Staðan á Íslandi er mun betri en á Írlandi

Staðan í efnahagsmálunum á Íslandi er mun betri en á Írlandi. Það var niðurstaðan í máli Stephens Kinsella, írsks hagfræðings, í Silfri Egils í dag. Íslendingar eru að komast út úr kreppunni á meðan Írar eru í henni miðri, nú fjórum árum eftir að bankakreppan hófst.

Fram kom í þættinum að um helmingur húseigenda á Írlandi væri með neikvæða eiginfjárstöðu. Atvinnuleysi er mjög mikið, eða 15% og um 200 þúsund manns hafa verið án atvinnu í meira en ár. Írska ríkið glímir nú við skuldir bankakerfisins sem það tók á sig og nemur fjárhæðin um tíu þúsund milljörðum íslenskra króna, sem ætlunin er að velta yfir á herðar skattgreiðenda. Kinsella sagði að þessi leið sem ESB þvingaði Íra til að fara í bankamálunum væri dýrustu mistökin sem gerð hefðu verið þar í landi.

Þá var það athyglisvert sem fram kom í viðtalinu að efasemdir um ágæti evrunnar og ESB hafa aukist á Írlandi þótt þeir telji sig ekki geta gert annað sem stendur en að halda áfram á sömu braut. Það kom fram hjá viðmælandanum það væri almennt mat fólks á Írlandi að ESB væri ekki að hjálpa Írum núna.

Þá nefndi hagfræðingurinn að staðan hér á landi væri mun betri meðal annars vegna þess að Íslendingar hefðu sjálfstæðan gjaldmiðil. Þess vegna væru Íslendingar að komast út úr kreppunni en Írar væru enn í henni miðri.

Það er því miklu meiri munur á Íslandi og Írlandi en einn bókstafur og sex mánuðir eins og einhver spaugari sagði árið 2008.

Athugasemdir

[Rafn Guðmundsson, 7.4.2013 kl. 17:16]

bull hjá ykkur - hann sagði þetta ekki - hann sagðist 'halda' að staðan væri betir hjá okkur. notaði orðið 'halda' allavega tvisvar.

[Gunnlaugur I., 7.4.2013 kl. 19:46]

Hvað er þetta Rafn.

Afhverju heldurðu svona dauðahaldi í að hann segist "halda" að staðan sé mun betri hérlendis.

Ef að við skoðum aðeins atvinnuleysið þá er það 15% í Írlandi eða um það bil þrisvar sinnum meira en það er á Íslandi núna.

Það þarf því ekkert að halda í þeim efnum og reyndar á ýmsum fleiri sviðum þar sem tölfræðin og staðreyndirnar tala sínu máli Íslandi mjög í vil.

En þetta hvernig þú reynir að halda dauðahaldi í orðið "halda" er beinlínis hlægilegt og lýsir aðeins vesælri og lélegri málefnastöðu ESB trúboðsins hér á landi.

[Rafn Guðmundsson, 7.4.2013 kl. 20:13]

já rétt er rétt Gunnlaugur - og þess virði að halda dauðahaldi