ESB eyðir 400 milljónum króna í að njósna um skoðanir fólks á netinu

Breska blaðið Daily Telegraph upplýsir hér að ESB hyggist verja sem svarar fjögur hundruð milljónum króna í að fylgjast sérstaklega með þeim sem hafa efasamdir um Evrópusambandið. Jafnframt kemur fram að hugmyndin sé sú að embættismenn ESB hyggist bregðast við slíkri umræðu efasemdarmanna.

Fram hefur komið að ESB ætlaði að verja ríflega 200 milljónum króna til að hafa áhrif á umræðuna hér á landi, m.a. í gegnum svokallaða Evrópustofu.

Frétt á mbl.is um þetta er svohljóðandi:

Evrópuþingið hyggst verja sem nemur um tveimur milljónum punda í eftirlit með fjölmiðlum og umræðum á netinu þar sem efasemdir um Evrópusambandið eru viðraðar vegna áhyggja af því að andúð í garð sambandsins fari vaxandi. Þetta kemur fram á fréttavef breska dagblaðsins Daily Telegraph.

Blaðið byggir frétt sína á trúnaðargögnum sem það segist hafa undir höndum þar sem fram komi tillögur um fjármögnum og aðra skipulagningu á mikilli áróðursherferð í aðdraganda kosninga til Evrópuþingsins sem fram fara í júní 2014. Fram kemur að lykilatriði í herferðinni samkvæmt gögnunum séu aðgerðir til þess að fylgjast með afstöðu almennings og að „greina á fyrstu stigum hvort pólitísk umræða á meðal þátttakenda á samfélagsmiðlum eða bloggsíðum sé líkleg til þess að vekja athygli fjölmiðla eða almennings.“

Ennfremur segir í gögnunum, sem voru samþykkt á síðasta ári samkvæmt fréttinni, að beina þurfi sérstakri athygli að þeim ríkjum þar sem efasemdir um Evrópusambandið hafi farið vaxandi. Þá segir að embættismenn Evrópuþingsins þurfi að geta fylgst með slíkum samskiptum á milli almennings á netinu sem og utan þess með skipulögðum hætti og tekið þátt í þeim og haft áhrif á þau með því að leggja fram staðreyndir og bregðast þannig við goðsögnum um Evrópusambandið. Þjálfun starfsmanna þingsins í þeim efnum hefst síðar í þessum mánuði.

Frétt Daily Telegraph

Vill taka á gagnrýni á ESB á netinu

Athugasemdir

[Jón Valur Jensson, 4.2.2013 kl. 18:19]

Njósnir og sjálfsréttlætingaráróður hafa fylgt öllum stórveldum allt frá 19. öld eða fyrr. Einungis bjartsýnisglópar gera ráð fyrir, að það verði eitthvað annað hjá Evrópusambandinu, samansafni gamalla stórvelda, sem ráða munu þar mestöllu frá 1.11. 2014 (til dæmis munu 10 aflóga nýlenduveldi ráða þar 73,34% atkvæðavægi í hinu volduga ráðherraráði og leiðtogaráði Evrópusambandsins frá sama tíma, en 17 ríki þaðan af minna).

Svívirðilegt er, að núverandi ríkisstjórn lætur það óátalið, að þetta risaveldi ausi hingað inn 230 milljónum króna í áróðursstofu, fyrir utan alla mútustyrkina og fríu ferðirnar til að freista þess að kaupa sannfæringu manna. Meðal styrkþeganna er sjálfur formaður utanríkismálanefndar Alþingis, Árni Þór Sigurðsson, sem fekk 10 millj. kr. dvalarstyrk í Brussel, einnig Eiríkur Bergmann Einarsson (nýtur launa hjá Evrópufræðastofnun í Bifröst, sem er á stórum styrk frá stofnun sem framkvæmdastjórn Evrópusambandsins fjármagnar) og ESB-styrkþeginn Baldur Þórhallsson, varaþingmaður Samfylkingar, og er þó oft kallað í þessa tvo sem hlutlæga fræðimenn!

Það væri svo sem eftir þessari ríkisstjórnarnefnu að bjóða njósnara EBS líka velkomna til að athafna sig hér og beita sér gegn fullveldissinnuðum Íslendingum.

[Einar (IP-tala skráð) 4.2.2013 kl. 21:25]

Þeir eru að safna saman opinberum upplýsingum. Hvernig eru það njósnir? Það er stórt stök milli áróðurs og njósna.

[Sigurður Haraldsson, 4.2.2013 kl. 22:37]

Stríð ó já ég er til gegn þessu ESB hrunaveldi!

[Guðmundur Ásgeirsson, 4.2.2013 kl. 22:49]

George Orwell snýst þrjú þúsund snúninga á mínútu í gröfinni.

[Ingibjörg Guðrún Magnúsdóttir, 5.2.2013 kl. 08:47]

Það eru að koma kosningar og þá mun fólk segja huga sinn í þessu máli...

[Einar (IP-tala skráð) 6.2.2013 kl. 17:15]

Ég býð ennþá eftir viðbrögðum við athugasemdinni minni hér að ofan. Þið farið með rangt mál. Þetta er PR starfsemi þar sem á að flygjast með umfjöllun um evrópusambandið á netinu og bregðast við röngum upplýsingum. Þetta er algeng starfsemi unninn af stjórnmálaflokkum og fyrirtækjum um allan heim og á uppruna sinn frá Bandaríkjunum. Þetta er markaðsáttak. Það má gagngrína en farið þá með rétt mál!