Hjörleifur um ESB-umsókn Íslands í ljósi Grikklandsfársins

Hjörleifur Guttormsson, náttúrufræðingur og fyrrverandi ráðherra, ritar mjög góða grein sem birt var í Morgunblaðinu síðastliðinn fimmtudag um reynslu Grikkja af Evrópusambandinu sem sé ekki aðeins mikil lexía fyrir Grikki heldur einnig fyrir Íslendinga. Í lok greinarinnar fjallar Hjörleifur um ESB-umsóknina frá 2009 í ljósi Grikklandsfársins. Þar segir:

 

ESB-umsókn Íslands í ljósi síðustu atburða

Þeir sem stóðu fyrir því 2009 að Ísland sækti um aðild að ESB hafa hægt um sig þessa dagana. Reynslan frá Grikklandi og mörgum fleiri ESB-ríkjum að undanförnu sýnir hvílíkt glapræði þar var á ferðinni og aðför að sjálfstæði og velferð Íslendinga. Af hálfu talsmanna ESB-aðildar Íslands síðasta áratuginn hefur áherslan á upptöku evru verið meginstefið sem bæta átti upp augljóst framsal fullveldis og aðgang að fiskimiðunum. Það er mál til komið að þeir sem börðust fyrir ESB-aðild í tíð síðustu ríkisstjórnar séu látnir horfa í spegil frammi fyrir alþjóð í ljósi þess sem nú er að gerast á meginlandinu. Það er ekki síður sögulegt að um þessar mundir er reynt að stofna stjórnmálaflokk hérlendis undir merki viðreisnar með það meginerindi að knýja á um ESB-aðild Íslands.

Óháð og sjálfbært Ísland

Spennitreyja evrunnar er að verða óbærileg, ekki aðeins fyrir grískan almenning. Þær fórnir sem færðar hafa verið til að viðhalda sameiginlegri mynt koma víða fram í niðurskurði til velferðarmála, stórfelldu atvinnuleysi og samþjöppun auðs í hendur fjármálastofnana og fjölþjóðafyrirtækja. Forysta Evrópusambandsins hefur um skeið haft tilbúnar tillögur til að knýja á um næstu skref í fjármálalegum og pólitískum samruna. Aðeins núverandi brestir í innviðum ESB hafa komið í veg fyrir að þær séu lagðar á borðið. Íslendingar geta prísað sig sæla að þurfa ekki að taka við slíkum boðskap. Eitt brýnasta verkefni íslenskra stjórnmála er að móta skýra stefnu um óháð Ísland og sjálfbæra nýtingu og skiptingu gæða lands og sjávar. Slík stefna felur ekki í sér einangrun heldur grunn til heilbrigðs samstarfs og gefandi samskipta við aðrar þjóðir.

Sjá hér ýmsar fleiri greinar eftir Hjörleif Guttormsson.

Uppsetning og leturbreyting: Heimssýn

Athugasemdir

[Helga Kristjánsdóttir, 13.7.2015 kl. 14:18]

   Einmitt Hjörleifur,rétt eins og í sameiginlegri forsjá,verður Ísland nr.1.

[Elle_, 13.7.2015 kl. 23:13]

Góð grein frá Hjörleifi. Já það er sögulegt að enn skuli finnast heill flokkur sem vill koma landinu í þetta volæði. Hugsa þau ekki?