Finnar undirbúa evru-hrun

Finnar vinna að upptöku sjálfstæðs gjaldmiðils til að undirbúa hrun evru-samstarfs 17 ríkja af 27 í Evrópusambandinu. Evrópuvaktinsegir frá frétt Financial Times þar sem þetta er útlistað. Þótt leynt fari er búið að virkja samráð milli helstu stofnana finnsks samfélags um að nýr gjaldmiðill geti verið tekinn í notkun með skömmum fyrirvara.

Í nýrri rannsókn tveggja þýskra hagfræðinga  Jörg König og Renate Ohr, við háskólann í Göttingen, er borin saman samleitni hagkerfa í Evrópusambandinu.

Niðurstöðurnar eru sláandi. Áratugur með evru hefur ekki aukið samleitni hagkerfa í evru-ríkjunum 17. Þvert á mót eru hagkerfi sumra þjóða, Ítalíu og Grikklands, orðin ólíkari hinum hagkerfunum en þau voru fyrir upptöku evrunnar.

Finnar eru með fína stöðu efnahagslega og eru á pari við Þjóðverja, Austurríkismenn og Hollendinga. Á hinn bóginn er komin greiðsluþreyta í finnskan almenning sem horfir upp á Suður-Evrópuþjóðir krefjast æ meiri niðurgreiðslu Norður-Evrópu á lífskjörum sínu.