Nú sambandið er sett á ís af Sigmundi og Bjarna

Ís er vinsæll þessa sumardaga. Frægur er ísbíltúr forsætisráðherra fyrir kosningar. ESB-umsóknin er kominn í ís. Fljótlega eftir stjórnarskiptin var tilkynnt um 17 ný umferðarmerki, en þar á meðal er merki sem vísar á staði þar sem ís er framleiddur og seldur.

Í raun hafði fyrri ríkisstjórn sett umsóknina í kælingu og ekkert tekið á erfiðustu málunum, enda leist fólki líklega ekkert á þróun ESB í átt til stórríkis, þróun sem verður æ skýrari með degi hverjum.

Þá er spurning hvort ekki sé við hæfi þessi fyrripartur, sem einhver lesandi gæti kannski verið svo góður að botna:

Nú sambandið er sett á ís,
af Sigmundi og Bjarna.
...........
...........

Í gær var fyrriparti kastað fram um atvinnuleysið í ESB og komu tveir lesendur með seinnipart:

Atvinnu í e ess bé,
enga er að fá.
Samt mun ómælt styrktarfé
streyma þaðan frá.

Atvinnu í e ess bé,
enga er að fá.
Ungir eiga ekkert fé
og aldnir fara frá.

Athugasemdir

[Jóhannes Laxdal Baldvinsson, 5.7.2013 kl. 04:25]

Nú sambandið er sett á ís,
af Sigmundi og Bjarna.
En okkar bíður voðinn vís
ef vinstrið nær að hjarna

[Heimssýn, 5.7.2013 kl. 14:05]

Nokkuð góður þessi! Nú hlýtur einhver vinstra megin að taka við sér?