Finnland í djúpri efnahagslægð

Finnland er í dýpstu efnahagslægð af evrulöndunum sem stendur ef Kýpur er frátalið. Meðal ástæðna eru of miklar verðhækkanir í landinu sem eru umfram almennar verðhækkanir á evrusvæðinu og draga því úr samkeppnishæfni Finna gagnvart öðrum evrulöndum. Viðskiptakjörin hafa einnig versnað. Önnur ástæða eru erfiðleikarnir í Rússlandi sem nú blasa við.

Því er nú spáð að framleiðsla dragist saman um 0,6 prósent á þessu ári í Finnlandi og yrði það þá þriðja árið í röð með samdrætti í landsframleiðslu.

Eitt aðalvandamál Finna núna er sífellt veikari staða útflutnings. Framan af veiktist útflutningsstarfsemi þar sem verðhækkanir voru meiri í Finnlandi en almennt á evrusvæðinu en nú á síðustu misserum er það veikari efnahagur Rússlands og þar af leiðandi minni útflutningur þangað sem veldur vanda í Finnlandi.

Meðfylgjandi mynd sýnir þróun viðskiptakjara í Finnlandi sem hafa farið stöðugt versnandi frá því evran var tekin upp. Þessi óhagstæða viðskiptakjaraþróun hefur haft víðtæk áhrif á þróun efnahagsmála í Finnlandi og meðal annars leitt til þess að finnskur útflutningur hefur tapað nokkurri hlutdeild í samkeppni við önnur evrulönd.

 

Athugasemdir

[Hilmar (IP-tala skráð) 9.11.2014 kl. 19:23]

Össur vildi endilega fara "finnsku leiðina". Sem endaði náttúrulega úti í móa. 

Finnland varð ekki fyrir neinu sérstöku hjnaski vegna efnahagskreppunnar sem hófst 2008, og því verður að leita annarra skýringa á óförunum í dag. Þegar málin eru skoðuð nánar, kemur fátt annað til greina en að aðild að ESB og evran séu skaðvaldarnir sem halda þeim í heljargreipum.

Hvernig ætli þetta hefði farið á Íslandi, með ESB aðild, evru OG efnahagskreppu? 

Einhvern daginn, vonandi allavega, tekur einhver blaðamaðurinn sig til, og fer í saumana á þessu óábyrga hjali Össurar og annarra ESB sinna í kjölfar hrunsins, og sýnir fram á hvers konar skaða þetta fólk hefði getað unnið íslenskri þjóð.