Ákall elítu veitir ekki sjálfvirkt umboð

Í grein Ernu Bjarnadóttur á Vísir.is í dag, 6. ágúst, er bent á að engin ákvörðun hafi verið tekin af hálfu Alþingis eða ríkisstjórnar um áframhald umsóknar Íslands frá 2009. Skráning hennar hjá framkvæmdastjórn ESB felur ekki í sér lýðræðislegt umboð.

Greinin svarar beint áskorun sem sett var fram í grein Magnúsar Árna Skjöld Magnússonar 4. ágúst, þar sem hann hvetur stjórnvöld til að "klára það sem hófst 2009".

Engin ákvörðun, ekkert umboð
Á meðan hvorki hefur verið samþykkt þingsályktun, boðuð þjóðaratkvæðagreiðsla né tekin afstaða í ríkisstjórn, er enginn grundvöllur fyrir því að tala um virkt aðildarferli.

Eins og Erna bendir á, þarf íslensk ákvörðun að liggja að baki, óljós skráning í skruddum ESB færir ekki slíkt umboð.

Að halda öðru fram er dæmi um það sem fræðimenn hafa kallað elítudrifna samþættingu: að stefnumótun sé mótuð af þrýstingi að ofan fremur en lýðræðislegri umræðu og ákvörðun kjósenda.

Erna bendir einnig á að boðaðar "sérlausnir" í aðildarviðræðum séu ekki traustur grundvöllur. Þær eru háðar vilja annarra ríkja og eru hvorki varanlegar né lagalega bindandi.

Lýðræði krefst skýrleika en ekki formsatriða.

Athugasemdir

[Glúmm (IP-tala skráð) 6.8.2025 kl. 11:03]

Alþingi samþykkti að sækja um og hefja aðildarviðræður. Ekkert hefur annað komið frá Alþingi. Ég get ekki fundið hvert ráðherrar sækja vald til að fara gegn samþykktum Alþingis. Síðast þegar ég gáði var valdið hjá Alþingi en ekki ráðherrum. Samkvæmt öllum gögnum hefur Alþingi ekki dregið umsókn sína um aðild Íslands til baka.

[Guðmundur Ásgeirsson, 6.8.2025 kl. 16:15]

Hvorki stjórnarskráin né lagalega bindandi niðurstöður tveggja þjóðaratkvæðagreiðslna leyfa aðild Íslands að ESB og ekkert annað getur haggað því. Þar sem aðild Íslands að ESB er lagalega útilokuð er líka tómt mál að tala um einhverja umsókn.