Að kalla skóflu skóflu

Í yfirstandandi kosningabaráttu spyrja margir um afstöðu til Evrópusambandsaðildar. 

Þó það nú væri!   Eðilegt er að kjósendur fái að vita hvaða skoðun forseti hafi á því hver eigi að setja lög á Íslandi.

Í ljós hefur komið að sumir telja enn að hægt sé að sækja um aðild að Evrópusambandinu til að „sjá hvað sé í boði“.  Það hefur ávallt verið ljóst hvað í boði er, allir fulltrúar Evrópusambandsins eru á einu máli um það.  Í boði er að gangast undir vald sambandsins, lög og dóma, eins og þau eru nú og eins og þau verða í framtíðinni.  Flóknara er það ekki.   Aðildarferlið snýst um að laga sig að þeirri staðreynd.  „Samningaviðræður um aðild“ eru skrauthvörf fyrir aðildarferli. Á það hafa fulltrúar Evrópusambandsins líka margoft bent.

Umsókn Íslands um aðild að Evrópusambandinu var skilyrðislaus ósk um aðild að sambandinu. Þegar ósk af því tagi hefur verið samþykkt fer í gang ferli sem miðar að því að laga löggjöf hins verðandi aðildarlands að löggjöf sambandsins.  Þegar því ferli er lokið má segja að landið sé í framkvæmd komið í sambandið og að atkvæðagreiðsla um aðild sé bara formsatriði.

Athugasemdir

[Guðbjörg Snót Jónsdóttir (IP-tala skráð) 6.5.2024 kl. 10:22]

Mér sýnist nú ekki betur, að við séum á leiðinni inní ESB í gegnum EES-samninginn, og enginn á Alþingi viðrist átta sig á því né vilja einu sinni viðurkenna það, hvað þá annað, þegar samþykktir á alls konar kröfugerðum frá ESB, renna í gegn um þingið, eins og ekkert sé sjálfsagðara. Hvar eru þjóðhollu og lýðveldishollu Íslendingarnir í dag eiginlega? Meira að segja Jón Baldvin áttar sig á, hvað er að gerast og segist stórsjá eftir því að hafa komið Íslandi inn í EES, og segir í öllum viðtölum um þessi mál, að hann hefði alls ekki gert það, ef hann hefði séð það fyrir, hvernig þróunin yrði í ljósi þess, sem er að gerast í dag í þessum efnum, eða hann vitað, hvað ESB ætlaði sér, þótt bæði þingmenn Alþýðubandalagsins og margir fleiri, þar á meðal faðir minn(sem var einn af frammámönnum í Alþýðuflokknum á þeim tíma, en alltaf á móti ESB-aðild fiskimiðanna vegna sem formaður Sjómannasambands Íslands), segðu þá þegar, að þetta væri inngöngudyrnar að ESB, og hefði þess vegna verið alfarið á móti því, að Ísland tengdist EES-samningnum.Jón Baldvin hefur því talað um það, að það þyrfti að taka EES-samninginn og aðildina að honum til gagngerrar endurskoðunar og semja upp á nýtt. Enginn hlustar á Jón Baldvin, þótt hann hafi lög að mæla þar. Því miður. Þetta er hörmung. Ég get ekki sagt annað.