Danir með öndina í hálsinum vegna hæstaréttardóms um ESB

Hæstiréttur Danmerkur tekur nú afstöðu til þess hvort ríkisstjórn Danmerkur hafi brotið gegn stjórnarskrá landsins þegar hún skrifaði undir Lissabon-sáttmálann. Europaportalen greinir frá þessu.

Rétturinn á að skera úr um hvort aðild að sáttmálanum hafi farið rétt fram. Tuttugasta grein dönsku stjórnarskrárinnar gengur út frá því að meirihluti í þjóðaratkvæðagreiðslu eða stuðningur fimm sjöttu hluta þjóðþings þurfi að koma til svo heimila megi valdaframsal til yfirþjóðlegrar stofnunar á borð við ESB. Hvorugt átti sér stað og þess vegna höfðuðu 30 Danir mál til að fá aðildinni hnekkt.

Það gæti orðið afdrifaríkt ef Hæstiréttur Danmerkur kemst að þeirri niðurstöðu að ekki hafi verið farið rétt að. Lagalegar gjörðir sem byggja á Lissabon-sáttmálanum munu þá ógildast.

Dómurinn er talinn geta orðið sögulegur, m.a. fyrir stöðu lýðræðis í landinu.

Dómurinn verður kveðinn upp 20. febrúar næstkomandi.

Hassið í ESB lausn við atvinnuleysinu?

Evrópa fer ekki varhluta af vímuefnavandanum, eins og tengd frétt í EUbusiness greinir frá. Embættismenn í álfunni eru þó ekki á því að gefast upp, heldur vilja loka aðkomuleiðum fyrir dópið.

Þrjár milljónir Evrópubúa reykja kannabisefni daglega, en það veldur ýmsum geðrænum vandamálum og íþyngir heilbrigðisþjónustu landanna verulega, samanber nýlega umfjöllun hér á landi. 

Það er þekkt að atvinnuleysi fylgir aukin hætta á dópneyslu. Þetta vandamál er sérstaklega stórt á Spáni. 

ESB berst gegn lögleiðingu á sölu kannabisefna, ef marka má fréttina. Lög, reglur, eftirlit og aðgerðir til að koma í veg fyrir neyslu virðast því vera einkunnarorð og helstu aðferðir ESB í þessum efnum.

Cecilia Malmstroem, einn helsti embættismaður ESB á þessu sviði, vill því ekki fara hina mjúku, hollensku leið. Þó er viðurkennt að skoðanir um lögleiðingu eru skiptar í Evrópu.

Yfirvöld verða því að einbeita sér við að uppræta dópsöluna, hvort sem hún á sér stað með aðstoð hefðbundinna vöruflutninga eða um internetið, segja þessir aðilar. Það þarf að skoða póstinn - einn helsta dreifingaraðilann fyrir dópið!

Pósturinn getur greinilega verið banvænn.

Seðlabanki Evrópu gagnrýndur fyrir ógagnsæi

Seðlabanki Evrópu hefur oft verið gagnrýndur fyrir ógagnsæi og óeðlilega mikil völd án þess að nægilegar lýðræðislegar samþykktir liggi til grundvallar.

Í tengdri frétt frá EUobserver er meðal annars fjallað um þetta.

Evrópskir þingmenn óttast að embættismenn seðlabankans muni sitja beggja vegna borðs og ekki gæta hagsmuna almennings, heldur fjármálafyrirtækjanna, eins og Heimssýnarbloggið hefur áður bent á.

Þingmenn fá samt enn lítið að vita hvað er að gerast. Þeir hafa aðeins ráðgefandi vald yfir regluverki Seðlabanka Evrópu (hér á Íslandi eru það þingmenn sem ráða t.d. gjaldeyrishöftunum með lagasetningu). En þingmennirnir hóta nú að snúast gegn Bankasambandi Evrópu því þar hafa þeir meiri áhrif en á seðlabankann, sem eftir sem áður hefur áhrif á Bankasambandið.

Hagsmunatengslin eru farin að verða skrýtin hjá embættismannakerfinu í ESB, eins og kemur fram í þessari grein EUobserver.