Það er nauðsynlegt að draga umsóknina að ESB til baka

Það er nauðsynlegt að afturkalla umsóknina um aðild að ESB, segir Erna Bjarnadóttir í grein sem birt var í Morgunblaðinu föstudaginn 18. julí síðastliðinn.

Grein Ernu, sem er í stjórn Heimssýnar, er birt hér í heild sinni:

Síðustu vikuna hafa hver stórtíðindin eftir önnur borið að sem varða hagsmunagæslu Íslands gagnvart Evrópusambandinu. Allt hefur þó borið að einu með að ekkert heyrist frá forystumönnum í stjórnmálum um orð og yfirlýsingar háttsettra embættis- og stjórnmálamanna frá meginlandinu.

Fyrst má nefna ummæli Athanasios Orphanides fyrrverandi bankastjóra Seðlabanka Kýpur, í Viðskiptablaði Morgunblaðsins þann 10. júlí sl. Þar segir hann m.a. að hinn pólitíski óstöðugleiki í Evrópu sé slíkur að það væru mistök fyrir hvaða ríki sem væri, þar á meðal Ísland, að fara inn á evrusvæðið undir núverandi kringumstæðum. Þá segir ennfremur: »Orphanides telur það hafa verið viðeigandi að setja gjaldeyrishöft á Íslendinga á sínum tíma til að koma í veg fyrir enn stærra gengishrun krónunnar.« Einnig hefur Alþjóðagjaldeyrissjóðurinn birt mjög harða gagnrýni á efnahagsstjórn evrusvæðisins, sem beinist ekki sízt að Seðlabanka Evrópu. Gagnrýnin beinist að því að yfirvöld hafi látið evrusvæðið lokast inni í lágvaxtargildru án þess að grípa til aðgerða. Verðbólga hafi verið of lítil í of langan tíma. Þetta aðgerðaleysi hefur að mati AGS dregið úr trúverðugleika Seðlabanka Evrópu.

Staðan í ESB er í stuttu máli þannig að þar er 10,5% atvinnuleysi og 25,7 milljónir manna án vinnu. Þar af eru 5,34 milljónir undir 25 ára aldri atvinnulausar. Verst er ástandið á Grikklandi og Spáni, þar sem meira en fjórði hver maður er atvinnulaus. Þetta kemur fram í frétt Eurostat frá 2. maí sl. Á sama tíma var atvinnuleysi á Íslandi 4,6%.

Þann 15. júlí sl. sagði verðandi forseti framkvæmdastjórnar ESB að yfirstandandi viðræðum við umsóknarríki verði haldið áfram en ekki verði um frekari stækkun að ræða næstu fimm árin. Nú er það svo að viðræður standa ekki einu sinni yfir við umsóknarríkið Ísland. Búið er að leysa upp allar samninganefndir og samningahópa og allir opinberir embættismenn sem við þetta unnu eru farnir til annarra starfa. Einnig hafa allar greiðslur til Íslands vegna aðlögunar að stjórnsýslu ESB, svokallaðir IPA-styrkir, verið stöðvaðir.

Á hverju strandar þá að draga umsókn Íslands til baka? Verði það ekki gert munu embættismenn ESB gefa út skýrslu í haust um stöðu umsóknar okkar um aðild. Í besta falli er hægt að skemmta sér við tilhugsunina um hvaða orðaval þeir nota til að lýsa stöðunni.

Athugasemdir

[Helga Kristjánsdóttir, 21.7.2014 kl. 00:55]

Þeir sjást ekki oft ráðherrar ríkisstjórnarinnar,en þó verð ég að játa að ég opna sjaldan Rúv.,sem funkerar eins og Samfylkingar miðill. Það skiptir nákvæmlega engu máli hvað Gunnar Bragi er að þvaðra um, varðandi óþarfa að sækja hnoðið hans Össurar frá 2009. Það geta fleiri látið í sér heyra heldur en Esbésinnar.

[Ingibjörg Guðrún Magnúsdóttir, 21.7.2014 kl. 02:57]

Er það svo að allir vinnuhópar frá ESB eru farnir, ég var ekki fyrir löngu að lesa frétt þar sem Bíó-paradís er að fara í samvinnuferð út á land með ESB stofu að kynna ESB, það verður frítt fyrir börnin í bíó og blöðrur og fánar meðal annars gefnir af ESB stofu.

Reykjavíkurborg er að styrkja Bíóparadís sérstaklega og þetta er kynning sem á að ná til barnana þar sem þeir telja sig vera búna að ná í unga fólkið í gegnum skólana svo mér er spurn er allri vinnu hætt eða hvað...

Er Reykjavíkurborg að láta peninga okkar skattgreiðenda í svona...

[Valdimar Samúelsson, 21.7.2014 kl. 10:15]

Við verðum að kíla á þetta og burt með Evrópustofuna og ESB endanlega. Evrópustofan er ólögleg samkvæmt Vínarsáttmálanum sem hægt er að finna í bloggi mínu á mörgum stöðum. Gunnar verður að senda þinglýst bréf og segja að við séum hætt við að sækja um aðild. Við eru 100 ár á eftir tímanum en síðustu ár hafa ESB menn gert viðskiptasamninga  við hin og þessi lönd án þess að heimta að þau gangist undir lög þeirra. Sjá blog mitt um ''EU agrees on trade deal with Ecuador'