Umsóknardrusla Össurar er steindauð

Furðulegt er að heyra tal fólks um að halda þurfi atkvæðagreiðslu um umsókn sem Össur Skarphéðinsson, þáverandi utanríkisráðherra, sá til þess að kæfa í fæðingu. Honum hefði átt að vera fullkunnugt um að ESB myndi aldrei ganga að þeim skilyrðum sem Alþingi setti í umsóknina varðandi sjávarútvegs- og landbúnaðarmál. Á því strandaði málið og þess vegna endaði Össur á hvolfi úti í mýri með umsóknina í vitunum.

Allt tal um að halda þjóðaratkvæðagreiðslu um steindauða umsókn er því fávíst hjal. Hins vegar er eðlilegt að halda þjóðaratkvæðagreiðslu verði sótt um aftur. Umsókn Össurar er lík sem er farið að úldna. Af því leggur megnan óþef um allt samfélagið. Þess vegna er rökrétt að fram fari útför svo hægt sé að koma hræinu í gröfina. Útförin fer þannig fram að Alþingi afturkallar umsóknina formlega á sama hátt og þingið ýtti henni úr vör. 

Athugasemdir

[Jón Steinar Ragnarsson, 18.2.2015 kl. 14:40]

Er ekki allt í lagi að menn spari sér gífuryrði og grafískar samlíkingar í þessari umræðu? Sérstaklega þeir sem koma fram í nafni samtaka breiðs hóps?

Svona talsmáti er engum að gagni og geislar af sér ofstæki sem gera skrifin sjálfkrafa ómerk.

Vinsamlegast reynið að sýna skynsemi og hófsemi í skrifum ykkar. Ég sem ESB andstæðingur og félagi í Heimsýn skrifa ekki undir svona talsmáta og skrílshátt.

[Guðbjörg Snót Jónsdóttir (IP-tala skráð) 18.2.2015 kl. 15:16]

 Ég er sammála pistlahöfundi. Það er líka Össurri til háborinnar skammar að standa í vegi fyrir því, að málið verði tekið til umræðu og afgreiðslu á Alþingi og hóta öllu hinu versta, verði það gert. Það sæmir ekki alþingismanni að haga sér svoleiðis, en sýnir, hvernig þessir Samfylkingarmenn hugsa, og hvernig þeir vilja ráðskast með allt og alla á þinginu. Að það megi ekki einu sinni ræða málið inná Alþingi hvað þá annað. Það er rétt, að málið er steindautt hvort eð er. Hverju er að tapa, þótt málið verði tekið á dagskrá og afgreitt á þinginu? Þetta fólk hagar sér eins og fífl, vægast sagt. Gunnar Bragi á ekkert að hlusta á þetta fólk og setja málið á dagskrá og láta á það reyna, hvað gerist við það, og hvort þessi læti eru ekki mest í kjaftinum á Samfylkingarforystunni. Það er greinilegt, að Össur vill ekki aðeins vera baksætisbílstjóri Samfylkingarinnar einnar, heldur líka Forseta Alþingis, með því að vilja ráða ferðinni í afgreiðslu mála þar inni. Þetta gengur ekki. Endilega klára málið, hvað sem Samfylkingarforystan segir! Mál er að linni þessarri vitleysu.

[Heimssýn, 18.2.2015 kl. 15:16]

Athugasemd þín er tekin til greina, Jón Steinar.