Viðræðum við ESB er sjálfhætt, segir sérfræðingur

Ágúst Þór Árnason, sem er einn af höfundum ESB-skýrslu Hagfræðistofnunar, segir að viðræðum við ESB hafi og sé í raun sjálfhætt þar sem ekki sé möguleiki á neinum varanlegum sérlausnum eða undanþágum. RUV skýrir svo frá: 

Ísland á ekki möguleika á neinum varanlegum sérlausnum eða undanþágum í aðildarviðræðum sínum við Evrópusambandið. Þetta er niðurstaða eins aðalhöfunda skýrslu Hagfræðistofnunar Háskóla Íslands um stöðu aðildarviðræðnanna við ESB. Hann segir að í ljósi þessa sé viðræðum í raun sjálfhætt.

Ágúst Þór Árnason, brautarstjóri við lagadeild Háskólans á Akureyri, hafði yfirumsjón með úttekt á aðildarferlinu í skýrslu Hagfræðistofnunar. Hann segir að niðurstaða sín varðandi helsta þrætuepli þeirra sem vilja halda viðræðum áfram og þeirra sem vilja hætta þeim sé afdráttarlaus. „Það er alla vega alveg ljóst að það er ekki um neinar sérlausnir eða undanþágur að ræða, nema þá tímabundnar og klárlega ekki sem að yrði hluti af löggjöf Evrópusambandsins.“

Ágúst Þór segir að Evrópusambandinu þætti að vissu leyti heiður að því að fá Ísland inn í Evrópusambandið, en að það finni ekki til neinnar knýjandi þarfar til að veita Íslandi undanþágur til að laða það inn í sambandið. Hann segir að seinni rýnifundurinn um sjávarútvegskaflann hafi verið haldinn fyrir þremur árum, í mars 2011. Síðan hafi bókstaflega ekkert verið í fréttum um þann kafla og að það sé verðug spurning sem ekki hafi fengist svar við, af hverju Evrópusambandið hafi ekki viljað afhenda rýniskýrslu sína um sjávarútvegskaflann.

Ágúst segir það niðurstöðu sína, í ljósi þess að ekki verði hægt að fá neinar varanlegar sérlausnir eða undanþágur, að aðildarviðræðum sé í raun sjálfhætt. „Það horfir þannig við mér og það má algerlega lesa það út úr þeim skrifum sem ég lagði fram í viðaukanum. Sko það verður þá einhver að koma með eitthvað upp á borðið sem segir eitthvað annað. Ég hef ekki heyrt það.“ 

 

Athugasemdir

[Ragnhildur H. (IP-tala skráð) 2.3.2014 kl. 18:49]

Hann er i raun að endurtaka það sem Jón Bjarnason fyrverandi sjávarútvegsráðherra hefur sagt ..og var lika i samninganefnd ,en Evrópusambandið gaf allr frá ser þegar það komst að þvi að Islendingar myndu aldrei afsala ser auðlindinni til Brussel ....og þar við situr !!

[Jón Steinar Ragnarsson, 2.3.2014 kl. 19:25]

Formatteringin á textanum er ekki rétt. Spaltinn vinstra megin á síðunni fer yfir hann.

[Ufsi (IP-tala skráð) 2.3.2014 kl. 20:06]

Úúúú, sérfræðingur. Vá maður kiknar í hnjánum. En hvað er það sem gerir brautarstjóra við lagadeild Háskólans á Akureyri að sérfræðingi? Er nóg að skrifa skýrslu pantaða af hagsmunaaðila til að verða sérfræðingur? Hefur brautarstjóra við lagadeild Háskólans á Akureyri sérstaka vitneskju um leyndustu hugsanir ESB og ofurmannlega spádómsgáfu?

Annars er gaman að sjá hann enda greinina með gamla góða "Let them deny it" trikkinu, sem er alltaf vinsælt þegar menn koma með fullyrðingar sem þeir geta ekki sannað.

[Ásthildur Cesil Þórðardóttir, 2.3.2014 kl. 21:06]

Þetta er kommon sens, sem allir ætti að geta sagt sér til um. En það er alveg sama hver segir eitthvað móti ESB, aðildarsinnar segja það rugl og vitleysu og gera grín, þeim er vorkunn greyjunum þau vita ekki betur, vilja ekki skilja né viðurkenna að þetta er búið spil.

[Ufsi (IP-tala skráð) 3.3.2014 kl. 01:02]

Einusinni var það talið "kommon sens, sem allir ætti að geta sagt sér til um" að jörðin væri flöt. Þá benti fólkið einnig á stóra bók og sagði ekki um neitt að ræða, allt stæði í henni.

Þess vegna er auðvelt að gera grín. Það er verið að kljást við fólk sem beitir trúarhita frekar en rökum og fullyrðingum frekar en staðreyndum. Fólk sem hefur lesið stóru bókina, eða einhverjar málsgreinar í henni, og telur sig þess vegna geta sagt fyrir um framtíðina. Fólk sem er gangandi brandarar í blindri sannfæringu sinni.

[Ásthildur Cesil Þórðardóttir, 3.3.2014 kl. 11:06]

Þetta er ekki rétt hjá þér Ufsi, hvaða rök hafa ESB sinnar sett fram, sýndu mér þau. Aftur á móti hafa andstæðingar inngöngu komið með margskonar rök, meira að segja bæklinginn frá ESB sjálfu.

[Ufsi (IP-tala skráð) 3.3.2014 kl. 11:19]

Af því að það er hægt að lesa það úr bæklingi frá ESB sjálfu þá er það hinn endanlegi sannleikur meitlaður í stein. Það er óþarfi að láta á það reyna því ESB er til eilífðar óhagganlegt og óbreytanlegt. Amen. 

Búinn að heyra það en er ekki sammála.

[Ásthildur Cesil Þórðardóttir, 3.3.2014 kl. 11:32]

Þú mátt hafa hvaða skoðanir sem þú vilt Ufsi, en hér er ekki um að ræða tvö ríki í samningaviðræðum, hér er um að ræða umsókn inn í stórríkjasamband, þar sem skýrt er tekið fram að það sé misskilningur að tala um samning, hér sé um aðlögun að ræða,sem þegar hafa verið samþykkt og ekki umsemjanlegt, það er alveg eftir íslendingum að halda að við séum svo stórkestlega merkileg að allir vilji gera allt til að fá okkur til sín, það er einfaldlega rangt, eins og einn ágærur kommiser sagði, við sóttum ekki um inngöngu í Ísland, heldur sótti Ísland um inngöngu í ESB;

[Ufsi (IP-tala skráð) 3.3.2014 kl. 12:08]

Það ætti þá að vera eftirsóknarvert að halda áfram og sanna endanlega að ESB sinnar hafi rangt fyrir sér. Hræðslan við framhald bendir hinsvegar til þess að mikill efi sé til staðar þó reynt sé að halda í trúna og stunda trúboðið.

[Ásthildur Cesil Þórðardóttir, 3.3.2014 kl. 12:30]

Hræðslan er öll aðildarsinna meginn, m.a. neitaði fyrrverandi ríkisstjórn oftar en 10 sinnum að hafa þjóðaratkvæðagreiðslu um málið.

[Ufsi (IP-tala skráð) 3.3.2014 kl. 13:29]

Að neita að láta gunguskap koma í veg fyrir niðurstöðu er ekki hræðsla. En að vilja hætta áður en niðurstaða fæst er hræðsla.