Lýðræðið og ESB-umsóknin

Í stefnuræðu sinni á mánudagskvöld sagði Jóhanna Sigurðardóttir að umsókn Íslands um aðild að Evrópusambandinu nyti stuðnings þjóðarinnar. Svo er ekki, - 64,5 prósent þjóðarinnar er andvígur aðild samkvæmt skoðanakönnun Gallup.

Lýðræðislegt umboð utanríkisráðherra fyrir umsókninni var veikt frá upphafi. Aðeins einn flokkur hafði aðild að Evrópusambandinu á stefnuskrá sinni við síðustu kosningar, Samfylkingin, og fékk rúm 29 prósent atkvæða. Þegar þingsályktun um að sækja um var borin undir alþingi samþykktu 33 þingmenn en 28 voru andvígir og tveir sátu hjá.

Tillaga Vigdísar Hauksdóttur og fleiri þingmanna um þjóðaratkvæðagreiðslu um framhald viðræðu- og aðlögunarferlis Íslands að Evrópusambandinu hlýtur að vera fagnaðarefni fyrir Jóhönnu Sigurðardóttur forsætisráðherra og aðra aðildarsinna.

Þjóðin fær tækifæri til að segja af eða á um umsóknina. Verði já-ið ofaná er komið lýðræðislegt umboð fyrir umsókn ellegar verður umsóknin afturkölluð.

Þjóðaratkvæði um framhald umsóknarinnar um aðild að Evrópusambandinu er sanngjörn málamiðlun milli stríðandi fylkinga.

 

Vilja atkvæðagreiðslu um framhald aðildarviðræðna