Yfir lækinn til að sækja sér vatn

Umræða er um að dómur í máli sem lýtur að virkjun hefði hugsanlega orðið annar en hann varð ef bókun 35 hefði verið samþykkt á sínum tíma. 

Það ætti að vera óþarfi að minna á það, en það skal samt gert, að vilji menn að eitthvað í virkjunarmálum verði öðruvísi en það er, þá hefur Alþingi vald til að setja lög þar að lútandi.

Leiðin til þess er ekki að samþykkja lög um forgang Evrópulaga, sem enginn veit hvert gætu leitt okkur. 

https://www.ruv.is/frettir/innlent/2025-01-16-nidurstada-heradsdoms-ad-likindum-onnur-hefdi-bokun-35-verid-innleidd-433132

 

Athugasemdir

[Guðmundur Ásgeirsson, 17.1.2025 kl. 01:44]

Ef dómurinn er lesinn nógu vel sést að í honum er því beinlínis hafnað að bókun 35 gæti haft þýðingu í málinu, með eftirfarandi orðum:

"Hér er því ekki um að ræða árekstur milli lagaákvæðis byggðs á tilskipuninni og annars ótengds ákvæðis heldur misræmi milli annars vegar ákvæðis tilskipunarinnar eins og það hefur verið túlkað og framkvæmt að Evrópurétti og hins vegar tilsvarandi ákvæðis laganna sem sett voru til innleiðingar á tilskipuninni, túlkaðs til samræmis við skýrt markmið löggjafans að baki því í sinni endanlegu mynd."

Hér er sem sagt ekki um að ræða árekstur á milli innleiðingarlaga og annarra (séríslenskra) laga eins og bókun 35 er ætlað að taka á, heldur var einfaldlega um að ræða ranga innleiðingu á tilskipun, sem brýtur í bága við 7. gr. EES samningsins sjálfs. Fyrir vikið var umrædd EES regla ekki "komin til framkvæmdar" á Íslandi, en bókun 35 á aðeins við um EES reglur sem eru komnar til framkvæmdar og á því alls ekki við um þetta tilvik.

Ógilding ákvörðunar Umhverfisstofnunar byggðist á því að svokölluð vatnatilskipun hefði ekki verið rétt innleidd í íslensk lög. Þar sem engin lög gilda á Íslandi nema þau sem Alþingi hefur samþykkt neyddist dómarinn til að dæma eftir þeim, jafnvel þó það væri í ósamræmi við tilskipunina og hefði neikvæð áhrif á framgang virkjanaframkvæmda. Ekki aðeins við þessa tilteknu virkjun heldur allar hugsanlegar vatnsaflsvirkjanir.

Ósamræmið má rekja til breytingartillögu umhverfisnefndar við frumvarp til laga um stjórn vatnamála nr. 36/2011. Um það er engum að kenna nema meirihluta Alþingis sem samþykkti breytinguna og frumvarpið svo breytt. Þingmenn allra flokka greiddu atkvæði með breytingartillögunni, nema Framsóknarflokks sem sátu hjá. Þingmenn allra flokka samþykktu loks frumvarpið svo breytt.

Vilji Alþingi núna hafa þetta öðruvísi getur það svo sannarlega gert breytingar á þessum lögum til að bæta úr umræddum ágalla á þeim og það er reyndar bráðnauðsynlegt ef tryggja á að hægt að verði að gefa út leyfi fyrir vatnsaflsvirkjunum.