Nýtt þorskastríð verður háð í Brussel

Nýtt þorskastríð er framundan fyrir Íslendinga að sögn skoska dagblaðsins The Inverness Courier sem að þessu sinni verður háð í fundarherbergjum í Brussel en ekki á hafi úti. Ástæðan er umsókn íslenskra stjórnvalda um inngöngu í Evrópusambandið og sú staðreynd að yfirstjórn ríki framselja yfirstjórn sjávarútvegsmála sinna til sambandsins þegar þau ganga í það.

Sjá nánar á heimasíðu Heimssýnar www.heimssyn.is.

Íslendingar geta ekki setið einir að fiskimiðum sínum

Diego López Garrido, Evrópumálaráðherra Spánar, telur Íslendingum ekki stætt á því að útiloka aðrar þjóðir frá fiskimiðum sínum eða útgerðarfyrirtækjum þegar til lengri tíma sé litið gangi þeir í Evrópusambandið. Þetta kom fram í Speglinum í Ríkisútvarpinu í gærkvöld en þar ræddi Kristinn R. Ólafsson, fréttaritari Ríkisútvarpsins í Madríd, við ráðherrann.

Sjá nánar á heimasíðu Heimssýnar www.heimssyn.is.

Evrópusambandið gagnrýnt fyrir að reka „áróðursvél“

Sænska hugveitan Timbro sendi frá sér skýrslu nýverið þar sem Evrópusambandið er harðlega gagnrýnt fyrir að hafa í gegnum tíðina farið langt út fyrir það sem kallast geti eðlileg og sanngjörn upplýsingamiðlun og hafa þess í stað skapað áróðursvél. Í skýrslunni segir m.a.: „Evrópusambandið hefur á kostnað skattgreiðenda með virkum hætti hvatt til aukins samruna innan sambandsins og komið í veg fyrir frjálsa umræðu um framtíð þess og þannig farið út fyrir mörk þess sem getur talist til eðlilegra samskipta.“

Sjá nánar á heimasíðu Heimssýnar www.heimssyn.is.

Íslendingar varaðir við ESB-aðild

Fulltrúar Dana, Norðmanna, Svía og Finna á Norrænum Fólksríkisdegi vara Íslendinga eindregið við að ganga Evrópusambandinu á hönd. Þetta kom glöggt fram í umræðum á fyrsta degi hins árlega málþings sem að þessu sinni var haldið um verslunarmannahelgina í Ydby á Norður Jótlandi. Setningaræðu þingsins flutti Bjarni Harðarson bóksali og fulltrúi samtakanna Heimssýnar á Íslandi.

Sjá nánar á heimasíðu Heimssýnar www.heimssyn.is.

Meirihluti Íslendinga andvígur inngöngu í Evrópusambandið

Samkvæmt nýrri skoðanakönnun sem Capacent Gallup gerði fyrir útgáfufélagið Andríki eru 48,5% Íslendinga andvíg inngöngu í Evrópusambandið en 34,7% henni hlynnt. 16,9% sögðust ekki hafa tekið afstöðu til málsins. Sé aðeins miðað við þá sem tóku afstöðu eru 58,3% andsnúin inngöngu en 41,7% henni fylgjandi.

Sjá nánar á heimasíðu Heimssýnar www.heimssyn.is.

Evrópusambandið styrkir útgerðir sem stunda ofveiði

Fjallað var um það á Morgunblaðsvefnum 31. júlí sl. að Evrópusambandið hafi í gegnum tíðina styrkt útgerð fiskiskipa sem veiða ofveiddar tegundur og eins skipa sem stunda ólöglegar veiðar. Þetta kæmi fram í úttekt á fiskveiðistuðningi sambandsins á árunum 2000-2006 samkvæmt frétt danska ríkisútvarpsins Danmarks Radio. Haft var eftir Michael Veds, upplýsingafulltrúa framkvæmdastjórnar Evrópusambandsins í Danmörku, að erfitt væri að komast hjá þessu þar eð 80% af fiskistofnum í lögsögu sambandsins væru ofveiddir.

Sjá nánar á heimasíðu Heimssýnar www.heimssyn.is.

Segir Íslendinga þurfa að gefa eftir kvóta til evrópskra sjómanna

„Landinu er mjög umhugað að byggja upp þorskstofnana sem eru mikilvægur þáttur í hagkerfi þess. Stofnarnir kunna að vera að ná sér á strik en það verður gríðarleg andstaða við að gefa eftir kvóta til evrópskra sjómanna í samræmi við sameiginlegu sjávarútvegsstefnuna.“ Þetta er á meðal þess sem fram kemur í færslu sem Michael Berendt, fyrrum embættismaður framkvæmdastjórnar Evrópusambandsins, ritaði á bloggsíðu sína 27. júlí sl. í tilefni af umsókn Íslands um inngöngu í sambandið.

Sjá nánar á heimasíðu Heimssýnar www.heimssyn.is.

Spánverjar ætla sér að komast í íslensk fiskimið

Spænska dagblaðið El Pais greindi frá því í vikunni að í augum spænska fiskveiðiflotans væri íslenska fiskveiðilögsagan fjársjóður og ennfremur að ráðherra Evrópumála í ríkisstjórn Spánar, Diego López Garrido, hefði í hyggju að tryggja hagsmuni spænsks sjávarútvegar í umsóknarferli Íslands að Evrópusambandinu. Haft var eftir ráðherranum að Spánverjar myndu hafa mikið að segja um umsóknarferlið og að ekki mætti undir neinum kringumstæðum semja um inngöngu Íslands í sambandið nema spænskir fiskveiðihagsmunir yrðu tryggðir.

Sjá nánar á heimasíðu Heimssýnar www.heimssyn.is.