Bara ef við hefðum gengið í sambandið....

Evrópusambandið bráðvantar peninga.  Það vill auka nýsköpun og allt mögulegt fleira.  Þetta fleira er að efla hergagnaframleiðslu.   Evrópusambandið hefur ekki sama svigrúm og flest ríki til að hækka skatta.  Tollar renna hins vegar að mestu leyti til sambandsins. 

Þess vegna er ekki víst að Evrópusambandinu finnist mjög leiðinlegt að fara í tollastríð.

Ef Ísland væri í Evrópusambandinu mundu þeir tollar leggjast langtum þyngra á Íslendinga en meðaljóna í Evrópusambandinu.  Íslendingar flytja nefnilega mikið inn frá Bandaríkjunum. 

Ef Ísland væri í Evrópusambandinu væri með öðrum orðum verið að ræsa færiband sem flytti fjármuni frá Íslendingum í sjóði hergagnaframleiðenda í Evrópu.   Nóg er nú samt.

 

Skynsemin ræður í Noregi

Norska stjórnmálastéttin hefur jafnan verið áhugasamari um að koma Noregi í Evrópusambandið, en hinn almenni kjósandi í Noregi.  Líklega ráða þar atvinnutækifæri sem tengjast stéttinni nokkru, kannski miklu. 

Félagsþroski í Noregi er þó á köflum svo mikill að valdamönnum dettur ekki í hug að sæja um aðild, eina ferðina enn, nema fyrir liggi viðvarandi og traust meirihlutafylgi hjá þjóðinni fyrir slíkum gjörningi. 

Alveg væri nú ágætt ef valdamenn á Íslandi gætu sýnt sama þroska. 

https://stjornmalin.blog.is/blog/stjornmalin/entry/2312851/

 

Bókun 35 - nokkur atriði sem Alþingi ætti að ræða

Bókun 35 er á leið til umræðu á Alþingi. 

Ótalmörgum spurningum er ósvarað.  Hvaða gildandi lög hefur bókunin áhrif á?  Hvers vegna skipti utanríkisráðuneyti skyndilega um skoðun í málinu?  Hvers vegna gekk bókun 35 gegn stjórnarskrá árið 1993 en ekki árið 2025? Hví líta sumir svo á að stjórnarskráin sé aukaatriði þegar kemur að fyrirmælum frá Frakklandi, Þýskalandi og þeirra fylgiríkjum?

Þessar spurningar og ótalmargar aðrar verða ugglaust til umræðu í sölum Alþingis á næstunni. 

Gæti verið að það væri best að leyfa bókun 35 að liggja áfram í því salti sem hún hefur verið í undanfarin 30 ár og snúa sér að þarfari verkum?

 

 

 

1. Bókun 35 geirneglir kerfi sem er á afar gráu svæði gagnvart stjórnarskrá og hugmyndum alls þorra fólks á Íslandi um lýðræði. Kerfið gengur út á að færa dóms- og einkum löggjafarvald í sívaxandi mæli til embættismanna erlends ríkjasambands.

2. Bókun 35 stenst ýmist ekki eða líklega ekki stjórnarskrá að rökstuddu mati margra helstu stjórnspekinga landsins, þar á meðal fv. forseta hæstaréttar og háskólamanna í lögum. Sama sögðu sérfræðingar utanríkisráðuneytis árið 2020 og núverandi innviðaráðherra í fyrra. (sjá t.d. umsagnir Hjartar J. Guðmundssonar og Arnars Þórs Jónssonar sem eru á https://www.althingi.is/thingstorf/thingmalin/erindi/156/85/?ltg=156&mnr=85). Óþarfi ætti að vera að minna Alþingismenn á að þeir hafa svarið eið að stjórnarskrá lýðveldisins, en skal það samt gert hér.

