Fullt hús í Iðnó – baráttugleði og samstaða

Í gærkvöldi, þriðjudagskvöldið 7. október fór fram fjölmennur fundur í Iðnó undir yfirskriftinni "Ögurstund í lífi þjóðar. Endalok þjóðveldis - endalok lýðveldis?" þar sem félög sem vinna að fullveldismálum sameinuðu krafta sína. Á dagskrá voru erindi og umræður um bókun 35 og þau grundvallaratriði sem lúta að lýðræði og fullveldi Íslands. Fundurinn fór fram fyrir fullu húsi, langt fram á ellefta tímann, og sóttu hann gestir á öllum aldri og víða að úr samfélaginu.

Kraftmiklar raddir - lifandi umræða

Framsögurnar voru fjölbreyttar, hver með sín sérstöku sjónarhorn, og saman mynduðu þær kraftmikla heild sem kveikti líflegar umræður og spurningar úr sal. Það er ekki sjálfgefið að slíkur fjöldi frummælenda nái að halda uppi einlægri og áhugaverðri umræðu, en í þetta skiptið tókst það afburðavel. Allir sem þátt tóku í umræðum eiga einnig þakkir skildar.

Stemningin í salnum bar vott um baráttugleði og samstöðu um mikilvægi þess að standa vörð um sjálfstæði þjóðarinnar, samfélagsgerðir okkar og lýðræðishefð. Fundurinn sýndi glöggt að þessi mál varða ekki aðeins fortíðina heldur einnig framtíðina og að þau snerta grundvallarforsendur samfélagsins.

Umræðu um bókun 35 er hvergi nærri lokið - hún hefur verið á dagskrá í nokkur ár og verður það  án efa áfram í samfélaginu.

Baráttan heldur áfram.