FULLVELDISHÁTÍÐ 1. DESEMBER Í SALNUM - ALLIR VELKOMNIR !

Fullveldishátíð Heimssýnar verður haldin í Salnum í Kópavogi næstkomandi þriðjudag 1. desember milli kl. 17-19. Hátíðin var haldin í fyrsta sinn í fyrra og tókst sérlega vel. Ræðumenn að þessu sinni verða alþingismennirnir Ragnheiður Elín Árnadóttir og Ásmundur Einar Daðason, formaður Heimssýnar ásamt Guðna Ágússyni fyrrverandi landbúnaðarráðherra og formanni Framsóknarflokksins.

Á hátíðinni verður frumflutt verk eftir Atla Heimi Sveinsson tónskáld sem byggt er á Gunnarshólma. Það er Fífilbrekkuhópurinn sem sér um tónlistarflutning.

Aðgangur er ókeypis og allir velkomnir.

UNDARLEG TILVILJUN

Það er undarleg tilviljun að á sama degi og Íslendingar minnast fullveldisins mun Lissabon-sáttmáli Evrópusambandsins taka formlega gildi.  Sáttmálinn er í raun er ný stjórnarskrá Evrópusambandsins og hún færir Brussel enn meiri völd yfir aðildarríkjunum. Því miður fengu þegnar aðildarríkjanna, að Írum undanskildum, hvorki að greiða atkvæði um nýju stjórnarskrána né kjósa nýja forsetann sem hún færir þeim.

HEIMSSÝNARFULLTRÚAR Í NOREGI

Um þessar mundir er stödd í Noregi níu manna sendinefnd á vegum Heimssýnar í boði NEI ti EU og tekur þátt í aðalfundi þessara systursamtaka Heimssýnar. Ísland er meginþema fundarins að þessu sinni. Dagskrá Íslendinganna hefur verið þétt skipuð og halda þeir ræður og taka þátt í vinnustofum um Ísland, Noreg og ESB. 

- Stjórnin