Katrín Júlíusdóttir viðurkennir að Brussel myndi ákveða aflaheimildir við Íslandsstrendur

Katrín Júlíusdóttir, þingmaður Samfylkingarinnar, viðurkenndi í ræðu á Alþingi rétt í þessu að vald til þess að ákveða aflaheimildir við Íslandsstrendur myndi flytjast til Brussel ef Ísland gerðist aðili að ESB.

Til hvers er þá verið að halda þessum leik áfram? Samfylkingin hefur áður lýst því yfir að það væri forsenda fyrir því að fara í ESB að Íslendingar héldu yfirráðum sínum yfir Íslandsmiðum. Nú eru þingmenn Samfylkingar búnir að viðurkenna að þetta muni ekki nást fram.

Til hvers er þessi leikur þá gerður af hálfu Samfylkingar og Vinstri grænna? Er þetta allt eintóm hræsni og óheiðarleiki eins og Birgitta Jónsdóttir sagði í umræðum í dag?

Annað merkilegt við ræðu Katrínar er að hún sagðist ekki nenna að ræða við þingmenn um mögulegar undanþágur og sérlausnir: Hún vildi bara klára viðræðurnar.

Þar með vill Katrín færa Ísland nær ESB án þess að þjóðin vilji það. Hún nennir ekki að ræða þetta frekar á Alþingi.

Athugasemdir

[Ásthildur Cesil Þórðardóttir, 20.2.2014 kl. 16:12]

Veit ekki á hvaða ferðalagi Samfylkingin er, hún er komin langt út fyrir veginn og út í móa, en getur ekki bakkað, stóru orðin standa ennþá föst í hálsinum á þeim. En það er ekki umhyggja fyrir almenningi sem er þeim efst í huga heldur eigin stolt, erfitt að kyngja að maður hafi haft rangt fyrir sér.