Raunvextir húsnæðislána í Bandaríkjunum á svipuðu róli og á Íslandi

Fram hefur komið að Bandaríkjmenn hafa kosið sér forseta og þingmenn. Einhverjum þykir það ástæða til að biðja um að stjórnvald á Íslandi færist óafturkræft til Brussel.  Erfitt er að skilja það samhengi, enda líklega ekki ætlast til þess að það sé reynt.

Það er á hinn bóginn tilvalið að kanna vaxtamál í BNA.  Sumir telja að verð á lánsfjármagni á Íslandi sé hátt vegna þess að fáir nota íslenska krónu.  Mjög margir nota bandarískan dal. Lítum á kjörin í þeirri sveit:

Verðbólga í BNA er um 2,4%.  Hún er dálítið misjöfn eftir ríkjum, en við fáumst ekki um það. 

Vextir húsnæðislána í þremur flokkum, eftir binditíma eru frá 5,9% upp í 6,9%.  Ekki er getið um veðhlutfall í heimildinni sem að baki liggur sem er hér:

https://money.usnews.com/loans/rates/mortgages/mortgage-rates

Miðað við þessar tölur eru meðalraunvextir á húsnæðislánum í BNA um þessar mundir 3,4%-4,4%. 

Til samanburðar eru vextir á verðtryggðum húsnæðislánum á Íslandi hér: 

https://aurbjorg.is/samanburdur/husnaedislan

Niðurstaðan er í stuttu máli að raunvextir á húsnæðislánum í Bandaríkjunum eru á svipuðu róli og á Íslandi. 

 

Þessi niðurstaða fellur illa að kenningunni um að lítið myntsvæði leiði sjálfkrafa til hárra vaxta, enda líklega aldrei ætlast til þess að neinn græfist fyrir um sannleiksgildi hennar. 

 

 

Athugasemdir

[Guðmundur Ásgeirsson, 9.11.2024 kl. 21:17]

Það er líka hægt að líta til evrulanda í svona samanburði. Húsnæðislánavextir í Eystrasaltslöndunum sem öll nota evru hafa löngum verið á svipuðu róli og hér á Íslandi og stundum hærri. Um tíma voru þeir líka svipaðir á Írlandi og hér.

Það er tálsýn að með inngöngu í ESB og upptöku evru muni Ísland breytast sjálfkrafa í land eins og Þýskaland eða Holland þar sem húsnæðislánavextir hafa sögulega verið með lægsta móti. Hitt er miklu líklegra að innan myntbandlags yrði staða Íslands líkari öðrum jaðarríkjum eins og þeim við Eystrasaltið.

Viljum við breyta vaxtastiginu á Íslandi þá eigum við einfaldlega að breyta vaxtastiginu á Íslandi. Að leggja til að gera eitthvað annað til að ná því markmiði er della. Ef vélin í bílnum gengur illa þá lagast það ekkert með því að skipta um dekk.