Varaformaður Samfylkingar út af sporinu í evrumálunum

Það vakti athygli í kosningaþætti sjónvarpsins í kvöld hversu óöruggur varaformaður Samfylkingarinnar var í umræðunum um ESB og evru. Þáttastjórnendur slógu fimlega úr höndum varaformannsins rökin um að velsæld, stöðugleiki og öryggi fylgdi evrunni  og vísuðu þáttastjórnendur þar til evrulanda í vanda.

Varaformaðurinn sagði að Samfylkingin væri með evruna á heilanum af því að flokkurinn væri með lífskjör fólks á heilanum. Þegar þessi orð voru sögð var greinilegt að flestir aðrir en Katrín Júlíusdóttir, varaformaður Samfylkingar, væru með lífskjör í vandaþyngdum evrulöndum í huga, enda bætti varaformaðurinn vandræðalega við að menn væru jafnvel að sjá ríki í ESB sem gengu vel og ef menn ynnu rétt að með evruna kæmist á stöðugleiki!!

En varaformaðurinn kórónaði  fyrst sjálfan sig þegar hann sagði: Þegar við erum komin af stað í þann leiðangur að sækja um aðild þá verður allt betra.

Bíðið nú við: Var þetta ekki sagt áður en umsóknin var send? Þá sagði Samfylkingin að um leið og tekin yrði ákvörðun um að senda inn umsókn um aðild að ESB myndi stöðugleiki, öryggi og velsæld komast hér á!

Athugasemdir

[Jón Steinar Ragnarsson, 9.4.2013 kl. 23:15]

Hún nefndi að þrátt fyrir áföll margra þjóða undir Evrunni, sem hún kenndi óábyrgri efnahagstjórn um, þá væru þjóðir sem nytu velgengni. Nefndi hún þar Þýskaland og Norðurlöndin. Bíddu nú viið...á hún við Finnland? Er það nú samnefnari allra norðurlanda?

Evruna hefur hún talið töfralausn sem jafnvel kæmi í veg fyrir óábyrga efnahagsstjórn og spillingu, en kenndi svo óábyrgri efnahagsstjórn og spillingu um helför nær helmings Evruþjóða.

Þetta var hreint brjóstumkennalegt hvernig hún freyddi þarna samhengislaust. Manni svimaði hálfpartinn við að hlusta á rökleysuna.

[Rafn Guðmundsson, 9.4.2013 kl. 23:32]

hvaða vestræn lönd veist þú um þar sem allt er í lagi jsr?

[Ásmundur (IP-tala skráð) 10.4.2013 kl. 07:07]

Hér er hlutunum snúið á hvolf.

Katrín Júlíusdóttir stóð sig framúrskarandi vel og sýndi mikið öryggi. Að mati lesenda annars vegar dv.is og hins vegar eyjan.is stóð hún sig best allra þátttakenda.

Þetta er sérstaklega athyglisvert í ljósi þess að fylgi Samfylkingarinnar hefur ekki verið mikið skv skoðanakönnunum.

Annars er einkum tvennt athyglisvert við niðurstöður þessara kannana um frammistöðu þátttakenda.

Fulltrúar stjórnarflokkanna fá meira fylgi samtals en fulltrúar stjórnarandstöðunnar og eini þátttakandinn sem algjörlega afskrifar upptöku annars gjaldmiðils, Jón Bjarnason, fékk mjög lítið fylgi.

Vonandi er þetta vísbending um að ábyrg stefna stjórnarflokkanna sé að skila sér í stuðningi og að óábyrg bólu- og hrunstefna B og D sé að missa fylgi.

[Ásmundur (IP-tala skráð) 10.4.2013 kl. 07:44]

Jón Steinar, allar norðurlandaþjóðirnar nema Ísland eru ásamt Þýskalandi með hámarkslánshæfismat.

Íslendingar eru hins vegar rétt fyrir ofan ruslflokk. Jafnvel Írland og Ítalía eru með betra mat en við.

Finnar, Danir og Svíar njóta 1.42-1.58% vaxta á 10 ára skuldabréfum ríkisins meðan við þurfum að greiða 6.20% vexti og tökum auk þess gengisáhættu.

Ef við nytum sömu kjara og norðurlandaþjóðirnar sem eru í ESB myndu vextir á lánum ríkisins lækka úr 90 milljörðum á ári niður í 20 milljarða. Auk þess skuldum við miklu meira en hinar norðurlandaþjóðirnar.

Við njótum miklu verri vaxtakjara en vandamálalöndin Írland, Ítalía og Spánn. 

Er ekki kominn tími til að opna augun fyrir því hve grafalvarleg skuldastaða okkar er? Þrátt fyrir góðan árangur ríkisstjórnarinnar er enn langt í land.

Stefna B og D er bólu- og hrunstefna sem við síst af öllu höfum þörf fyrir.