Af hverju er samkeppnin við Kína orðin erfiðari en nokkru sinni fyrr

THE ECB BLOG

 

 

Á meðan Evrópa glímir við lítinn hagvöxt og stöðnun í iðnaði, heldur Kína áfram að styrkja stöðu sína sem eitt helsta afl í heimsbúskapnum - ekki lengur bara sem verksmiðja heimsins, heldur sem útflutningsveldi í hátækni og rafbílavæðingu.

Samkvæmt bloggi Seðlabanka Evrópu frá síðasta hausti nemur landsframleiðsla Kína nú 18% af heimsframleiðslu. Bandaríkin standa í 14%, en evrusvæðið aðeins í 13%. Evrópusambandið í heild nemur um 17% af heimsframleiðslu, en án sameiginlegrar hagstjórnar og með takmarkað svigrúm til sameiginlegra viðbragða.

Kína varð nýlega stærsti bílaútflytjandi heims, og útflutningur rafmagnsbíla jókst um meira en 70% á milli 2022 og 2023. Á sama tíma hefur iðnaðarframleiðsla í Þýskalandi dregist saman og fjárfesting í nýsköpun minnkað. Samkeppnishæfni Evrópu hefur veikst - bæði vegna kostnaðar og skorts á samhæfðri stefnu.

Viðskiptatölur segja sitt: ESB er með um 300 milljarða evra viðskiptahalla gagnvart Kína, en jákvæðan viðskiptajöfnuð gagnvart bandalagsríkjum og nágrönnum, þar á meðal Bandaríkjunum og Bretlandi. Evrópa hefur því yfirhöndina gagnvart vinum sínum - en dregur lægri hlut í viðskiptum við helsta keppinaut sinn.

Á meðan Kína styður eigin útflutning með niðurgreiddri orku, ríkisstuðningi og hagstæðum lánum, bregðast Bandaríkin við með tolla og opinberum styrkjum. Evrópa, aftur á móti, situr aðgerðarlaus - klofin innbyrðis og án verkfæra til að bregðast við. Ísland fylgir Evrópu í gegnum EES, án þess þó að hafa áhrif á stefnuna sem mótuð er í Brussel.

Ef þessi þróun heldur áfram, hve lengi getur ESB haldið í áhrif sín?

Athugasemdir

[Jónatan Karlsson, 24.3.2025 kl. 14:52]

Hvað hlut Kínverja í tækniframförum snertir, þá heyrði ég fyrir nokkrum dögum óstaðfesta frétt þess efnis að nú séu þeir komnir með nýja tækni sem gerir kleyft að hlaða rafhlöðu bílsins í 80% á innan við fimm mínútum.

Þar fyrir utan endurtek ég þá skoðun mína að Íslendingar ættu tafarlaust að segja sig frá Schengen, NATO og EES og gaumgæfa síðan umsókn að BRICS ríkjasambandinu (auðvitað allt þetta að undangenginni þjóðaratkvæðagreiðslu)

[Ómar Geirsson, 25.3.2025 kl. 16:24]

Vælukjóar án vitsmuna hafa lengi sett inn pistla á þennan áður ágæta útvörð varnar þjóðarinnar gagnvart landsölunni sem kennd er við ESB.

Það lægsta var stuðningurinn við Pútín og árásarstríð hans gagnvart fyrrum Sovétlýðveldum.

Núna er Evrópa undir gagnvart Kína segið þið, vísið í gagnaðgerðir ríkisstjórnar Trump.  Sem og þið bendið á algjört aðgerðarleysi Evrópu gagnvart kínverska hagkerfinu.

Og hvað svo, Ísland er undir regluverki ESB í gegnum EES samninginn, sama þróun hefur átt sér stað hér.

Eruð þið þá í að leggja til að Ísland segi upp EES samningum, og hefji þrautagönguna gegn útvistun glóbalauðsins á framleiðslu vestrænna landa til Kína og annarra þrælaverksmiðja Glóbalsins??

Að við gerum Ísland "great again".

Spyr vegna þess að Heimsýn hefur birt pistla um ágæti EES samningsins, að með honum þá þurfum við ekki formlega að gefa sjálfstæði þjóðarinnar eftir til Brussel.

Og hvernig á að túlka þessi orð vælukjóanna; "Ísland fylgir Evrópu í gegnum EES, án þess þó að hafa áhrif á stefnuna sem mótuð er í Brussel.".

Það liggur við að maður spyrji sig; Hvert var gjaldið fyrir sálu ykkar og sannfæringu??

Af sem áður var.

Kveðja að austan.