Hið rétta er að 64% landsmanna eru andvíg inngöngu í ESB

Þessar skoðanakannanir geta nú stundum verið dálítið leiðandi og villandi. Ef kosið yrði nú um aðild að ESB og afstaðan yrði sú sama og endurspeglast í þessari könnum myndu 64% þeirra sem taka afstöðu vera á móti aðild að ESB. Aðeins 36 prósent þeirra sem taka afstöðu yrðu fylgjandi.

Það er þetta sem skiptir meginmáli í könnuninni. Um tuttugu prósent taka ekki afstöðu til málsins. Það eru þeir sem taka afstöðu sem ráða niðurstöðunni.

Þegar niðurstaðan er svo afgerandi er náttúrulega enginn tilgangur með því að vera að kjósa um að halda viðræðum áfram, hvað þá að halda þeim áfram. Að spyrja slíkra spurninga er bara til þess að villa mönnum sýn í því sem skiptir máli. Það er bara blekkingarleikur.

Hér skal enn og aftur minnt á þetta:

• Þjóðin er á móti aðild að ESB.
• Sjálfstæðisflokkurinn er á móti aðild að ESB. Það sést á landsfundarsamþykkt.
• Framsóknarflokkurinn er á móti aðild að ESB. Það sést á samþykkt flokksþings.
• Kosningastefnuskrá flokkanna endurspeglaði þessa afstöðu.
• Stjórnarsáttmálinn endurspeglar þessa afstöðu með skýrum hætti.

Það kemur enn fremur fram í afstöðu stjórnarflokkanna og stjórnarsáttmála að fari svo ólíklega að viðræðum verði haldið áfram þá verði það ekki gert nema að undangenginni þjóðaratkvæðagreiðslu.

Fylgjendur aðildar að ESB þurfa að lesa það sem stendur í flokkssamþykktum og stjórnarsáttmála. Ef þeir nenna því ekki er vart hægt að ræða við þá um málið.

 

Tæp 52% vilja halda viðræðum áfram