sýnir að stjórnendur og háskólamenn eru hlynntari aðild en þeir eldri og reyndar vilja ekki aðild.

Vinstrimenn eru jákvæðari til aðildar en hægrimenn, íbúar í þéttbýli jákvæðari en þeir sem búa á landsbyggðinni.

Þeir sem eru svartsýnir vilja frekar aðild að Evrópusambandinu en hinir sem eru bjartsýnir.

Dæmigerður íslenskur aðildarsinni er skilgetið afkvæmi hrunsins; millistjórnandi í banka, býr í 101 Reykjavík, kýs Samfylkinguna og er önugur.

Í maí 2010 sögðu 27 prósent Íslendinga hlutina vera á rangri leið á Íslandi, samkvæmt könnun Eurobarometer, í nóvember sama ár var hlutfallið komið upp í 44 prósent. Svartsýni á stöðuna hér heima hækkar hlutfall þeirra sem telja aðild að Evrópusambandinu til hagsbóta, úr 19 prósentum í 28 prósent.

Ísland er í aðlögunarferli að Evrópusambandinu og samt sem áður segja 48 prósent þjóðarinnar að aðild yrði ekki til hagsbóta, 14 prósent merkja við ,,veit ekki."

Líklega veit Samfylkingin að eina leiðin til að auka fylgið við aðild er að gera bölmóðinn sem mestan í þjóðfélaginu. Enda keppist flokkurinn við að auka á eymdina og með þeim árangri að heil 84 prósent þjóðarinnar treystir stjórnmálaflokkum ekki.

Samkvæmt könnun Eurobarometer eru stjórnmálaflokkar síðasta sort á Ísland, ekkert fyrirbæri nýtur minna trausts.

(Byggt á þessu bloggi og þessu hérna)