75 milljörðum króna varið í áróður fyrir auknum samruna

Samkvæmt fjárlögum Evrópusambandsins fyrir árið 2008 mun sem samsvarar rúmlega 75 milljörðum króna verða varið í ýmis konar áróður fyrir auknum samruna innan þess eða eins og það er orðað í fjárlögunum "til að styrkja evrópskar stofnanir og félagasamtök sem vinna að auknum evrópskum samruna." Um 600 milljónum króna verður ennfremur varið í áróður með það að markmiði að reyna að fá ríki utan Evrópusambandsins til að ganga í það. Þá verður rúmum 17 milljörðum varið í ýmis almannategslaverkefni til að bæta ímynd sambandsins á meðan vel yfir 32 milljarðar fara í kostnað vegna ferðalaga og skemmtunar fyrir embættismenn þess.

Að lokum má geta þess að 17 milljarðar eru eyrnamerktir sameiginlegri utanríkis- og öryggisstefnu Evrópusambandsins jafnvel þó hún taki ekki gildi nema fyrirhuguð stjórnarskrá sambandsins nái fram að ganga. Nokkuð sem ekki liggur endanlega fyrir hvort muni verða raunin.

Heimild:
Britain will spend millions on EU opt-outs (The Sunday Telegraph 26/08/07)

Athugasemdir

[Jón Valur Jensson, 1.9.2007 kl. 00:59]

Þetta er hrikaleg peningaeyðsla, sem miðast ekki sízt við að svæla til sín vel stæðar þjóðir inn í bandalagið, þær sem eftir eru og búa yfir miklum auðlindum. Það á t.d. um Íslendinga, Norðmenn og Svisslendinga. Fyrstnefndu þjóðirnar sitja á geysimiklum sjávarauðlindum og Norðmenn þar að auki á olíu- og gasauðlindum sem enginn skyldi líta fram hjá í þessu sambandi.

Hverjar skyldu nú vera fjarveiturnar til íslenzks almennings á vegum þessa Evrópusambands? Hverjir eru á launaskrá? Hverjir tróna þar hæst? Eru þar einhverjir, sem nú þegar má kalla lenda menn ESB-valdsins (rétt eins og við höfðum aðra slíka á síðustu áratugum Sturlungaaldar, áður en við glötuðum sjálfstæði okkar)? Og þar að auki: Hve margir aðrir hafa hlýtt kallinu um utanstefnur og ókeypis 'kynnisferðir'? Í hvaða geirum samfélagsins eru þeir? Sveitarstjórnarmenn, stjórnarráðsfólk, ráðherrar, þingmenn, nefndarmenn ýmsir á vegum ríkis, borgar og sveitarfélaga, fólk frá ríkisstofnunum og félagasamtökum, verkalýðsfélögum, lífeyrissjóðum, stórfyrirtækjum og öðrum höfuðstöðvum og afkimum samfélagsins? Svör við þessum spurningum yrðu næsta fróðleg.

[Hjörtur J. Guðmundsson, 1.9.2007 kl. 20:38]

Ef svona æðislegt er að ganga í Evrópusambandið, eins og ófáir Evrópusambandssinnar vilja meina, þá veltir maður því eðlilega fyrir sér hvers vegna það þarf að eyrnamerkja sérstaklega háar fjárhæðir hjá sambandinu í áróður fyrir slíku.