Gunnar Bragi er ekki að kveðja Evrópu

Gunnar Bragi Sveinsson utanríkisráðherra segir í viðtali við Viðskiptablaðið í dag að Íslendingar væru ekkert að kveðja Evrópu þótt þeir gengju ekki í Evrópusambandið. Ríkisstjórnir ESB-ríkja væru sér vel meðvitaðar um afstöðu Ríkisstjórnar Íslands og Íslendingar væru í mjög góðu samstarfi við Evrópuþjóðir þar sem það ætti við. 

Í viðtali Viðskiptablaðsins við Gunnar Braga segir: 

 

Kveðjum ekki Evrópu með viðræðuslitum

Sigmundur Davíð Gunnlaugsson forsætisráðherra sagði í viðtali í útvarpsþættinum Sprengisandi um helgina að gera mætti ráð fyrir að ný þingsályktunartillaga yrði lögð fram á þingi um að draga aðildarumsókn Íslands að Evrópusambandinu til baka. Gunnar Bragi segir nauðsynlegt að klára málið og ef vilji er fyrir því að fara með málið í gegnum þingið þá sé hann reiðubúinn til þess. „Ég hef hins vegar ekki tekið neina ákvörðun um hvenær ég muni leggja slíkt til við ríkisstjórnina eða þá hvort ég geri það en það er alveg ljóst frá minni hálfu að málið fer ekkert aftur fram nema sem ríkisstjórnarmál og að báðir stjórnarflokkarnir komi saman að málinu,“ segir Gunnar. „Ég held að það sé best fyrir okkur að hafa bara hreint borð í þessu. Ég hef leyft mér að tala um að þetta sé ákveðin núllstilling. Þjóðin var ekki spurð þegar við fórum í viðræðurnar og ég myndi leggja áherslu á að það væri ekki farið í slíkar viðræður án þess að slíkt yrði gert. Aðalmálið er að við höngum þarna inni sem eitthvert umsóknarríki þegar við erum í engum viðræðum og núverandi ríkisstjórn hefur engan áhuga á að sækja um. Árin líða, Evrópusambandið þróast og breytist og eins Ísland þannig að það er langbest að mínu viti að draga þessa umsókn til baka.“

Hvers konar skilaboð heldur þú að það sendi til Evrópusambandsins að aðildin verði dregin til baka? Gæti verið að samband okkar við Evrópusambandið muni hljóta skaða af?

„Nei, stjórnir Evrópusambandsins eru vel meðvitaðar um afstöðu ríkisstjórnarinnar og við eigum í mjög góðu sambandi og samstarfi þar sem það á við. Við erum ekkert að kveðja Evrópu þótt við göngum ekki í Evrópusambandið. Þvert á móti þá eru þetta okkar helstu samstarfsaðilar. Evrópusambandið er bara allt annað og meira en tvíhliða samstarf og það er ástæða til að rifja það upp að við værum ekki að gera fríverslunarsamning við Kína eða önnur ríki á okkar forsendum ef við værum Evrópusambandsríki,“ segir Gunnar.

Athugasemdir

[Eiður Svanberg Guðnason, 8.1.2015 kl. 21:08]

Hann hótar samt hurðaskellum, - meðal annars á framtíð ungra Íslendinga.

[Heimssýn, 8.1.2015 kl. 22:45]

Það er ágætt að bera saman stöðu ungs fólks í hinum ýmsu Evrópuríkjum. Í nokkrum ríkjum og á ýmsum svæðum, ekki síst á jaðri Evrópu, er atvinnuleysi meðal ungs fólks nálægt 50%. Framtíðarhorfur eru þar ekki sérlega góðar. Ástandið er nú talsvert betra hér á Íslandi. Við erum ekkert að skella hurðum á Evrópu þótt við ákveðum að vera ekki í Evrópusambandinu. Þvert á móti. Við getum haldið öflugum og eðlilegum samskiptum við Evrópuþjóðir, bæði þær sem eru í ESB og hinar sem hafa ákveðið að vera utan ESB. Þegar allt er talið er ekki nema ríflega helmingur Evrópuþjóða sem í ESB. Við þurfum líka að horfa aðeins víðar en einvörðungu til Evrópu.

[Helga Kristjánsdóttir, 8.1.2015 kl. 23:41]

 ESB.forysta hefur sjálf látið hafa eftir sér að nauðsynlegra breytinga sé þörf,þegar kemur að umsókn í sambandið.Hún miðast við að meirihluti umsóknarríkis samþykki hana. "Umsókn" Íslands 2009 var það ekki,hvað þá að allir þingmenn sem greiddu henni atkvæði gerðu það af sannfæringu,síður en svo.Þetta er að mínu viti ein grófasta aðför að lýðræði Íslands.-