Má segja sannleikann um Spán?

Aðstoðarritstjóri Daily Telegraph, Jeremy Warner, hefur verið hundskammaður fyrir að lesa á milli línanna í skýrslu AGS um Spán, en hann segir að spænski ríkissjóðurinn og spænskir bankar muni innan tíðar þurfa á raunverulegri björgunaraðgerð að halda frá bæði AGS, ESB og SE (Seðlabanka Evrópu) þar sem þeir muni ekki geta staðið í skilum með sitt.

Evrópuvaktin fjallar um þetta í dag.

Ábyrgir fjölmiðlar eru í erfiðri stöðu. Þeir þurfa að segja sannleikann eins og hann blasir við. Frásagnir af erfiðri fjárhagsstöðu banka og ríkja geta hins vegar aukið á erfiðleikana.

Túlkun Warners á efni AGS um Spán kemur þó ekkert sérstaklega á óvart í ljósi þess sem hefur verið að gerast. ESB og SE hafa þó í lengstu lög viljað koma í veg fyrir að Spánn væri settur í formlega björgunaráætlun, þótt bankar þar hafi notið aðstoðar, þar sem Spánn er eitt stærsta hagkerfið í Evrópu. Það er ekki víst að björgunarsjóðir ESB næðu að halda bæði Spáni og Ítalíu á floti ef evrusóttin breiðist frekar út. Þess vegna hefur björgunin á Spáni verið skírð öðrum og vægari nöfnum en notuð hafa verið yfir björgunaðgerðir á Grikkland, Kýpur og víðar.

Athugasemdir

[Hans Haraldsson (IP-tala skráð) 11.5.2013 kl. 17:28]

"...ef evrusóttin breiðist frekar út".

Á Evrusvæðinu nota ólík og missamkeppnishæf sama gjaldmiðil án þess að millifærslukerfi eða annað fyrirkomulag til að fást við ójöfnuð í viðskiptum sé til staðar.

Það er ekkert "ef".

[Bjarni Jónsson, 12.5.2013 kl. 11:13]

Samkvæmt skýrslu AGS er Spánn gjaldþrota.  Skuldaaukningin er stjórnlaus, enda hvernig halda menn, að ríki standist 25 % atvinnuleysi og ósamkeppnihæfan útflutning ?  Hvernig brugðizt verður við er hins vegar óljóst.  Spánn er ósambærilegur við Írland eða Grikkland.  Þess vegna verður e.t.v. ekki mikið um stuðningsaðgerðir.  Gjaldþrot Spánar getur hins vegar orðið banabiti hinnar bráðfeigu evru.