Pólskir bændur og verkamenn mótmæla tilskipunum ESB

Viðskiptaþvinganir ESB gegn Rússum hafa gífurleg og neikvæð áhrif á afkomu bænda og verkamanna í Póllandi. Af þeim sökum hafa bændur efnt til fjöldamótmæla.

Vonast er til þess að ESB bregðist við með nýjum tilskipunum sem muni rétta hag bænda og verkamanna í Póllandi.

Valdakjarnin í Brussel sogar stöðugt til sín völd en eykur samt fremur á vandann en leysir hann.

RUV greinir svo frá:

 

Nokkur hundruð pólskir bændur gerðu í dag tilraun til að stöðva umferð á nokkrum helstu vegum sem liggja til höfuðborgarinnar, Varsjár, og kröfðust þess að ríkisstjórnin greiddi þeim skaðabætur vegna tjóns sem þeir hefðu orðið fyrir vegna viðskiptabanns Rússa á landbúnaðarafurðir frá löndum ESB.

Rússar hættu innflutningi á kjöti, ávöxtum og grænmeti, fiski og mjólkurafurðum frá Ástralíu, Kanada, Evrópusambandinu, Noregi og Bandaríkjunum í ágúst. Banninu var komið á í kjölfar viðskiptaþvingana sem Vesturlönd ákváðu að beita Rússa vegna aðildar þeirra að átökunum í Úrkaínu.

Bændurnir óku dráttarvélum sínum í halarófu út á vegina og lögðu þeim þar. Stjórnvöld í Póllandi hafa farið fram á að Evrópusambandið bæti bændum upp tjónið og vilja að sambandið greiði þeim 26 milljónir evra. Bændurnir vilja skaðabætur vegna verðfalls á mjólkurafurðum og svínakjöti og vegna tjóns af völdum friðaðra villisvína sem ráðist hafa á búfénað og eyðilagt uppskeru. Kílóverð á svínakjöti hefur fallið um fimmtíu prósent frá því bannið tók gildi. Fyrir viðskiptabannið fluttu Pólverjar sjö prósent af landbúnaðarafurðum sínum til Rússlans, 86% eru flutt til Evrópusambandslanda, og þá sérstaklega til Þýskalands.

Það slitnaði upp úr viðræðum bænda við stjórnvöld í morgun. Slawomir Izdebski, formaður bændasamtakanna OPZZ, hefur lýst því yfir að bændur muni grípa til aðgerða aftur í næstu viku, fáist ekki botn í málið. Námuverkamenn hafa hótað að mótmæla með þeim, en þeir eru ósáttir vegna ítrekaðra fjöldauppsagna námufyrirtækja. BronisÅ‚aw Komorowski, forseti, sagði kröfur bændanna óraunhæfar í ljósi þess að þegar hafi verið samið við Evrópusambandið um niðurgreiðslur vegna landbúnaðar.