3. EES-samningurinn hefði að öllum líkindum aldrei verið samþykktur með bókun 35 innanborðs. Það eru mjög vond og óeðlileg vinnubrögð að koma valdaframsali í gegnum Alþingi með því að kippa framsalið í litla búta og þröngva þeim svo einum og einum í gegn.

4. Bókun 35 er ný forgangsregla sem setur lagasafn Íslands í uppnám. Hvaða lög falla úr gildi? Það er vægast sagt óljóst Mun fyrirvari um sæstreng í lögum um orkumál verða að engu, svo dæmi sé tekið? Áður en Alþingi samþykkir bókun 35, standi vilji til þess, þarf að svara spurningum af þessu tagi.

5. Bókun 35 flækir stjórnkerfi Íslands. Það er dýrt og það gerir óinnvígðum enn erfiðara að átta sig á hvað gildir og hvað ekki.

6. Það er óljóst hver hin raunverulega ástæða er fyrir því að utanríkisráðuneytið leggur allt í einu svona mikla áherslu á að Alþingi samþykki bókun 35. Fjarvera bókunar 35 í þá 3 áratugi sem EES hefur verið í gildi hefur ekki verið til teljandi vandræða og það er líka vandræðalaust að leyfa málinu að fara fyrir dóm, sé það vilji þeirra sem ráða í Brussel.

7. Meirihluti þjóðarinnar er andvígur bókun 35, skv. skoðanakönnun Prósents í september 2024. Núverandi ríkisstjórn hefur sagt að mikilvægt sé að leyfa þjóðinni að ráða í svokölluðum Evrópumálum. Nú er ágætt tækifæri til þess.

 

https://www.visir.is/g/20252703654d/nokkur-atridi-i-orstuttu-mali-vardandi-bokun-35

Nei, ekki aka út af!

Bandaríkjamenn eru í tollastríði við Evrópusambandið.  Þeir leggja 20% toll á vörur frá sambandinu. Sá tollur hefði getað orðið 40% eða 60% og verður það kannski á morgun.

Evrópusambandið á í blóðugri styrjöld í A-Evrópu og vill bæta í þann rekstur. Allir innanbúðarmenn eru kallaðir a dekk. Andstæðingurinn virðist njóta stuðnings Bandaríkjanna, og reyndar margra fleiri. 

Sjaldan hefur á síðari árum verið eins skýrt hversu miklvægt er að stjórnvald á Íslandi haldist á Íslandi og sé í umboði þeirra sem þar búa. 

Hvað er þá fáránlegra en að samþykkja bókun 35 sem færir vald frá Íslandi til Evrópusambandsins?

 

Jón Bjarnason ritar, sem fyrr, ágætlega um þessi mál:

https://jonbjarnason.blog.is/blog/jonbjarnason/

Stundir sannleikans renna upp

Ef Ísland væri í Evrópusambandinu væri nú efnahagslegt uppnám á Íslandi, vegna tolla í viðskiptum við Bandaríkin. 

Það væri þó bara upphafið.  Boðaðir eru tollar á innflutning frá Bandaríkjunum til Evrópusambandsins.  Ef Ísland væri þar innanborðs færu þeir peningar að langmestu leyti í sjóði sambandsins, en ekki í sjóði íslenska ríkisins.

Ýmsar sveitir í Evrópusambandinu eiga lítil viðskipti við Bandaríkin, og kannski skiptir svona lagað ekki höfuðmáli á þeim bæjum.  Íslendingar eiga hins vegar mjög mikil viðskipti við Bandaríkjamenn og þau skipta miklu máli í íslenskum efnahag. 

 

Grafir

Hjörtur J. Guðmundsson vekur athygli á því að á Íslandi starfar félag sem kallast Evrópuhreyfingin.  Það félag hefur að markmiði að innlima Ísland í Evrópusambandið.  Félagið er í aðildarferli að regnhlífarsamtökum um samruna Evrópu og stofnun Evrópuhers. 

