Logi Bergmann óhress með bragðlítið ESB

Sjónvarpsmaðurinn góðkunni Logi Bergmann er heldur óhress með reglugerðarfargan Evrópusambandsins sem veldur því að hann fær ekki að kaupa morgunkornið sitt.

Þetta kemur fram á visir.is:

Logi Bergmann ber Evrópusambandinu ekki fagra söguna á Twitter síðu sinni, en hann biður sambandið um að „fokka sér." Ástæðan er sú að sambandið er með reglugerðum sínum búið að „tortíma" góðu morgunkorni, sem er miður að mati Loga.

Logi segist vera mikill Froot Loops maður í samtali við fréttastofu, en það er af sem áður var og morgunkorn er ekki lengur gott. „Þetta er eins og mold þessi óþverri," segir Logi um evrópska Froot Loopsið.

„Froot Loops er búið að vera í miklu uppáhaldi hjá mér lengi og ég keypti þessa evrópsku útgáfu þar sem var búið að taka út öll þessi hræðilegu litarefni og bragðið líka. Þetta er bara eitthvað djók. Svo stend ég hérna á kassanum og get ekki fengið litarefnin mín og konan á næsta kassa er að kaupa þrjá kassa af Winston. Er ekki verið að gera grín að mér?" bætir hann við.

„Ég er búinn að fá nóg af þessu, ég vil fá að borða litarefnin mín og hafa bragð af þessu," segir Logi svo að lokum.

Frægt er orðið að Jón Gerald Sullenberger stóð í stappi við matvælayfirvöld vegna reglugerða sambandsins um morgunkorn þegar honum var meinað að selja Cocoa-Puffs sem var framleitt í Bandaríkjunum. Jón hafði sigur í því máli þegar í ljós kom að reglugerðirnar höfðu verið ranglega túlkaðar, og íslendingar geta enn sem komið er gætt sér á „góðu" Cocoa-puffsi.

Athugasemdir

[Gunnlaugur I., 5.7.2013 kl. 11:00]

Það er sama ruglið í gangi með þessa annars ágætu og ódýru barnabílstóla frá USA.

En þeir hafa ný verið bannaðir á Íslandi að kröfum regluverks ESB.

RÚV sagði frá þessum lífshættulegu barnabílstólum um daginn alveg gagnrýnislaust og þetta var aðalfréttinn í öllum fréttatímum allan daginn og það var eins og fréttaþulurinn á RÚV hefði verið að lesa upp tilskipun frá sjálfum Guði almáttugum þegar hann vitnaði með andakt í sjálft Evrópusambandið og regluverk þess.

Ég veit að sjálft DDR Ríkisútvarp Austur Þýskalands hefði ekki getað gert þetta betur þegar Kommarnir þar bönnuðu Kóka Kóla á sjönda áratugnum af því að þarlendar Rannsóknarstofur höfðu fundið út að í drykknum væru andlega skaðleg snefilefni, að sögn fréttastofu DDR.