Skýrsla óþekkta embættismannsins

Vigdís Hauksdóttir, þingmaður og formaður Heimssýnar, hlýddi í morgun á kynningu á skýrslu Alþjóðamálastofnunar um viðræður íslenskra stjórnvalda við ESB. Aðspurð gagnrýndi Vigdís hversu mikið virtist vera byggt á samtölum við fjölda embættismanna ESB án þess að hægt væri að greina hver sagði hvað.

 

Mbl.is greinir svo frá: 

 

 

Vigdís Hauksdóttir, þingmaður og formaður Heimssýnar, gagnrýnir skýrslu Alþjóðamálastofnunar HÍ um ESB-viðræðurnar, segir hálfsannleik koma þar fram og í raun sé þetta „skýrsla óþekkta embættismannsins“ þar sem vitnað sé í nafnlausa embættismenn ESB og tveggja manna tal.

„Það kemur manni í raun mest á óvart að ekkert nýtt kemur þarna fram. Týnd eru til fimm atriði sem eiga að skýra það af hverju frestur kom á vinnuna við aðildarviðræðurnar og þetta er að mínu mati hálfsannleikur. Hvorki makrílveiðar eða Icesave stoppuðu viðræðurnar. Það er viðurkennt í viðauka 1 úr skýrslu Hagfræðistofnunar að ríki ESB leggja ekki í aðlögunarferli við annað ríki nema að engar deilur séu uppi, það var fyrst og fremst það sem stoppaði þetta.“

Vigdís bendir á að í skýrslunni sé talað um að ósamstaða hafa verið í fyrri ríkisstjórn og ekki verið hægt að opna einhverja viðræðukafla vegna fyrrverandi sjávarútvegsráðherra, Jóns Bjarnasonar.

„Þá spyr ég á móti. Hvernig á þá ríkisstjórn, sem er á móti aðild að Evrópusambandinu, að geta haldið þessari för áfram? Sjávarútvegskaflinn er afar undarlegur, þar er ekki vísað í neinar heimildir að ráði, að öðru leyti en því að það eru óþekktir og andlitslausir embættismenn í Brussel virðist koma þarna inn með heimildir sem skýrsluhöfundar treysta sér ekki til að upplýsa hverjir eru. Þetta er ekki í boði í háskólasamfélaginu að koma fram með svona órökstuddar fullyrðingar í skýrslu af þeim gæðum sem svona skýrsla á að hafa. Það er engin heimildarskrá um það hver segir hvað. Þetta er eiginlega skýrsla óþekkta embættismannsins,“ segir Vigdís og bætir við að vitnað hafi verið í minnisblöð embættismanna sem ekki hafi verið lögð fram sem gögn í aðlögunarferlinu.

„Það er ekki hægt að bjóða okkur uppá það að vitna í tveggja manna tal. Ég hef farið í gegnum háskólanám og veit að allt þarf að vera skothelt varðandi heimildir og rökstutt til að ritgerðir og skýrslur séu teknar gildar af háskólasamfélaginu. Ef að ekki er gefin upp ákveðin heimild fyrir ákveðnum fullyrðingum þá veit maður ekki hvort að þær séu réttar,“ segir Vigdís sem telur ekkert benda til þess í skýrslunni að tilefni sé til að draga tillöguna til baka um að slíta viðræðum við ESB. Í raun sé búið að draga umsóknina til baka með því að hætta viðræðum og slíta samninganefndum. 

Skýrsla óþekkta embættismannsins

Athugasemdir

[Valdimar Samúelsson, 7.4.2014 kl. 18:40]

Voru þessir menn ESB sinnar. Vita þeir ekki að menn setjast að hér og svo er urmull af mönnum hér sem lifa á því að vera reppar og við vitum að allar Jarðir sem hafa verið seldar eru í gegn um millimenn.Bretar lentu heldur betur í því þegar portugalir og aðrir komu með skip og skráðu í Bretlandi en þá gátu þeir veitt innan 12 mílnanna.Það er sorglegt hve menn eru litlir þjóðernissinnar enda sögðu Færeyingar að við væru Jáarar upp til hópa. ''Já alltilæ''

[Pétur D. (IP-tala skráð) 8.4.2014 kl. 00:47]

"Í raun sé búið að draga umsóknina til baka með því að hætta viðræðum og slíta samninganefndum."

Nei, Vigdís, það er ekki nóg. Gunnar Bragi verður að taka af skarið og leggja fram frumvarp um að draga umsóknina tilbaka formlega. Það þýðir ekkert að fara eins og köttur kringum heita grautinn.

Síðan þegar lög um að draga umsóknina tilbaka hefur verið samþykkt, þá getur ríkisstjórnin lýst því yfir, að ef það verður meirihluti fyrir því á þingi, þá er hægt eftir 2-3 ár að leggja þessa spurningu í þjóðaratkvæði: "Ertu hlynnt(ur) því að sótt verði um aðild að ESB? Já eða Nei?"

Ég horfði á viðtal við Piu Hansson í sjónvarpinu í kvöld og hún hafði ekkert til síns máls. Enda er umrædd skýrsla skrifuð af harðlínu ESB-sinnum fyrir þessa harðlínu ESB-sinna sem pöntuðu niðurstöðurnar. Meðal þeirra er Gylfi Arnbjörnsson, sem heldur varla vatni yfir þessari skýrslu og honum tekst í þremur setningum í frétt á mbl. að koma með þrjár alrangar fullyrðingar.

Hins vegar hef ég miklar áhyggjur af Bjarna Ben, sem frá ræðustól Alþingis tekst að koma með hverja fullyrðinguna á fætur annarri sem eru í andstöðu hvor við aðra. Það veit í raun enginn hvað hann vill og þess vegna á hann að láta Gunnari Braga eftir utanríkismálin. Það er átakanlegt hvernig Bjarni Ben hefur sett sig milli tveggja stóla. Það gengur ekki til lengdar.

[Pétur D. (IP-tala skráð) 8.4.2014 kl. 12:48]

Og rétt er það, að óljós ummæli ónefndra embættismanna getur allt eins verið skáldskapur. Það rúir skýrsluna öllum trúverðugleika. Sýnir vel hversu óvönduð vinnubrögð Alþjóðamálastofnunar eru.