Hvernig skyldi Evrópuhreyfingin sjá fyrir sér að manna Evrópuherinn sinn?  Með brottfalli úr framhaldsskólum á Íslandi? Eða sér hún fyrir sér herskyldu eins og nú er í tísku að ræða?  Ekki fer á milli mála að Evrópusambandið á í styrjöld í A-Evrópu um þessar mundir og vilji er til að bæta þar í.  Það kallar á svör við fleiri spurningum, eins og til dæmis hvar hreyfingin sér fyrir sér að hola niður þeim Íslendingum sem sendir verða í skotgrafirnar og koma heim í pörtum. 

Yrði það í sérstökum heiðursgrafreit með Evrópufána?

 

https://www.stjornmalin.is/?p=12634

https://europeanmovement.eu/policy/strengthening-european-security-and-defence/

Við bönnum hana bara

Sú hugmynd að dómarar hafi neitunarvald um hverjir megi bjóða sig fram til að fara með löggjafar- eða framkvæmdavald er ekki augljóslega góð.  Sumir mundu segja að hún væri ólýðræðisleg og arfavitlaus.

Nú gerist það að dómstóll í Frakklandi bannar formanni eins af vinsælustu stjórnmálaflokkum landsins að bjóða sig fram.  Hafa má ýmsar skoðanir á efnisatriðum dómsins, en ljóst er að hér er eitt mál af fjölmörgum þar sem dómstólar í ýmsum Evrópuríkjum banna ýmist stjórnmálaflokka eða afskipti einstakra manna af stjórnmálum.  Sakargiftir eru ýmsar, oft bara vondar skoðanir, að því er virðist. 

Líklega stendur hvorki lýðræði né þrískipting ríkisvalds í Evrópu ekki eins traustum fótum og menn hafa talið.

Þessi þróun í öðrum löndum Evrópu ætti að minna Íslendinga á að best sé að halda stjórnvaldinu innanlands.  Við þær aðstæður má kjósa það burt.

https://www.mbl.is/frettir/erlent/2025/03/31/bandarikjamenn_segja_utilokun_le_pen_ahyggjuefni/

 

 

Öryggistal út í bláinn

Haraldur Ólafsson tekur saman nokkur lykilatriði varðandi svokölluð öryggismál í nýrri grein. Tilefnið er að nokkrir frelsaðir pistlahöfundar hafa stokkið á öryggismálin, nú þegar fjarað hefur undan peningarökunum.  

Minnt er á að herlaus þjóð geti ekki farið í stríð og eins að annað grundvallaratriði varðandi hagsmuni Breta og Bandaríkjanna sé þetta:

Ekkert bendir heldur til þess að Bretar og Bandaríkjamenn muni láta það yfir sig ganga að stórveldi, sem þeim er andsnúið nái fótfestu á Íslandi, óháð öllum samningum.

Þá fer ekki milli mála að Evrópusambandið sé með herskárra móti um þessar mundir og það fær nokkur orð:

Þar er í forsvari utanríkismálastjóri sem ræðir opinskátt um að skipta Rússlandi upp, leiðir stórfellda hervæðingu bandalagsins og talar á þann veg að það eitt skipti máli að hans lið sigri í stríðinu í A-Evrópu.  Engu máli virðist skipta að þar á Evrópusambandið höggi við mesta kjarnorkuveldi í heimi sem ætlar sér augljóslega ekki að gefast upp og virðist vera búið að fá Bandaríkin í lið með sér.  Með aðild að Evrópusambandinu væri Ísland ekki bara í andstöðu við Rússa, heldur líka með óbeinum hætti við Bandaríkin.  Óljóst er hvað það hefði í för með sér.

Niðurstaðan er svo skýr:

Hugmyndin um að öryggi á Íslandi batni með því að þjóðin verði að þegnum Evrópusambandsins er augljóslega út í bláinn.  Það mundi minnka.

https://www.dv.is/eyjan/2025/3/30/haraldur-olafsson-skrifar-innlimun-evropusambandid-dregur-ur-oryggi-landsmanna/