Könnun: Er aðild að evru óafturkræf framkvæmd?

Í umræðum um stöðu þeirra evruríkja sem hafa þurft á neyðaraðstoð að halda á undanförnum árum hefur ítrekað verið rætt um að best væri fyrir þau að yfirgefa evruna. Þetta hefur sérstaklega átt við um Grikkland og Kýpur.

Meira að segja tilteknir ráðamenn hafa haft þetta á orði, en þrátt fyrir mikla erfiðleika hafa ríkin haldið sig við evruna. Kannski er það vegna þess að hinir sameiginlegu björgunarpakkar frá ESB, AGS og Seðlabanka Evrópu eru þannig útbúnir að það er engin önnur leið talin fær. Vandinn sem evran skapar sé mikill og alvarlegur, en staðan yrði geigvænleg ef ríkin reyndu að losna úr spennitreyju evrusamstarfsins.

Nú er ljóst að vandi þessara ríkja hefur verið og verður áfram langdreginn. Atvinnuleysi eykst og er orðið geigvænlegt á ýmsum stöðum. Evran dregur þannig vandann á langinn.

En hvers vegna yfirgefa ríkin ekki evrusvæðið? Er það vegna þess að aðild að evrunni er óafturkræf framkvæmd. Írskur prófessor líkti þessu við það að reyna að yfirgefa evrusvæðið væri eins og að reyna að afbaka pítsu, þ.e. að fá aftur hveitið og önnur hráefni sem fóru í pítsuna til baka. Það er náttúrulega ekki hægt. Aðrir hafa sagt, meðal annars áður en evruvæðingin hófst, að eina leiðin til að losna við evruna væri ef gjalmiðilssamstarfið í heild sinni myndi hrynja - og það með geigvænlegum afleiðingum.

Þess vegna vaknar spurningin - og það svara henni ekki allir á sömu lund - er aðild að evrusvæðinu óafturkræf framkvæmd?

Hægt er að taka þátt í lítilli könnun um þetta með því að svara spurningunni hér til hliðar.

Þarna eru líka fleiri léttar kannanir sem hægt er að taka þátt í.

Athugasemdir

[Ásmundur (IP-tala skráð) 3.4.2013 kl. 08:45]

Nóbelsverðlaunahafinn Paul Krügman telur greinilega ekki svo vera.

Allavega spáði hann því í fyrravor að Grikkir myndu gefa evruna upp á bátinn jafnvel strax í júní.

Það hefur hins vegar verið mikill meirihluti fyrir því í Grikklandi og þeim löndum sem hafa verið í mestum vanda að halda í evruna og ESB-aðildina. 

[Einar (IP-tala skráð) 3.4.2013 kl. 14:42]

Þetta er ekki málefni sem er svarað með könnun. Ef 60% þátttakenda ákveða að epli sé í raun appelsína þýðir það ekki að það sé rétt niðurstaða.

[Ásmundur (IP-tala skráð) 3.4.2013 kl. 14:44]

Björgunarsjóður ESB er ekki aðeins fyrir evrulöndin.

Önnur ESB-lönd geta tekið þátt ef þau vilja. Ef ég man rétt kusu aðeins Bretar og Tékkar að eiga ekki aðild að björgunarsjóðnum.

Seðlabanki Evrópu þjónar heldur ekki bara evrulöndum. Öll ESB-lönd njóta hans.

Strax eftir ESB-aðild erum við því komin í visst skjól sem eykst enn frekar með ERM II myntsamstarfinu sem getur jafnvel hafist um tveim mánuðum eftir aðild.

Í aðdraganda ERM II minnkar væntanlega verðbólga og vextir lækka vegna þess stöðugleika sem er í augsýn.