Styrmir og Jón Baldvin um ESB á Sögu

Styrmir Gunnarsson og Jón Baldvin Hannibalsson verða gestir þáttarins ESB - nei eða já sem er á dagskrá Útvarps Sögu FM 99.4 á laugardögum frá kl. 12:45-14:00. Umsjónarmenn þáttarins eru Frosti Sigurjónsson og Egill Jóhannsson og fá þeir gesti til að ræða kosti og galla við ESB-aðild Íslands.

Þátturinn á morgun er sá þriðji sem þeir félagar standa að en dags daglega stýra þeir fyrirtækjum, Frosti dohop.is og Egill Brimborg.

ESB-reglur leyfa rukkun á notkun kreditkorta

Verslunum er heimilt að rukka neytendur fyrir notkun kreditkorta, samkvæmt nýjum reglum Evrópusambandsins. Í Noregi og Danmörku er gert ráð fyrir að verslanir munu leggja eitt til fjögur prósent ofan á verð vöru og þjónustu sé greitt með kreditkorti.

Útgefendur kreditkorta leyfa ekki verslunum og þjónustuaðilum að rukka neytendur fyrir notkun. Nýjar reglur Evrópusambandsins banna þessa viðskiptahætti.

Samkvæmt frétt Aftenposten í Noregi verða reglurnar til þess að fleiri nota reiðufé í viðskiptum.

Færeyjar, Pólland og hvers vegna ekki Noregur?

Færeyingar og Pólverjar lánuðu Íslendingum peninga án skilyrða um lausn Icesave-deilunnar við Breta og Hollendinga. Hvers vegna eru Norðmenn ekki tilbúnir að gera slíkt hið sama? Á þessa leið spyr formaður norsku samtakanna Nei til EU í lesendabréfi í dagblaðinu Nationen.

Formaðurinn, Heming Olaussen, tekur undir sjónarmið Evu Joly sem verið til umræðu í norskum fjölmiðlum undanfarið. Joly, sem aðstoðar sérstakan saksóknara hér á landi, hefur talað máli Íslands í deilunni við Breta og Hollendinga um uppgjör á Icesave-reikningum.

Samtökin Nei til EU eru ein stærstu félagasamtök Noregs með um 30 þúsund félagsmenn. Nei til EU eru systursamtök Heimssýnar.

 Hér er lesendabréf Heming Olaussen.

Matvæli ódýr á Íslandi

Ódýrasta matarkarfan er í Berlínarborg en neytandinn þarf að greiða mest fyrir vörurnar í Osló, samkvæmt könnun í Bændablaðinu. Ísland  kemur vel út úr samanburðinum og er næstódýrast í samanburði verði á gúrkum, nýmjólk, hreinu smjöri, kjúklingabringum  og eggjum. Verð var kannað í sjö löndum. Nýmjólkin er áberandi dýrust í Osló þar sem lítrinn kostar 304  krónur. Í Óðinsvéum í Danmörku kostar hann 193 krónur og 177  krónur í London. Hérlendis kostar lítrinn 103 krónur. Ódýrasti  mjólkurlítri er hins vegar í Berlín í Þýskalandi þar sem hann  kostar einungis 98 krónur, 5% lægri en í Reykjavík.

Smjörverð er afar misjafnt á milli landa. Þannig er smjörið  ódýrast á Íslandi þar sem kílóverðið var 530 krónur en dýrast á Spáni  þar sem kílóið kostar 1.657. Þarna munar 212%.  Gúrkurnar reyndust ódýrastar á Spáni en dýrastar í Lúxemborg þar sem stykkjaverð var 226 krónur. Það er rúmlega helmingi hærra  verð en í Krónunni í Reykjavík.

Mikill verðmunur reynist vera  á kjúklingabringum milli landa. Hér er um að ræða ferskar bringur  en ekki frosnar. Dýrastar eru bringurnar í Noregi þar sem kílóið
kostar 3.551 krónu en ódýrastar í Þýskalandi þar sem kílóverðið  er 982 krónur. Athygli vekur að íslensku bringurnar lenda í miðjunni  í verðsamanburði. Þær reynast dýrari í Noregi, Danmörku og  Lúxemborg en ódýrari á Spáni, í Þýskalandi og á Englandi. 

Eggjaverðið er lægst á Spáni þar sem hægt er að kaupa 6 egg í pakka á 152 krónur. Í Noregi er verðið hæst eða 553 krónur. Á Íslandi er  eggjapakkinn á 245 krónur. Þegar á heildina er litið og skoðað hvað þessi tiltekna búvörukarfa kostar er verðmunurinn 150% á milli þeirrar dýrustu og ódýrustu.

Sjá nánar í Bændablaðinu.