Svíar neita enn og aftur að samþykkja bókhald ESB

Það hefur ekki gengið þrautalaust að koma bókhaldi ESB í gegnum nálarauga endurskoðenda og eftirlitsmanna. Fjármálaráðherra Svía og ESB-nefnd þingsins hefur nýverið ekki viljað leysa framkvæmdastjórn ESB undan ábyrgð vegna fjárhagsársins 2013. 

Ráðherrann, Magdalena Andersson (Socialdemokratiska Arbetarpartiet), segir að það sé allt of mikið um villur í bókhaldinu, en þær eru í um 4,7 prósentum af öllum færslum. Það vantar oft m.a. nauðsynlegar uppáskriftir eða undirskriftir og innkaup eru oft ekki í samræmi við reglur. Fram kemur á sænska vefnum Europaportalen að Svíþjóð, Holland og Bretland hafi áður fylgst að og ekki viljað samþykkja bókhald ESB. Endurskoðendur hafa í 20 ár gert mjög alvarlegar athugasemdir við bókhald ESB.